Read Fulfulde 2 Piyer 1 Bible Online

2 Piyer 1 - Fulfulde bible

2 Piyer 1

¹Min Simon Piyer, maccuɗo e nelaaɗo Yeesu Almasiihu, mi ɗon winndana on, onon heɓɓe nuɗɗinki marki saman bana ki amin. On keɓri ki bee adilaaku Allah meeɗen e bee Yeesu Almasiihu, kisnoowo.

²Mo'ere e salaaman ɗuuɗana on ngam on anndi Allah e Yeesu, Jawmiraawo meeɗen.

³Allah hokkiri en koo ɗume bee baawɗe mum haa en ngeeɗa nder ngeendam e kulol maako. O hokki en ɗum ngam en anndi ewniiɗo en nder tedduŋgal mum e nder mbooɗeeŋga mum.

⁴Bana nii o waɗani en iinaaji ɓurɗi mawnugo e ɓurɗi saman haa on laato bana Allah wa'i nde nii on daɗi suunooji kalkooji gonɗi nder duniyaaru.

⁵Ngam maajum, tiine ngam haa nuɗɗinki mooɗon waŋgina mbooɗeeŋga e anndal e

⁶naŋgtaare e tiinaare e kulol Allah,

⁷yiide deerɗiraagu e yiide.

⁸To kuuje ɗe'e ɗon nder mooɗon, to ɗe ɗon ɓesda, ɗe laatinan on tiiɗɓe haa on njaha yeeso, on ɓesda anndugo Jawmiraawo men Yeesu Almasiihu.

⁹Ngam mo walaa ɗe, o yi'ataa daayiiɗum, o bumɗo, o yejjiti no o laɓɓinaama diga hakkeeji maako ɓooymaaji.

¹⁰Ngam maajum deerɗam'en, tiine tabitingo ewnaandu e cuɓki mooɗon. To on mbaɗi non, on pergataako sam.

¹¹Bana non on keɓan nastugo laamu nduumiiŋgu ngu Jawmiraawo e Kisnoowo meeɗen Yeesu Almasiihu bee feecaare.

¹²Ngam maajum, tum mi ɗon siftinora on kuuje ɗe'e. Koo to on anndi ɗe, koo to on ndari bee semmbe nder gooŋga ka on njaɓi,

¹³ammaa mi numi ɗum kaanduɗum mi findina on bee ciftinorki ki'i nde mi ɗon bee yoŋki tawon.

¹⁴Ngam mi anndi mi ɓadake accugo ɓanndu ndu'u, bana Jawmiraawo meeɗen Yeesu Almasiihu anndini yam bee laaɓɗum.

¹⁵Ngam maajum mi haɓdan waɗugo ko mi waawi fuu ngam on ciftora haala ka'a ɓaawo dilluki am.

¹⁶Naa bee kiccaaji ƴaggiiɗi min anndiniri on baawɗe e garki Jawmiraawo men Yeesu Almasiihu. Ammaa ngam bee gite amin min ngi'i maŋngu maako!

¹⁷O heɓi diga Allah Baabiraawo tedduŋgal e maŋngu yaake sawtu marɗo tedduŋgal maŋngal wi'no mo: “Oo woni Ɓiɗɗo am giɗaaɗo, mo mi ɗon seyoro ɗum.”

¹⁸Minin, min nani sawtu man iwi haa asama, nde min ɗonno bee maako haa hooseere seniinde.

¹⁹Min ɗon tabiti boo dow wolde annabi'en, min njaɓi nde bilaa seko. Onon boo kakkilane nde, ngam nde laati bana pittirla njaynanka nder nyiɓre haa nyalawma waɗa, haa jayŋgol horre fajiri yayna nder ɓerɗe mooɗon.

²⁰Aran, annde ɗu'um: Walaa passitiranɗo annabaaku gonŋgu nder defte bee numo muuɗum.

²¹Ngam walaa annabaaku meeɗi iwugo haa muuyo neɗɗo. Ammaa Ruuhu Ceniiɗo ɗowi yimɓe, ɓe mbolwi ko iwi diga Allah.