Read Fulfulde Ibraniŋke'en 2 Bible Online

Ibraniŋke'en 2 - Fulfulde bible

Ibraniŋke'en 2

¹Ngam maajum sey en ɓesda hakkilango gooŋgaaji ɗi en nani, ngam taa en cela laawol.

²Ngam to wolde nde malaa'ika'en anndini ɓooyma, gooŋɗi, mo salake, ɗowtanaaki nde, heɓan kiita deydey aybe[1] muuɗum.

³Kadi bana noy en kisrata to en ɗon ngeebi kisndam mawɗam ɗa'am? Jawmiraawo bee hoore muuɗum aarti anndingo en kisndam ɗa'am, nden nanɓe mo tabitinani en ɗam.

⁴Allah boo semmbiɗini seedamku maɓɓe bee alaamaaji e kaayeefiiji feere feere e bee senndango yimɓe maako dokke Ruuhu Ceniiɗo fodde muuyo maako.

⁵Ngam naa haa malaa'ika'en Allah hokki laamu dow duniyaaru waranndu ndu en mbolwanta.

⁶Aayaaje goɗɗe mbi'i: “Kadi, neɗɗo o moy haa ciftora mo, moy woni ɓii-Aadama haa kakkilana mo?

⁷A leesni mo les malaa'ika'en wakkati seɗɗa, a meeti mo tedduŋgal e maŋngu,

⁸a wallini koo ɗume fuu les kosɗe maako.” Nde Allah wallinani mo koo ɗume fuu bana ko wi'a, nden kam walaa koo ɗume ko o wallinaay les kosɗe maako. Ammaa jonta, en ngi'ataa tawon no kuuje fuu mballinaama les kosɗe maako.

⁹Ammaa en ngi'i Yeesu mo Allah leesni les malaa'ika'en wakkati seɗɗa ngam haa o maaya ngam daliila mo'ere Allah heedi meeɗen. Jonta o heɓi tedduŋgal e hormu ngam boneeji ɗi o yari nder maayde maako.

¹⁰Allah woni Jawmiraawo kuuje fuu. Bilaa maako, walaa ko daroto. Ngam maajum ɗum fottani mo o laatina Yeesu timmididɗo bee yarugo bone ngam o yahra ɓiɓɓe ɗuuɗɓe haa tedduŋgal maako. Ngam Yeesu yahrata ɓe haa kisndam.

¹¹Ngam mo senata yimɓe e ɓe o senata, ɓe fuu ɓe ngoodi Baabiraawo gooto. Ngam maajum o semtaay ewnaago ɓe deerɗiraaɓe maako.

¹²Nden o wi'i: “Yaa Allah, mi wooynan haa deerɗiraaɓe am innde maaɗa, mi maŋgtete nder mooɓtorde maɓɓe.”

¹³Kadiboo o wi'i: “Mi hooloto Allah.” Fahin o wi'i: “Ndaa yam bee ɓiɓɓe ɓe Allah hokki yam.”

¹⁴Nde nii ɓiɓɓe ɓe'e ngoodi ɓanndu e ƴiiƴam, Yeesu boo waɗi hoore mum bana maɓɓe, o hoo'i ɓanndu bana ndu maɓɓe, ngam bee maayde maako, o halka marɗo baawɗe dow maayde, waato Iblisa,

¹⁵o rimɗina laatiiɓe maccuɓe balɗe muuɗum'en fuu ngam daliila kulol maayde.

¹⁶Ngam ɗum laaɓɗum, naa malaa'ika'en o wallata, ammaa danygol Ibrahiima o wallata.

¹⁷Ngam maajum doole o nannda kal-kal bee deerɗiraaɓe maako nder kuuje fuu, ngam haa o laato hooreejo liman'en marɗo enɗam, koolaaɗo nder njaggu Allah, haa yimɓe ummaatoore keɓa yaafuye hakkeeji muuɗum'en.

¹⁸Ngam jonta o waawan wallugo estaaɓe, ngam kaŋko bee hoore maako, o yari bone saa'i o estaama.