Read Fulfulde 2 Tessaloniiki'en 3 Bible Online

2 Tessaloniiki'en 3 - Fulfulde bible

2 Tessaloniiki'en 3

¹Ko luttani min wi'ugo on, deerɗiraaɓe: Torane min, ngam haa wolde Jawmiraawo saŋkito law, nde teddine koo toy fuu bana nde teddinirte haa mooɗon.

²Tore Allah boo haa o hisna min diga yimɓe wonniiɓe, halluɓe. Ngam naa yimɓe fuu ngoni nuɗɗinɓe Linjiila.

³Ammaa Jawmiraawo, o koolniiɗo. O semmbiɗinan on, o aynan on diga Kalluɗo.

⁴Ngam daliila Jawmiraawo min ɗon kooli on boo: Min anndi fakat on ɗon mbaɗa ko min umri on, on ɗon tokkitina bee man yeeso yeeso boo.

⁵Jawmiraawo meeɗen Yeesu Almasiihu ɗowa ɓerɗe mooɗon haa ngiɗon Allah e maron munyal bana Almasiihu.

⁶Onon deerɗiraaɓe, min ɗon umra on bee innde Jawmiraawo meeɗen Yeesu Almasiihu, ndaayotire bee deerɗiraawo laatiiɗo mbaateendamjo mo ɗowtantaako ekkitinol ngol min ekkitini on.

⁷On anndi booɗɗum haani on tokko misaalu amin. Min njooɗaaki bana mbaateendam'en caka mooɗon,

⁸min toraaki haa goɗɗo nyaamdu ndu min nyaami. Ammaa jemma bee naaŋge min kuuwi naawɗum, min comi, ngam taa min teddana koo moy mooɗon.

⁹Fakat, min ke'anno jaɓugo nguure haa mooɗon. Ammaa min ngiɗi on tokko misaalu amin.

¹⁰Ngam man yaake min ɗonno haa mooɗon, min umri on: To goɗɗo yiɗaa huuwugo, taa o nyaama sam.

¹¹Ngam min nani woodi woɗɓe mooɗon laatake mbaateendam'en. Ɓe kuuwataa sam, ammaa ɓe ɗon nasta haala woɗɓe ka yaalaay ɓe.

¹²Irin maɓɓe, min ɗon umra ɓe, min ɗon toro ɓe bee innde Jawmiraawo meeɗen Yeesu Almasiihu, sey ɓe nde'ita, ɓe kuuwa ngam ɓe nyaamna ko'e maɓɓe.

¹³E onon kam deerɗiraaɓe, taa come huuwugo ko wooɗi.

¹⁴To goɗɗo ɗowtanaaki ko min mbolwi nder bataakewol ngo'ol, maande mo, taa kawte bee maako, ngam haa o semta.

¹⁵Taa ndaare mo bana konneejo, ammaa pele mo bana deerɗiraawo.

¹⁶Jawmiraawo, marɗo salaaman hokka on ka koo ndeye fuu e koo noy fuu. Jawmiraawo wondu bee mooɗon fuu.

¹⁷Ndaa, min Pol mi winndi koofŋgol ngo'ol bee juŋngo am. Ɗo woni alaama binndi am nder bataakeeji am fuu, non mbinndanmi.

¹⁸Mo'ere Jawmiraawo meeɗen Yeesu Almasiihu wondu bee mooɗon fuu.