Read Fulfulde Titus 1 Bible Online

Titus 1 - Fulfulde bible

Titus 1

¹Min Pol, maccuɗo Allah, nelaaɗo Yeesu Almasiihu, ngam waddugo suɓaaɓe Allah haa ɓe annda gooŋga, ɓe ngeeɗa nder kulol Allah,

²bee tammunde ngeendam nduumiiɗam, mi ɗon winndane Titus, ɓiŋngel am nder nuɗɗinki kawtuki en: Allah Baabiraawo e Yeesu Almasiihu, Kisnoowo men ndokke mo'ere e salaaman. Diga zamanuuji ɓooymaaji Allah mo fewataa iini hokkugo en ngeendam ɗa'am. Nder saa'iire ta'aande boo, Allah Kisnoowo meeɗen waŋgini wolde muuɗum, halfini yam kuugal waazaago nde fodde umroore muuɗum.

⁵Ngam daliila man, mi acci ma haa Kereta, ngam haa a mo'ina ko lutti mo'itineego, a darna ndotti'en jama'aare nuɗɗinɓe nder gure fuu. Siftor ko mi umri ma:

⁶Sey ndottiijo jama'aare nuɗɗinɓe wona goɗɗo mo walaa feloore, marɗo debbo gooto, ɓiɓɓe maako boo ɓe nuɗɗinɓe, taa goɗɗo heɓa felugo ɓe ngam daliila daakaareeku malla ngam nanaru maɓɓe.

⁷Sey ardiiɗo jama'aare nuɗɗinɓe wona goɗɗo mo walaa feloore, ngam Allah halfini mo jama'aare mum. Taa o laato elewɗo malla tikkoowo malla guykoowo malla ŋalloowo malla cuunaaɗo riba,

⁸ammaa o laato beernoowo hoɗɓe, giɗɗo mbooɗeeŋga, kakkilɗo, adiliijo, cenaaɗo, naŋgtiiɗo.

⁹Sey o hakkilana kubaruwol koolniiŋgol deydey ekkitinol ngol o ekkiti, ngam haa o laato baawɗo wasaago jama'aare fodde ekkitinol gooŋgawol e waŋgingo aybeeji dartantooɓe gooŋga.

¹⁰Ngam woodi yimɓe ɗuuɗɓe, ɓurna maɓɓe nder Yahuudu'en nuɗɗinɓe, ɓe tuurtooɓe, waabotooɓe e tokkiiɓe haalaaji baaɗɗi.

¹¹Sey a sukka kunnduɗe maɓɓe, ngam ɓe ɗon mbonna nuɗɗinki yimɓe nder ci'e[1] bee ekkitingo ko haanaay. Ɓe ɗon mbaɗa ɗum ngam haa ɓe keɓa riba kalluka.

¹²Goɗɗo nder annabi'en maɓɓe wi'i: “Kereta'en ɗon pewa foroy. Ɓe dabbaaji kalluɗi, mbaateendam'en, suklantooɓe deeɗi muuɗum'en tan.”

¹³Ko o wi'i, ɗum gooŋga! Ngam maajum fel ɓe bee caatal, ngam haa ɓe tabita nder nuɗɗinki gooŋgaahi.

¹⁴Sey ɓe acca suklanaago kiccaaji Yahuudu'en, taa ɓe tokko farillaaji yimɓe selɓe, accuɓe gooŋga.

¹⁵Haa laaɓa-ɓerɗe'en, koo ɗume fuu laaɓi. Ammaa haa soɓɓe e sooyɓe nuɗɗinki, walaa ko laaɓi, ngam hakkiilooji maɓɓe e numo ɓerɗe maɓɓe coɓi.

¹⁶Ɓe ɗon mbi'a ɓe anndi Allah, ammaa kuuɗe maɓɓe ɗon ngedda mo. Ɓe nyidduɓe, tuurtooɓe, ɓe mbaawataa huuwugo kuugal booɗŋgal koo ngale.