Read Fulfulde Filemon 1 Bible Online

Filemon 1 - Fulfulde bible

Filemon 1

¹Min Pol, kaɓɓaaɗo ngam daliila Yeesu Almasiihu e Timote, deerɗiraawo men, yahugo haa Filemon, giɗaaɗo e kuuwdiɗɗiraawo amin

²e haa Afiya, deerɗiraawo meeɗen debbo e Arkippus, kawtiɗɗiraawo meeɗen nder haɓre e nuɗɗinɓe mooɓtotooɓe nder saare ma:

³Allah Baabiraawo men e Yeesu Almasiihu Jawmiraawo men ndokka on mo'ere e salaaman.

⁴Deerɗam Filemon, koo ndey mi toroto Allah, mi ɗon siftore, mi ɗon yetta mo,

⁵ngam mi ɗon nana no a yiɗiri senaaɓe Allah fuu, no nuɗɗinki ma wa'i nder Yeesu Almasiihu boo.

⁶Mi ɗon toro Allah, haa kawtal meeɗen nder nuɗɗinki laatina en nafooɓe bee waɗugo mbooɗeeŋga ngam daliila Almasiihu.

⁷Yiide ma seyni yam e suusɗini yam masin, a de'itini boo ɓerɗe yimɓe Allah fuu.

⁸Ngam maajum, koo to mi ɗon bee ndimu nder Almasiihu ngam umrugo ma ko haani,

⁹ammaa ngam daliila yiide mi ɗon toro ma, min Pol, ndottiijo, jonta boo mi kaɓɓaaɗo ngam Yeesu Almasiihu:

¹⁰Mi ɗon toro ma ngam Onesimus, laatiiɗo ɓiŋngel am haa ɗo nder fursina[1], ngam min mi nastini mo nuɗɗinki.

¹¹Naane o nafaayno ma, ammaa jonta o nafete, o nafatam min boo.

¹²Jonta mi ɗon lorna mo haa maaɗa. Kaŋko, o laati giɗaaɗo am masin.

¹³Mi ɓuranno yiɗugo o jooɗodo bee am mbattudi ma haa o wallammi jonta nder fursina ka ngonmi ngam daliila Linjiila.

¹⁴Ammaa mi yiɗaa waɗugo ɗum bilaa yerduye ma, ngam taa mi doole huuwugo kuugal booɗŋgal nga'al. Huuw ngal bee ngiɗa ma.

¹⁵Teema Onesimus seedi bee ma ngam wakkati seɗɗa ngam haa keɓta mo ngam foroy,

¹⁶taa o laato maccuɗo ma tan fahin, ammaa mo ɓuri maccuɗo, waato deerɗiraawo ma giɗaaɗo nder nuɗɗinki. Min mi yiɗi mo masin, ammaa mi tammi an a ɓuratam yiɗugo mo piw, naa fodde ɗabiya neɗɗo tan, ammaa fodde nuɗɗinki nder Almasiihu boo.

¹⁷Ngam maajum, to a laari fakat mi kawtiɗɗiraawo ma, nden kam jaɓɓa mo bana no a jaɓɓorto yam, min boo.

¹⁸To o waɗino ma kalluɗum, to woodi ko tokkiiɗa mo, min a ƴamata.

¹⁹Ndaa, mi winndi bee juŋngo am: Min Pol, mi yoɓete. A anndi to mi yiɗino, mi waawanno tokkaago ma ngam yoŋki ma.

²⁰Useni, deerɗam, waɗanam ɗum ngam yiide Jawmiraawo. De'itin ɓernde am ngam daliila kawtal meeɗen nder Almasiihu!

²¹Mi ɗon winndane ngam mi anndi fakat a ɗowtanto yam. Mi anndi a waɗan ko ɓura.

²²Jonta boo, taaskitanam weerde, ngam mi tammi Allah jaɓan torɗe mooɗon, o lornatam haa mooɗon.

²³Epafras gonduɗo bee am nder fursina ngam daliila Yeesu Almasiihu hoofni ma.

²⁴Markus e Aristarkus e Demas e Luka huuwdiɗɗiraaɓe am boo koofni ma.

²⁵Mo'ere Jawmiraawo meeɗen Yeesu Almasiihu wonda bee mooɗon fuu.