Read Fulfulde Ibraniŋke'en 10 Bible Online

Ibraniŋke'en 10 - Fulfulde bible

Ibraniŋke'en 10

¹Tawreeta laati ɗowdi kuuje booɗɗe tammiiɗe wargo, ɗum misaalu maaje tan. Ka hollataa ko laaɓi nder timmuɗum. Hitaande fuu ɓe tokki lii'anaago Allah kirseteeɗi. Kadi bee kirseteeɗi bana ɗi'i, noy tawreeta waawri timmidingo waddanɓe ɗi haa Allah?

²To jagganooɓe Allah laɓɓinaamano diga hakkeeji maɓɓe fakat, hakkeeji man ɓillataano numo-ɓerɗe maɓɓe fahin, walaa haaje lii'aago kirseteeɗi fahin.

³Ammaa kirseteeɗi ɗon ciftinora yimɓe hakkeeji muuɗum'en hitaande fuu.

⁴Ngam ƴiiƴam ga'i e jawɗi be'i mbaawataa ittugo hakkeeji.

⁵Ngam maajum, nde Almasiihu ɓadake wargo nder duniyaaru, o wi'i Allah: “A yiɗaa kirsaaɗi e dokke, ammaa a waɗani yam ɓanndu.

⁶A seyoraaki dabbaaji guleteeɗi malla kirseteeɗi ngam ittugo hakkeeji.

⁷Nden mbi'mi: Ndaa yam, mi wari ngam waɗugo muuyo ma, yaa Allah, bana ko winnda dow am nder deftere taggaande.”

⁸Aran o wi'i: “A yiɗaa kirseteeɗi e dokke, a seyoraaki dabbaaji guleteeɗi malla kirseteeɗi ngam ittuki hakke.” O wi'i ɗum koo nde dokke ɗe'e fuu lii'aama fodde tawreeta.

⁹Nden o wi'i: “Ndaa yam, mi wari ngam waɗugo muuyo ma.” Bana nii Allah wili dewal kirseteeɗi ɓooymaaji, o waɗi kirseteeŋga Almasiihu mbattudi[5] maaji.

¹⁰Yeesu waɗi muuyo Allah, ngam maajum en laɓɓinaama diga hakkeeji ngam Yeesu Almasiihu lii'ani Allah ɓanndu mum, o waɗi nde woore, ɗum he'i haa foroy.

¹¹Limanjo fuu ɗon huuwa kuuɗe muuɗum kala nyalaade fuu, o ɗon tokki lii'aago kirseteeɗi koo to ɗi mbaawataa ittugo hakkeeji.

¹²Ammaa Almasiihu lii'i ɓanndu mum nde woore ngam hakkeeji, ɗum he'i haa foroy. Ɓaawoɗon o jooɗi haa juŋngo Allah nyaamo ngam foroy.

¹³Ton o ɗon reena haa Allah laatina konne'en maako jaaɓruɗum kosɗe maako.

¹⁴Ngam o lii'i ɓanndu maako nde woore, o timmidini laɓɓingo yimɓe ɓe o seni haa foroy.

¹⁵Ruuhu Ceniiɗo boo ɗon seedano en ɗum. Aran o wi'i:

¹⁶“Jawmiraawo wi'i: Ɓaawo nyalɗe ɗe'e mi haɓɓan alkawal bee maɓɓe. Ndaa nii ngal laatoto: Mi waɗan umrooje am nder ɓerɗe maɓɓe, mi winndan ɗe nder hakkiilooji maɓɓe.”

¹⁷Nden o wi'i fahin: “Mi meetataa siftorgo hakkeeji maɓɓe e kuuɗe maɓɓe kalluɗe.”

¹⁸Ngam maajum, nde Allah yaafi hakkeeji, walaa haaje lii'aago kirseteeɗi ngam ittugo hakke fahin.

¹⁹Onon deerɗiraaɓe, ngam daliila ƴiiƴam Almasiihu ndufaaɗam en anndi fakat en keɓi laawol nastugo suudu ɓurndu senaago.

²⁰O maɓɓitani en laawol kesol, marŋgol ngeendam, gaɗa wiirndallo, waato ɓanndu maako.

²¹En ngoodi hooreejo liman'en mawɗo nder saare Allah.

²²Ngam maajum en ɓadito Allah kadi bee ɓerɗe gooŋgaaje, bee nuɗɗinki cemmbiɗki, bee numo ɓerɗe laɓɓinaaɗe, ɓalli boo giiwaaɗi bee ndiyam laaɓɗam.

²³Sey en ceedo tammunde nde'e yeeso yimɓe fuu bilaa tampere, ngam Allah o koolniiɗo, o waɗan ko o iini.

²⁴Sey koo moy meeɗen suklano deerɗum'en, tiɗɗina ɓe haa en mbaŋgina yiide, haa en kuuwa kuuɗe booɗɗe.

²⁵Taa en acca mooɓtaago bee nuɗɗinɓe bana woɗɓe mboowi waɗugo. Ammaa sey en cemmbiɗindira, sakkomaa on ndaari nyannde Jawmiraawo ɓadake.

²⁶Ngam to en ɗon mbaɗa hakke bee anniya ɓaawo anndugo gooŋga, walaa kirseteeɗum waawata ittugo hakke meeɗen fahin.

²⁷Kiita Allah kulniika e yiite wulanŋge jaw ɗon taaski wulugo dartantooɓe mo!

²⁸To goɗɗo ɗowtanaaki tawreeta Muusa, o mbareteeɗo bilaa enɗam, to seedooɓe ɗiɗo malla tato tabitini aybe maako.

²⁹Sakkomaa to goɗɗo yawake Ɓiɗɗo Allah, to o laari ƴiiƴam alkawal Allah ɗam laɓɓini mo bana huunde meere, to o huɗi Ruuhu mo'ere! Fakat, o heɓan kiita ɓurka hallugo.

³⁰Ngam en anndi mo wi'i: “Min waatoto, min warjoto,” o wi'i boo: “Jawmiraawo hiitoto ummaatoore muuɗum.”

³¹Yanugo diga juŋngo Allah geeto ɗum kulniiɗum masin!

³²Ciftore no on njooɗori naane nder balɗe caaliiɗe, ɓaawo Allah yaynani on bee annoora muuɗum, on munyani boneeji naawɗi ɗuuɗɗi, ammaa ɗi ɓuraay on semmbe.

³³Ndego ɓe kuɗi on, ɓe toonyi on yeeso yimɓe, luttuɓe mooɗon boo tiɗɗini huɗaaɓe go.

³⁴On njurmini haɓɓaaɓe nder fursina. Nde ɓe njaɓti on jawdi, on munyi asar man, on accaay seyaago, ngam on anndi luttani on kuuje ɓurɗe wooɗugo, ɗe timmataa.

³⁵Nden kam taa ngudine dartaare mooɗon, nde waddanan on mbarjaari mawndi.

³⁶On mari haaje munyal ngam haa on mbaɗa muuyo Allah, on keɓa ko o iinani on.

³⁷Ngam Deftere wi'i: “Nii seɗɗa, lutti wakkati seɗɗa haa garanɗo wara, o neeɓataa.

³⁸Ammaa adiliijo yeeɗiran bee nuɗɗinki muuɗum. Ammaa to o lorake ɓaawo, mi seyortaako mo.”

³⁹Enen kam, en laataaki nder loriiɓe ɓaawo halkanɓe. Ammaa en ɗon nder nuɗɗinɓe ngam hisugo.