Read Fulfulde 2 Timote 4 Bible Online

2 Timote 4 - Fulfulde bible

2 Timote 4

¹Mi ɗon hunne yeeso Allah e Yeesu Almasiihu mo hiitoto maayɓe e yeeɗɓe fuu, barka loraaki e laamu muuɗum:

²Waazin yimɓe wolde Allah bee dartaare koo ndey fuu, koo ɗum fottanan ɓe, koo ɗum fottantaa ɓe. Waŋgin aybeeji maɓɓe, fel ɓe, wasa ɓe, ekkitin ɓe bee munyal timmuŋgal.

³Ngam wakkati waran, yimɓe njaɓataa nanugo ekkitinol gooŋgawol fahin. Ammaa ɓe ɓesdanan ko'e maɓɓe ekkitinooɓe deydey suunooji maɓɓe, haa ɓe nana ko welanta noppi maɓɓe.

⁴Heedi gooŋga kam, ɓe cukkan noppi maɓɓe, ɓe ngaylititto haa ɓe kakkilana kiccaaji.

⁵Ammaa an, laata a de'a-hakkiiloojo nder koo ɗume fuu. Munyan boneeji. Huuw kuugal gaazoowo Linjiila, hiɓɓin njaggu ma booɗɗum.

⁶Ngam min kam, mi laatake bana dokkal dufeteeŋgal, saa'i dilluki am waɗi.

⁷Mi haɓi haɓre woonde, mi timmini daɗa-daɗa am, mi jogiti nuɗɗinki.

⁸Jonta keɓal daɗki ɗon reenammi. Jawmiraawo, kiitoowo adiliijo hokkatam woronnde adilaaku nyalaade darŋgal, naa haa am tan, ammaa haa yenwanɓe baŋguki maako fuu.

⁹Haɓdu wargo haa am, taa neeɓ.

¹⁰Ngam Demas wudini yam, ngam o yiɗi zamanuuru jontaaru, o dilli Tessaloniiki. Kereskes dilli Galaatiya, Titus boo dilli Dalmatiya.

¹¹Luka feere mum ɗon wondi bee am. Hoo'u Markus, wardu bee maako, ngam kaŋko o nafatam nder njaggu Jawmiraawo.

¹²Mi neli Tikikus haa Efesus.

¹³To a ɗon wara, waddanam mojaare am nde accumi haa juŋngo Karpus haa Torowas, waddu boo defte ɗe accumi ton, sakkomaa defte kuuwraaɗe bee lare.

¹⁴Aleksandire kilaajo waɗi yam halleende ɗuuɗnde. Jawmiraawo hiitoto mo deydey kuuɗe maako.

¹⁵Reenta e maako an boo, ngam o dartani bolle amin bee semmbe.

¹⁶Nyalaade arannde nde ndariimi yeeso kiita ngam haa mi jaabano hoore am, walaa mo wondi bee am. Ɓe fuu ɓe ngudini yam. Taa Jawmiraawo limana ɓe ɗum aybe!

¹⁷Ammaa Jawmiraawo wondi bee am, semmbiɗini yam, ngam haa mi timmitina kuugal waazu am, ummaatooje fuu nana ngu. Kaŋko o hisni yam hunnduko mbarooga.

¹⁸Jawmiraawo hisnatam halleende fuu, yottintam jam nder laamu muuɗum ngu asama. Tedduŋgal laatano mo haa abada abadin. Aamiina!

¹⁹Hoofnu Piriska e Akilas, hoofnu saare Onesiforus boo.

²⁰Erastus lutti haa Korintu. Torofimus, o nyawɗo, mi acci mo haa Miletus.

²¹Haɓdu wargo hiddeko duumol waɗa. Ewbulus e Pudes e Linus e Kalawdiya e deerɗiraaɓe fuu koofni ma.

²²Jawmiraawo wonda bee ma. Mo'ere Allah wonda bee mooɗon fuu.