Read Fulfulde Ibraniŋke'en 9 Bible Online

Ibraniŋke'en 9 - Fulfulde bible

Ibraniŋke'en 9

¹Alkawal aranal, kaŋgal boo ngal woodino farillaaji dow dewal e haykaliiru Allah nder duniyaaru ndu'u.

²Suudu laymaaru ndu deeɗi ɗiɗi waɗaama, aranndu ewnaama nokkuure seniinde. Nder maaru woodi jo'inirɗum pittirlaaji e taabal bee tamseeje jo'inaaɗe yeeso Allah.

³Ɓaawo wiirndallo ɗiɗaɓo, woodi yeɓre wi'eteende yeɓre ɓurnde senaago.

⁴Nder maaru woodi gulduɗum uurle[3] cuddaaɗum fuu bee kaŋŋeeri e sundukru[4] alkawal suddaandu bee kaŋŋeeri. Nder sundukru man woodi taasawo kaŋŋeeri bee mannu nder maago e sawru Haruna finniindu e alluhaaje kaa'e ɗiɗi bee bolle alkawal binndaaɗe dow maaje.

⁵Dow sundukru man woodi suuraaji keruba'en laatiiɓe misaalu tedduŋgal Allah. Ɓe mbeeɗi bileeji maɓɓe dow jooɗorde ngam kefergal. Ammaa walaa haaje min tinndina kuuje ɗe'e fuu.

⁶Nde kuuje fuu ndarnaama bana nii, liman'en tokki nastugo suudu aranndu nder laymaaru kala nyalaade fuu, ngam haa ɓe kuuwa kuuɗe maɓɓe.

⁷Ammaa suudu ɗiɗawru nder laymaaru, sey hooreejo liman'en tan nastata ton, kaŋko boo hitaande fuu nde woore. O ɗon nasta bee ƴiiƴam ɗam o lii'anto Allah ngam hoore maako e ngam hakkeeji ɗi ummaatoore waɗi bilaa anniya.

⁸Ndaa ko Ruuhu Ceniiɗo anndinta bee kuuje ɗe'e: Yaake suudu aranndu nder laymaaru ɗon dari tawon, laawol nastugo suudu ɗiɗawru nder laymaaru maɓɓitaaki tawon.

⁹Ɗum misaalu ngam wakkatiire jonta. Ɗum yiɗi wi'go: Dokke e kirsaaɗi lii'anaaɗi Allah mbaawataa laɓɓingo numo ɓernde dewanɗo mo.

¹⁰Umrooje ɗe'e ndaarani ɓanndu neɗɗo, waato haala nyaamdu e njaram e laɓɓinki kuuje bee laabi feere feere. Ɗum nafi haa wargo saa'iire nde Allah sannji ɗum fuu.

¹¹Ammaa jonta Almasiihu wari. Kaŋko woni hooreejo liman'en dow kuuje booɗɗe ɗe ngarani en jonta. O saali gal laymaaru ɓurndu ndu naane mawnugo e wooɗugo. Juuɗe yimɓe mbaɗaay ndu, waato ndu iwaay haa duniyaaru ndu'u.

¹²Almasiihu nasti nde woore nder laymaaru, ɗum he'i haa foroy. O nastaay bee ƴiiƴam jawɗi be'i e ga'i, ammaa bee ƴiiƴam maako. Bana nii o heɓrani en coottaari duumiindi.

¹³Ƴiiƴam jawɗi be'i e ga'i e ndoondi wiige mbiccaama dow yimɓe soɓɓe, seni ɓe haa laɓɓini ɓalli maɓɓe,

¹⁴nde non kam, ƴiiƴam Almasiihu ɓuran nafugo piw. Bee baawɗe Ruuhu duumiiɗo o hokkiri yoŋki maako haa Allah bana njawdiri ndi walaa aybe koo seɗɗa. Ƴiiƴam maako laɓɓinan numo-ɓerɗe meeɗen, wilan kuuɗe ɗe njahrata en haa maayde, ngam en njaggano Allah geeto.

¹⁵Ngam maajum Almasiihu woni hakkunndeejo Allah bee yimɓe nder alkawal kesal. O maayi ngam soottugo yimɓe diga aybeeji ɗi ɓe mbaɗno yaake ɓe ɗonno nder alkawal aranal, ngam haa ewnaaɓe Allah njaɓa ndonŋgu nduumiiŋgu ngu Allah iinani ɓe.

¹⁶Ngam haa ɗereewol alkawal ndonŋgu huuwtinire, sey tammiiɓe ronugo ngooŋɗina baɗɗo alkawal nga'al maayi.

¹⁷Ngam ɗereewol alkawal ndonŋgu nafataa, sey to binnduɗo ngol maayi bee gooŋga.

¹⁸Kanjum waɗi, koo alkawal aranal boo huuwtiniraaka, sey nde ngal tabitinaama bee ƴiiƴam.

¹⁹Nde Muusa waŋginani ummaatoore fuu umrooje nder tawreeta, nden o hoo'i ƴiiƴam ga'i e ƴiiƴam jawɗi be'i hawtaade bee ndiyam, non boo gaasa be'i mboɗeeha coy bee haako isop o wicci ɗam dow deftere tawreeta e ummaatoore fuu.

²⁰O wi'i: “Ƴiiƴam ɗa'am ɗon tabitina alkawal ngal Allah umri on ɗowtanaago.”

²¹Bana non boo, Muusa wicci ƴiiƴam dow laymaaru e dow kuuje dewal fuu.

²²Fodde tawreeta, kuuje fuu laɓɓinaama bee ƴiiƴam. Walaa yaafuye hakkeeji, sonaa to ƴiiƴam rufaama.

²³Kuuje gonɗe haa asama laatiiɗe misaaluuji haa ko woni nder asama ɗe'e, doole ɗe laato cenaaɗe bana non. Ammaa kuuje haa asama mari haaje kirseteeɗi ɓurɗi saman.

²⁴Ngam Almasiihu nastaay haykaliiru ndu yimɓe mahi, kayru kam, ɗum misaalu ngam haykaliiru gooŋgaaru tan. Ammaa o nasti nder asama, ngam haa o seetto en yeeso Allah.

²⁵Hooreejo liman'en haa Yahuudu'en ɗon nasta nokkuure seniinde hitaande fuu bee ƴiiƴam ndabbaawa. Ammaa Almasiihu nastaay nde ɗuuɗɗum ngam hokkugo yoŋki maako.

²⁶To o waɗino non, diga fuɗɗam tageeki duniyaaru o torrotono nde ɗuuɗɗum. Ammaa o waŋgi jonta haa timmoode zamanuuji fuu, o waŋgi nde woore tan ngam foroy, ngam haa o itta hakkeeji bee lii'anaago Allah yoŋki maako.

²⁷Koo moy fuu maayan nde woore, ɓaawoɗon Allah hiitoto ɗum.

²⁸Bana non Almasiihu boo hokki yoŋki muuɗum nde woore ngam o itta hakkeeji ɗuuɗɓe. O waŋgan ɗiɗawre, naa ngam o itta hakkeeji, ammaa ngam o hisna reenɓe mo.