Read Fulfulde Ibraniŋke'en 5 Bible Online

Ibraniŋke'en 5 - Fulfulde bible

Ibraniŋke'en 5

¹Hooreejo liman'en fuu laati cuɓaaɗo caka yimɓe, o jo'inaama nder njaggu Allah ngam maɓɓe haa o lii'o dokke e kirsaaɗi ngam ittugo hakkeeji.

²O waawan faamango sooya-anndal'en e majjuɓe, ngam kaŋko bee hoore maako o maati tampere nder koo ɗume fuu.

³Ngam daliila tampere nde'e, sey o lii'o kirseteeɗi ngam ittugo hakkeeji ummaatoore e ngam hakkeeji ɗi o waɗi bee hoore maako boo.

⁴Walaa mo hoosanta hoore muuɗum tedduŋgal laataago hooreejo liman'en. Ɗum Allah ewnata bana o ewnori Haruna.

⁵Non boo, naa Almasiihu hokkani hoore mum tedduŋgal laataago hooreejo liman'en. Ammaa ɗum Allah wi'i mo: “An woni Ɓiɗɗo am, hannde mi danyi ma.”

⁶Haa aayaare woɗnde boo o wi'i: “A limanjo haa foroy bana no Malkisadaka wa'no.”

⁷Yaake Yeesu ɗonno haa duniyaaru, o waɗi do'a, o tori Allah mo waawi hisnugo mo diga maayde bee bojji naawɗi e gonɗi. Allah boo nani tornde maako ngam o kulɗo Allah.

⁸Koo nde o ƁiɗɗoAllah, o ekkitori ɗowtaare bee yarugo bone.

⁹Nde o laati timmididɗo, o laati jawmu kisndam nduumiiɗam ngam koo moy ɗowtani mo fuu.

¹⁰Allah boo darni mo hooreejo liman'en fodde bana no Malkisadaka wa'no.

¹¹Dow haala ka'a, min ngoodi kuuje ɗuuɗɗe ngam tinndingo, non boo kuuje ɗe fassaruuye maaje caɗi, ngam on paamataa law.

¹²Wakkati waɗi haa on laato ekkitinooɓe, ammaa haa jonta on ngoodi fahin haaje goɗɗo ekkitina on kuuje ɓurɗe hoyugo nder bolle ɗe Allah wolwi. Haa jonta on ngiɗi musingo kosam, naa nyaamdu saatundu.

¹³Mo ɗon musina kosam fuu, o ɓiŋngel tawon, o walaa kirseeku wolde ekkitinannde adilaaku.

¹⁴Mawɓe ke'i nyaamugo nyaamdu saatundu, ngam ɓe elti hakkiilooji maɓɓe, ɓe anndi senndindirgo booɗɗum bee kalluɗum.