Read Fulfulde Ibraniŋke'en 8 Bible Online

Ibraniŋke'en 8 - Fulfulde bible

Ibraniŋke'en 8

¹Ndaa haala ɓurka mawnugo nder ko min mbi'ata: En ngoodi hooreejo liman'en, jooɗiiɗo dow leeso laamu haa nyaamo Allah marɗo maŋngu fuu haa asamanji.

²O laati jaggiiɗo hooreejo haa nokkuure seniinde nder laymaaru gooŋgaaru ndu Jawmiraawo waɗi, naa neɗɗo.

³Hooreejo liman'en fuu darnaama ngam lii'anaago Allah dokke e kirseteeɗi. Ngam maajum sey o wadda kaŋko boo ko o lii'oto.

⁴To o ɗonno haa duniyaaru, o laatataakono limanjo sam, ngam woodi liman'en lii'otooɓeno dokke fodde tawreeta.

⁵Kuugal limanku ngal ɓe kuuwata, laati misaalu ko woni nder asama. Non ɗum laati bee Muusa boo nde o ɓadake waɗugo laymaaru, Allah wi'i mo: “Sey a waɗa ɗum fuu fodde misaalu mo mi holli ma dow hooseere.”

⁶Ammaa jonta Yeesu heɓi kuugal limanku ɓurŋgal ngal maɓɓe. Bana non boo alkawal ngal o haɓɓi hakkunde Allah bee yimɓe, ɓuri ngal naane saman, ngam ngal ɗon tabiti dow iinaaji Allah ɓurɗi wooɗugo.

⁷To alkawal aranal walaano aybe, walaano haaje haɓɓugo alkawal ɗiɗaɓal.

⁸Ammaa Allah feli yimɓe muuɗum, wi'i: “Nyalɗe ɗon ngara haa mi haɓɓa alkawal kesal bee yimɓe Isra'iila e bee lenyol Yahuuda.” Non Jawmiraawo wi'i.

⁹“Ngal nanndataa bee alkawal ngal kaɓɓumi bee kaakiraaɓe maɓɓe, nyannde mi naŋngi ɓe juŋngo, mi wurtini ɓe lesdi Misra, nde ɓe tabitaay nder alkawal ngal mi haɓɓuno bee maɓɓe, ngam maajum mi faalaay ɓe min boo.” Non Jawmiraawo wi'i.

¹⁰“Ammaa ɓaawo nyalɗe ɗe'e, mi haɓɓan alkawal goɗŋgal bee yimɓe Isra'iila. Ndaa nii ngal laatorto: Mi waɗan umrooje am nder hakkiilooji maɓɓe, mi winndan ɗe nder ɓerɗe maɓɓe. Min mi laatoto Allah maɓɓe, kamɓe boo ɓe laatoto ummaatoore am.

¹¹Walaa haaje goɗɗo ekkitina keeddiɗɗum malla deerɗum, wi'a ɗum: Anndu Jawmiraawo. Ngam ɓe fuu ɓe anndatam, diga leesɗo maɓɓe haa mawɗo maɓɓe.

¹²Ngam mi yaafoto aybeeji maɓɓe, mi meetataa siftorgo hakkeeji maɓɓe.”

¹³Nde o wolwi haala alkawal kesal, Allah hiiɗini aranal, ko hiiɗi man ɓadake jinnugo.