Read Fulfulde 1 Piyer 5 Bible Online

1 Piyer 5 - Fulfulde bible

1 Piyer 5

¹Jonta, mi ɗon waso ndotti'en jama'aare nuɗɗinɓe wonɓe caka mooɗon. Min boo mi ndottiijo bana mooɗon, mi seedi boneeji ɗi Almasiihu yari, mi nastan tedduŋgal ngal Allah tammi waŋginango en. Mi ɗon wi'a on:

²Ayne tokkere nde Allah halfini on, ayne nde bana no Allah yiɗi, naa bee doole ammaa bee anniya. Kuuwe, naa ngam heɓugo ceede meere, ammaa ngam on ngiɗi ɗum.

³Taa ndoole yimɓe ɓe Allah halfini on, ammaa laatane ɓe misaalu haa ɓe tokko on.

⁴To gaynaako mawɗo waŋgoyi, on keɓan meetaleewol marŋgol tedduŋgal, ngol furɗataa sam.

⁵Onon derke'en boo, leestane mawɓe bana non. Koo moy fuu laatano deerɗum jaŋkiniiɗo ngam Deftere wi'i: “Allah ɗon dartano mantotooɓe, ammaa o ɗon mo'ana yaŋkiniiɓe.”

⁶Ngam man njaŋkine ko'e mooɗon haa Allah baawɗo, haa o ɓaŋgta on yaake o yiɗi.

⁷Ndoonte cakle mooɗon fuu, njowe ɗe dow maako, ngam o ɗon hakkilana on.

⁸Kakkile, ayne! Ngam konneejo mooɗon, waato Iblisa, ɗon bana mbarooga ubbanŋga tefanŋga mo o nyaama.

⁹Ndartane mo! Tabite nder nuɗɗinki mooɗon ngam on anndi deerɗiraaɓe nuɗɗinɓe nder duniyaaru fuu ɗon njara bone bana nii.

¹⁰Ammaa to on njari bone wakkati seɗɗa, marɗo mo'ere fuu, waato Allah bee hoore muuɗum laatinan on on timmuɓe, tabitɓe, semmbiɗɓe ɓe ndimmbataako. Kaŋko ewni on nder Yeesu Almasiihu haa keɓon tedduŋgal maako duumiiŋgal.

¹¹Baawɗe laatano mo haa foroy! Aamiina.

¹²Silas deerɗiraawo men, mo kooliimi ɗum walli yam winndango on bataakewol ngo'ol. Mi yiɗi semmbiɗingo on, mi yiɗi seedaago on on ɗon tabiti nder mo'ere Allah fakat.

¹³Jama'aare nuɗɗinɓe haa Baabila nde Allah suɓi bana o suɓiri on, hoofni on. Ɓiŋngel am Markus boo hoofni on.

¹⁴Koofnindire booɗɗum bana no ɗum haandani deerɗiraaɓe yiɗaaɓe. Salaaman laatano on fuu, onon jeyaaɓe Almasiihu!