Read Fulfulde Ibraniŋke'en 3 Bible Online

Ibraniŋke'en 3 - Fulfulde bible

Ibraniŋke'en 3

¹Ngam maajum onon deerɗiraaɓe am senaaɓe, ewnaaɓe Allah mo asama, ndaare Yeesu mo Allah neli haa o laato hooreejo liman'en mo en nuɗɗinta.

²Ngam o koolaaɗo haa Allah cuɓɗo mo, bana Muusa laatino koolaaɗo nder kuugal muuɗum nder saare Allah fuu.

³O he'i jaɓugo tedduŋgal ɓurŋgal ngal Muusa, bana mahoowo suudu ɓurdata suudu tedduŋgal. Non Yeesu ɓurdiri Muusa tedduŋgal.

⁴Saare fuu woodi mahɗo nde, ammaa Allah woni mahɗo kuuje fuu.

⁵Muusa kam, o jaggiiɗo Allah, o laati koolaaɗo nder saare Allah fuu. O seedi haala kuuje ɗe Allah tammino wolwugo dow maajum.

⁶Ammaa Almasiihu, o Ɓiɗɗo nder saare maako. Enen ngoni saare maako, to en tabiti nder cuusal meeɗen e tammunde meeɗen nde en maŋgtorto.

⁷Ngam maajum Ruuhu Allah wi'i: “To on nani sawtu Allah hannde,

⁸taa caatine ko'e mon bana kaakiraaɓe mon tuurtanino mo nyannde poondol nder ladde hamaadaare.

⁹Ton kaakiraaɓe mon laarndi yam, poondi yam, koo nde ɓe ngi'no kuuɗe am duuɓi cappanɗe nayi.

¹⁰Ngam maajum mi ɓernani yimɓe yidere nde'e, mi wi'i: Ɓerɗe maɓɓe ɗon ndaayo yam tum, ɓe anndaa laabi am sam.

¹¹Ngam maajum, mi huni nder tikkere am: Fakat ɓe nastataa siwtaare am sam!”

¹²Deerɗiraaɓe am, kakkile, taa ɓernde koo moy mooɗon halla, taa o laato sooya nuɗɗinkiijo haa o waylito, o acca Allah geeto.

¹³Ammaa cemmbiɗindire nde weeti fuu, nde “hannde” maajum ɗon, ngam taa hakke esta on, taa on caatina ko'e mooɗon.

¹⁴Ngam en laati kawtiɗiraaɓe Almasiihu, to en tabiti, en ndimmbaaki, en njogi hoolaare meeɗen diga fuɗɗam haa timmoode.

¹⁵Ndaa ko Deftere Allah wi'i: “To on nani sawtu Allah hannde, taa caatine ko'e mon bana nyannde nde kaakiraaɓe mon tuurtuno dow Allah.”

¹⁶Ɓeye nani sawtu Allah, tuurtani mo? Ɗum yimɓe ɓe Muusa wurtini diga Misra fuu.

¹⁷Ɓeye Allah ɓernani duuɓi cappanɗe nayi? O ɓernani waɗɓe hakke, maayɓe nder ladde hamaadaare.

¹⁸Nde Allah huni hunayeere nde'e: “Ɓe nastataa siwtaare am”, dow ɓeye o wolwi? O wolwi dow tuurtuɓe go.

¹⁹En paami ɓe mbaawaay nastugo siwtaare man ngam ɓe cali nuɗɗingo.