Read Fulfulde Yosuwa 9 Bible Online

Yosuwa 9 - Fulfulde bible

Yosuwa 9

¹Habaru jaalorgal Isra'iila'en warani laamiiɓe wonɓe gaa'e Urdun fuu, haa lesdi kooseeje e lesdi towndiije e lesdi kommbi mbeela yahugo Libanon, waato laamiiɓe Heti'en e Amoori'en e Kanaani'en e Perezzi'en e Hewi'en e Yebusi'en fuu. Nde ɓe nani habaru maajum,

²ɓe mooɓi, ɓe narri ngam haɓugo bee Yosuwa e Isra'iila'en.

³Ammaa nde jooɗiiɓe haa Gibiyon nani ko Yosuwa waɗi Yeriko e Ayu,

⁴ɓe mbaɗi ƴoyre. Ɓe koo'i njooɓaaje e kaywaaji kiiɗɗi ngam bamɗe maɓɓe e kanyakanyaaji kiiɗɗi ceekɗi, bo'itinaaɗi

⁵e paɗe kiiɗɗe takkaaɗe haa kosɗe maɓɓe, ɓe ɗon ɓorni limce kiiɗɗe boo. Tamseere njooɓaari maɓɓe fuu yoori, feti.

⁶Ɓe njehi haa saŋngeere haa Gilgal, ɓe mbi'i Yosuwa e Isra'iila'en: “Min ngari diga lesdi ndaayiindi. Min ngiɗi on kaɓɓa alkawal bee amin.”

⁷Ammaa Isra'iila'en mbi'i Hewi'en ɓe'e: “Ngam ɗume min kaɓɓata alkawal bee mooɗon? Teema on ɗon njooɗi ɓadiiɗum bee amin.”

⁸Ɓe mbi'i Yosuwa: “Min maccuɓe ma.” Yosuwa ƴami ɓe: “On ɓeye? Toy iwɗon?”

⁹Ɓe njaabi mo: “Maccuɓe ma ngari diga lesdi ndaayiindi masin, ngam min nani manoore Allah Jawmiraawo mooɗon. Min nani habaru kuuɗe maako haa Misra fuu

¹⁰e ko o waɗi laamiiɓe Amoori'en ɗiɗo jooɗinooɓe gaɗa Urdun fuu, Sihon laamiiɗo Hesbon e Ook laamiiɗo Baasan haa berniwol Astarot.

¹¹Ndotti'en amin e yimɓe lesdi amin fuu mbi'i: Koo'e njooɓaari laawol haa juuɗe mon. Njehe fottugo bee maɓɓe, mbi'e ɓe: Minin min maccuɓe mon, nden kam kaɓɓe alkawal bee amin.

¹²Tamseere amin nde'e, min koo'i nde nde wulnde haa ci'e[10] amin nyalaade gurtaaki amin wargo haa mooɗon. Ndaa nde yoori, nde feti boo.

¹³Kanyakanyaaji ɗi'i, min kebbini ɗi ɗi kesi, ndaa ɗi ceeki. Limce amin e paɗe amin kiiɗi ngam jahaaŋgal amin juutŋgal masin.”

¹⁴Nden Isra'iila'en nyaami njooɓaaje maɓɓe bilaa ƴamgo muuyo Jawmiraawo.

¹⁵Yosuwa narri bee maɓɓe, haɓɓi alkawal bee maɓɓe ngam hisnugo yoŋkiiji maɓɓe. Mawɓe jama'aare Isra'iila'en kunani ɓe.

¹⁶Ɓe kaɓɓi alkawal bee maɓɓe. Ammaa ɓaawo nyalɗe tati, Isra'iila'en annditi yimɓe ɓe'e ɗon njooɗi ɓadiiɗum bee maɓɓe.

¹⁷Isra'iila'en ummi, njotti gure maɓɓe nder nyalaade tataɓre. Ɗum gure ɗe'e: Gibiyon e Kefiira e Biirot e Kiriyat-Ye'arim.

¹⁸Ammaa Isra'iila'en mbaraay Gibiyoni'en ɓe'e, ngam mawɓe jama'aare kunorani ɓe bee innde Jawmiraawo, Allah Isra'iila. Jama'aare fuu ngurŋgurti dow mawɓe.

¹⁹Ammaa mawɓe fuu mbi'i ɓe: “Min kunorani ɓe bee innde Jawmiraawo, Allah Isra'iila. Ngam maajum en mbaawataa meemugo ɓe jonta.

²⁰Ndaa ko mbaɗeten: En accan ɓe ɓe ngeeɗa ngam daliila hunayeere nde min kunani ɓe. To naa non, tikkere Jawmiraawo waran dow meeɗen.

²¹Sey ɓe ngeeɗa, ammaa ɓe laato teenooɓe leɗɗe e nyeɗooɓe ndiyam ngam jama'aare fuu.” Kanjum mawɓe mbi'i ɓe.

²²Yosuwa umri ewni Gibiyoni'en, nden o ƴami ɓe: “Koni mbaɗɗon min rikici? On mbi'i on ɗon njooɗi daayiiɗum masin. Asee boo, on ɗon njooɗi ɓadiiɗum bee amin.

²³Ngam maajum jonta on naalaaɓe. Haa foroy onon e danygol mon on laatoto maccuɓe, teenooɓe leɗɗe e nyeɗooɓe ndiyam ngam suudu Allah am.”

²⁴Ɓe njaabi Yosuwa: “Naywa, min mbaɗi ɗum ngam min nani bee laaɓɗum ko Allah Jawmiraawo ma umri jaggiiɗo mum Muusa, haa o hokka on lesdi fuu, o halka jooɗiiɓe haa lesdi boo yeeso mooɗon. Min kultori masin, min kuli on ngam daliila yoŋkiiji amin. Ngam maajum min mbaɗi ɗum.

²⁵Min ɗon haa juŋngo ma, waɗ ko fottani ma fuu.”

²⁶Ndaa ko Yosuwa waɗani ɓe: O hisni ɓe ngam taa Isra'iila'en mbara ɓe.

²⁷Ammaa nyalaade man Yosuwa laatini ɓe teenooɓe leɗɗe e nyeɗooɓe ndiyam ngam jama'aare e ngam hirsirde Jawmiraawo. Haa wargo hannde ɓe ɗon tokko waɗugo ɗum haa nokkuure nde Jawmiraawo suɓata.