Read Fulfulde Titus 2 Bible Online

Titus 2 - Fulfulde bible

Titus 2

¹Ammaa an, sey a wolwa ko yahdata bee ekkitinol gooŋgawol.

²Yeccu worɓe nayeeɓe ɓe laato naŋgtiiɓe, ne'iiɓe, hakkilɓe, tabitiiɓe nder nuɗɗinki e yiide e munyal.

³Bana non boo rewɓe nayeeɓe laato senaaɓe nder yahdu muuɗum'en, taa ɓe laato nyo'ooɓe malla horɓe nguykinoojam, ammaa ɓe laato ekkitinooɓe ko wooɗi.

⁴Sey ɓe ekkitina derke'en rewɓe yiɗugo worɓe muuɗum'en e ɓikkoy muuɗum'en,

⁵haa ɓe laato hakkilɓe, laaɓɓe, suklaniiɓe kuuɗe ci'e[2] muuɗum'en, wooɗɓe, ɗowtantooɓe worɓe muuɗum'en, ngam taa goɗɗo hallina wolde Allah.

⁶Wasa sukaaɓe boo haa ɓe laato hakkilɓe.

⁷An bee hoore ma laatana ɓe misaalu haa kuuɗe booɗɗe. Ekkitinol ma fuu daro dow gooŋga e ne'aare.

⁸Bolle ma laato laaɓɗe, bilaa feloore, ngam haa konne'en cemta, taa ɓe keɓa wolwugo kalluka koo kaye dow meeɗen.

⁹Maccuɓe boo, sey ɓe leestana jawmiraaɓe maɓɓe nder koo ɗume fuu, ɓe ngerdina ɓe. Taa ɓe ngaabo ɓe,

¹⁰taa ɓe ngujja jawmiraaɓe maɓɓe koo ɗume, ammaa ɓe laato hoolaaɓe timmuɓe foroy nder kuuɗe maɓɓe fuu, ngam haa yimɓe camɗina ekkitinol Allah Kisnoowo men.

¹¹Ngam Allah waŋgini mo'ere mum laatiinde seeɓoore kisndam ngam yimɓe fuu.

¹²Mo'ere nde'e ɗon ekkitina en accugo geddal e suunooji duniyaaru, en njooɗo bee hakkiilo e adilaaku e kulol Allah nder duniyaaru jontaaru ndu'u.

¹³En ɗon ndeena nyalaade barkiɗinaande nde tammuɗen. Nyalaade nde'e, Yeesu Almasiihu, waato Allah meeɗen Mawɗo, Kisnoowo, waŋgan nder tedduŋgal muuɗum.

¹⁴Kaŋko o hokki yoŋki maako ngam meeɗen ngam haa o sootta en diga halleende fuu, o laɓɓini en haa en laato ummaatoore maako suɓaande, tiinotooɓe huuwugo kuuɗe booɗɗe.

¹⁵Kanjum, yeccu ɗum nanooɓe ma, wasa ɓe, fel ɓe bee baawɗe ma fuu. Taa accu koo gooto maɓɓe yawo ma.