Read Fulfulde Yosuwa 24 Bible Online

Yosuwa 24 - Fulfulde bible

Yosuwa 24

¹Yosuwa mooɓti le'i Isra'iila fuu haa Sikem. O ewni ndotti'en e ardiiɓe e hiitooɓe e kaliifa'en. Ɓe fuu ɓe ngari, ɓe ndari yeeso Allah.

²Yosuwa wi'i yimɓe ummaatoore fuu: “Ndaa nii Jawmiraawo, Allah Isra'iila wi'i: Ɓooyma baabiraaɓe mon, Tara baaba Ibrahiima e Nahor njooɗi gaɗa maayo Efratis, ɓe ndewi ɗowanteeɓe woɗɓe.

³Nden mi hoo'i kaaka mon Ibrahiima ton haa gaɗa maayo, mi waancini mo nder lesdi Kanaana fuu. Mi hokki mo danygol ɗuuɗŋgol. Mi hokki mo Isiyaaku.

⁴Isiyaaku boo, mi hokki mo Yaakubu e Isuwa. Mi hokki Isuwa lesdi kooseeje Se'ir haa o mara ndi. Ammaa kaaka mon Yaakubu e ɓiɓɓe muuɗum njehi haa Misra.

⁵Nden mi neli Muusa e Haruna, mi ukkani Misra'en masiibooji. Ɓaawoɗon mi wurtini on, onon Isra'iila'en.

⁶Bana nii mi wurtiniri baabiraaɓe mon diga Misra, ammaa Misra'en taasni ɓe bee mootaaji pucci e wa'iiɓe ɗi. Nde baabiraaɓe mon njotti maayo Maaliya,

⁷ɓe ngookani yam haa mi walla ɓe. Mi waɗi nyiɓre hakkunde maɓɓe bee Misra'en. Mi yoofi ndiyam maayo dow Misra'en, ɗam suddi ɓe. Onon Isra'iila'en on ngi'i bee gite mon ko mbaɗmi nder lesdi Misra'en. Ɓaawo maajum on nduuri nder ladde.

⁸Nden mi yahri on haa lesdi Amoori'en, jooɗiiɓe haa fuunaaŋge Urdun. Ɓe kaɓi bee mooɗon, ammaa mi hokki on ɓe. On nyaami lesdi maɓɓe, min boo mi halki ɓe yeeso mooɗon.

⁹Nden Balak ɓii Cippor, laamiiɗo Mo'ab ummi, haɓi bee Isra'iila'en. O neli ewnaago Balaama ɓii Be'or ngam haa o naala on.

¹⁰Ammaa mi sali nanango Balaama, nden o barkiɗini on bee doole. Bana nii mi hisniri on juŋngo Balak.

¹¹Nden on eeri maayo Urdun, on ngari haa Yeriko. Yimɓe jooɗiiɓe ton kaɓi bee mooɗon, waato Amoori'en e Perezzi'en e Kanaani'en e Heti'en e Girgasi'en e Hewi'en e Yebusi'en. Mi hokki on ɓe.

¹²Mi ardini jabatti haa yeeso mooɗon, ɗi ndiiwa laamiiɓe Amoori'en ɗiɗo yeeso mooɗon. On ndiiwaay ɓe bee lagaaje mon e kaafaaje mon.

¹³Mi hokki on lesdi, onon on torraaki remugo ndi. Mi hokki on berniiji, onon on nyiɓaay ɗi, ammaa on ɗon njooɗi nder maaji. On ɗon nyaama haa gese inabooje e jaytunje, ammaa on njubaaki ɗe.

¹⁴Jonta, kule Jawmiraawo, njaggane mo bee gooŋgaaku timmuŋgu, bilaa feloore. Cottine labbi ɗi baabiraaɓe mon ndewi gaɗa maayo Efratis e haa Misra. Njaggane Jawmiraawo feere mum.

¹⁵To ɗum fottanaay on on njaggano Jawmiraawo, nden kam cuɓe hannde mo njagganton, koo labbi ɗi baabiraaɓe mon ndewi gaɗa Efratis, koo labbi Amoori'en ɓe on ɗon njooɗi nder lesdi maɓɓe. Ammaa min bee saare am, min njagganto Jawmiraawo.”

¹⁶Yimɓe ummaatoore njaabi: “Aa'a! Min ngudintaa Jawmiraawo haa min ndewa ɗowanteeɓe woɗɓe.

¹⁷Ngam ɗum Allah Jawmiraawo meeɗen wurtini en diga njeyaaŋgu haa lesdi Misra, enen e baabiraaɓe men. Kaŋko waɗi kaayeefiiji mawɗi ɗi'i, enen en ngi'i. O ayni en koo toy en njehi caka ummaatooje ɗe caaliiɗen lesɗe maaje.

¹⁸Jawmiraawo riiwi yeeso meeɗen ummaatooje man e Amoori'en jooɗiiɓe haa lesdi ndi. Ngam maajum minin boo min njagganto Jawmiraawo, ngam o Allah meeɗen.”

¹⁹Yosuwa wi'i yimɓe ummaatoore: “On mbaawataa jagganaago Jawmiraawo, ngam o Allah ceniiɗo o yiɗaa on tokko ɗowanteeɓe woɗɓe. O munyantaa tuurtolji e hakkeeji mon.

²⁰Ngam nyannde nde on ngudinta Jawmiraawo, on ndewa ɗowanteeɓe jananɓe, nden kam o ukkanan on masiibooji, o majjinan on koo nde o woonani on.”

²¹Yimɓe ummaatoore njaabi: “Naa non! Jawmiraawo min njagganto!”

²²Yosuwa wi'i ɓe: “Onon bee ko'e mon on seedooɓe on cuɓi Jawmiraawo haa on njaggano mo.” Ɓe njaabi: “Nonnon nii.”

²³Yosuwa wi'i ɓe: “To non kam, cottine labbi jananɗi caka mooɗon. Ngaylite ɓerɗe mon haa Jawmiraawo, Allah Isra'iila.”

²⁴Yimɓe ummaatoore mbi'i Yosuwa: “Jawmiraawo Allah meeɗen min njagganto, min ɗowtanan boo wolde maako.”

²⁵Nyalaade maajum Yosuwa haɓɓi alkawal bee Jawmiraawo ngam ummaatoore haa Sikem. Ton o hokki ɓe farillaaji e kiitaaji.

²⁶O winndi bolle man nder deftere tawreeta Allah. Nden o hoo'i hayre mawnde, o darni nde les lekki makki kommbi suudu Jawmiraawo seniindu.

²⁷O wi'i ummaatoore fuu: “Hayre nde'e seedoto dow meeɗen, ngam nde nani bolle fuu ɗe Jawmiraawo wolwani en. Nde seedoto dow mooɗon ngam taa on pewana Allah mooɗon.”

²⁸Nden Yosuwa jaɓɓiti ummaatoore, koo moy hooti haa maral lesdi mum.

²⁹Ɓaawo kuuje ɗe'e Yosuwa ɓii Nuuna, jaggiiɗo Jawmiraawo maayi. Duuɓi maako teemerre e sappo (110).

³⁰Ɓe uwi mo haa maral lesdi maako haa Timnat-Seraha nder kooseeje Efrayim, haa woyla hooseere Ga'as.

³¹Nder nyalɗe ngeendam Yosuwa fuu, Isra'iila'en njaggani Jawmiraawo. Koo ɓaawo maayde Yosuwa boo ɓe tokki jagganaago Jawmiraawo nder nyalɗe ɗe ndotti'en yiiɓe kuuɗe ɗe Allah huuwani Isra'iila fuu.

³²Isra'iila'en uwi i'e Yusufu ɗe ɓe ngadduno diga Misra haa Sikem, nder ngesa ka Yaakubu sooduno haa ɓiɓɓe Hamor, baaba Sikem, baakin suleyje teemerre. Ka laati maral danygol Yusufu.

³³Eli'azaaru ɓii Haruna boo maayi. Ɓe uwi mo haa towndiire Pinehas ɓiyiiko. Kaŋko ɓe ndokkino ngol nder lesdi kooseeje Efrayim.