Read Fulfulde Yosuwa 3 Bible Online

Yosuwa 3 - Fulfulde bible

Yosuwa 3

¹Jaŋngo man Yosuwa dawi cub. Ɓe ummi Sittim, kaŋko bee Isra'iila'en fuu, ɓe ngari haa maayo Urdun. Ɓe mbaali ton hiddeko ɓe eero.

²Ɓaawo nyalɗe tati, kaliifa'en ngaanci nder saŋngeere,

³umri yimɓe ummaatoore: “To on ngi'i liman'en ɗon ndoondo sundukru[3] alkawal Allah Jawmiraawo mon, umme onon boo, tokke ɓe.

⁴Nden on keɓtan laawol ngol tokkoton, ngam on meeɗaay tokkaago ngol. Ngam maajum taa ɓadite sundukru, ndaaye ndu deydey kilomeetir gootel.”

⁵Yosuwa wi'i yimɓe ummaatoore: “Cene ko'e mon, ngam jaŋngo Jawmiraawo waɗan kaayeefiiji caka mooɗon.”

⁶Nden o umri liman'en: “Ndoonde sundukru alkawal, eere yeeso ummaatoore.” Kamɓe ɓe ndoondi sundukru, ɓe ardi yeeso ummaatoore.

⁷Jawmiraawo wi'i Yosuwa: “Hannde puɗɗanmi mawningo ma yeeso Isra'iila fuu. Ɓe paaman mi ɗon wondi bee maaɗa bana mi wonduno bee Muusa.

⁸An, umru liman'en roondooɓe sundukru alkawal: To on njottake maayo Urdun, to on nasti nder ndiyam haa fomoonde, ndare ton.”

⁹Nden Yosuwa wi'i Isra'iila'en: “Ɓadite, keɗite ko Allah Jawmiraawo mon wi'ata on.

¹⁰Nden on anndan Allah geeto ɗon caka mooɗon e fakat o riiwan Kanaani'en e Heti'en e Hewi'en e Perezzi'en e Girgasi'en e Amoori'en e Yebusi'en yeeso mooɗon.

¹¹Ndaa, sundukru alkawal Jawmu duniyaaru fuu saaloto yeeso mooɗon nder Urdun.

¹²Cuɓe jonta worɓe sappo e ɗiɗo nder le'i Isra'iila, gooto nder lenyol fuu.

¹³To kosɗe liman'en roondooɓe sundukru alkawal Jawmiraawo, Jawmu duniyaaru fuu nasti nder ndiyam, ilam Urdun ta'an, ndiyam ndiirtotooɗam diga seeɓoore daroto bana mahol.”

¹⁴Ɗum wakkati codol. Saa'i man maayo Urdun teelan[4] dow pomoole mum. Ummaatoore wurti cuuɗi laymaaji maare haa nde eero maayo Urdun, liman'en ardi nde, ɓe ɗon ndoondi sundukru alkawal. Ɓe njotti fomoonde, nde kosɗe maɓɓe puɗɗi soofugo,

¹⁶ndiyam acci ilugo, dari bana mahol daayiiɗum masin, haa Adaama, wuro wonŋgo kommbi Jaretaan gal seeɓoore ndiyam. Ndiyam ilanɗam gal weendu Araba, waato Weendu Mannda, ta'i ndiŋ. Ummaatoore heɓi eeraago haa nokkuure tiitotirnde bee Yeriko.

¹⁷Saa'i Isra'iila'en ɗon eero dow joorɗum, liman'en roondooɓe sundukru alkawal Jawmiraawo ɗon ndari dow joorɗum caka Urdun, haa ummaatoore fuu saali.