Read Fulfulde 1 Timote 5 Bible Online

1 Timote 5 - Fulfulde bible

1 Timote 5

¹Taa telɓan ndottiijo. Ammaa waso mo bana o baaba ma, sukaaɓe boo, bana deerɗiraaɓe,

²rewɓe nayeeɓe bana daadiraaɓe[4], derke'en rewɓe boo bana deerɗiraaɓe rewɓe, bee ɓernde laaɓnde.

³Teddin rewɓe laatiiɓe yurumɓe bee gooŋga.

⁴Ammaa to debbo jurumɗo woodi ɓiɓɓe malla taaniraaɓe, sey ɓe ekkito waŋgingo kulol maɓɓe heedi Allah haa yimɓe saare maɓɓe tawon, ɓe mbarjo daada maɓɓe malla maama maɓɓe, ngam ɗum fottanan Allah.

⁵Debbo laatiiɗo jurumɗo bee gooŋga, mo walaa cuklaniiɗo ɗum, ɗon jo'ini tammunde mum dow Allah, o ɗon tiini waɗugo do'a e tornde jemma bee naaŋge fuu.

⁶Ammaa debbo jurumɗo ɗaɓɓanɗo ko ɓernde mum yiɗi tan, laati bana maayɗo, koo nde o geeto tawon.

⁷Umru ɗum rewɓe yurumɓe ngam haa ɓe ngona bilaa feloore.

⁸Ammaa to goɗɗo suklanaaki banndiraaɓe muuɗum, sakkomaa yimɓe saare mum, nden kam o yeddi nuɗɗinki, o tulli mo nuɗɗinaay.

⁹Taa winndu innde debbo jurumɗo nder deftere inɗe rewɓe yurumɓe, sonaa to duuɓi maako njottake cappanɗe joweego, to o ɓaŋgaaɗono nde woore tan,

¹⁰to o anndaaɗo ngam kuuɗe maako booɗɗe, waato o mawnini ɓiyiiko'en booɗɗum, o weerni hoɗɓe, o looti kosɗe senaaɓe, o walli ɓilliiɓe, o tiini huuwugo kuuɗe booɗɗe koo ɗeye.

¹¹Ammaa sala winndugo inɗe rewɓe yurumɓe derke'en. Ngam to suuno waɗi ɓe, ɓe accan Almasiihu, ɓe ɗaɓɓan te'eego.

¹²Bana non ɓe laatoto aybuɓe, ngam ɓe piistan anniya maɓɓe arana.

¹³Dow man fuu ɓe njaɓataa huuwugo, ɓe ɗon ngiilo haa ci'e yimɓe. Ko tulli ɗum boo, ɓe ɗuuɗa-haala'en, karammbaani'en, ɓe ɗon mbolwa ko haanaay.

¹⁴Ngam man ngiɗmi rewɓe ɓe'e te'e fahin, ɓe ndanya ɓikkoy, ɓe cuklano ci'e[5] maɓɓe, ngam taa konne'en men keɓa hallingo en.

¹⁵Ngam rewɓe yurumɓe woɗɓe celi laawol gooŋga, tokki Sayɗaanu.

¹⁶To debbo nuɗɗinɗo woodi rewɓe yurumɓe, sey o walla ɓe ngam taa ɓe teddana jama'aare nuɗɗinɓe, haa nde walla rewɓe laatiiɓe yurumɓe bee gooŋga.

¹⁷Ndotti'en ɗowooɓe booɗɗum ke'i heɓugo ngeenaari cowi ɗiɗi, sakkomaa yarɓe bone ngam kuugal waazugo e ekkitingo wolde Allah.

¹⁸Ngam Deftere wi'i: “Taa waɗan ngaari corɓoori sabakaare.” Non boo: “Kuuwoowo he'i heɓugo ngeenaari mum.”

¹⁹Taa jaɓ wullaandu dow ndottiijo jama'aare nuɗɗinɓe, sonaa to seedooɓe ɗiɗo malla tato tabitini ndu.

²⁰Waɗɓe aybe fuu, sey a fela ɓe yeeso jama'aare fuu, ngam haa luttuɓe kultora.

²¹Mi ɗon hunne yeeso Allah e Yeesu Almasiihu e malaa'ika'en suɓaaɓe, a ɗowtano wasuyeeji ɗi'i, taa a senndindira yimɓe, taa a ɓurna koo moy sam.

²²Taa yaawu wallingo juuɗe ma dow goɗɗo, taa nastin hoore ma nder hakkeeji woɗɓe, aynu hoore ma a laaɓɗo.

²³Accu yargo ndiyam tan, ndikka a yara inaboojam seɗɗa haa a hoynana reedu ma, ngam nyawnyawji ma.

²⁴Hakkeeji yimɓe woɗɓe mbaŋgi laaɓɗum hiddeko kiita waɗa, haa woɗɓe ɗi mbaŋgan ɓaawoɗon.

²⁵Bana non boo kuuɗe booɗɗe mbaŋgirta laaɓɗum. Koo to goɗɗe mbaŋgaay tawon boo, fakat ɗe cuuɗataake.