Read Fulfulde 2 Tessaloniiki'en 1 Bible Online

2 Tessaloniiki'en 1 - Fulfulde bible

2 Tessaloniiki'en 1

¹Min Pol, hawtaade bee Silas e Timote, min ɗon mbinndana on, onon jama'aare nuɗɗinɓe haa Tessaloniiki, ɓe Allah, Baabiraawo meeɗen e Jawmiraawo meeɗen Yeesu Almasiihu:

²Allah Baabiraawo e Jawmiraawo meeɗen Yeesu Almasiihu, ndokka on mo'ere e salaaman.

³Onon deerɗiraaɓe, sey min ngetta Allah foroy ngam daliila mooɗon. Ɗum pottuɗum, ngam nuɗɗinki mooɗon ɗon mawna masin, yiide nde marɗon hakkunde mooɗon boo ɗon ɓesdo yeeso yeeso.

⁴Kanjum waɗi min ɗon mantoro on nder jama'aaje yimɓe Allah goɗɗe, ngam on ɗon tabiti nder nuɗɗinki mooɗon, koo nde on ɗon munyana toonyaaŋge e boneeji.

⁵Boneeji ɗi'i ngoni alaama kiita Allah ngooŋɗuka. Kanji laatinta on heƴiiɓe nastugo laamu Allah, ngu njaroton bone daliila mum.

⁶Allah o adiliijo: O torran torranɓe on.

⁷O Hokkan on siwtaare, onon torraaɓe hawtaade bee amin saa'i Jawmiraawo meeɗen Yeesu waŋgata diga asama e malaa'ika'en maako semmbiɗɓe.

⁸O wardan bee yiite huɓɓanŋge ngam hiitaago heefeerɓe ɓe anndaa Allah e ɓe ɗowtanaaki linjiila Jawmiraawo meeɗen Yeesu.

⁹Ɓe halketeeɓe halkere duumiinde, ɓe senndeteeɓe daayiiɗum bee Jawmiraawo e baawɗe mum tedduɗe.

¹⁰Ɗum laatoto nyalaade nde o warata. Nden senaaɓe teddinan mo, nuɗɗinɓe mo fuu kayɗinan laarugo mo. Onon boo on nuɗɗini seedamku amin.

¹¹Ngam man min ɗon torano on foroy, ngam haa Allah meeɗen tawa on heƴiiɓe ngam ewnaandu ndu o ewnori on. Bee baawɗe maako, o walla on hebbitingo anniyaaji mooɗon booɗɗi fuu, o timmitina kuugal nuɗɗinki mooɗon fuu boo.

¹²Bana nii innde Jawmiraawo meeɗen Yeesu teddinirte nder mooɗon, onon boo on teddinte nder maako. Ɗum fuu ɗum laatoto daliila mo'ere Allah meeɗen e Jawmiraawo meeɗen Yeesu Almasiihu.