Read Fulfulde 2 Piyer 3 Bible Online

2 Piyer 3 - Fulfulde bible

2 Piyer 3

¹Yiɗaaɓe am, kaŋgol woni bataakewol ɗiɗaɓol ngol mi winndani on. Nder bataakeeji ɗiɗi fuu mi yiɗi ummingo numo wooɗŋgo nder mooɗon bee ciftinorki ki'i.

²Mi yiɗi on ciftora bolle ɗe annabi'en senaaɓe aarti mbolwi e umroore Jawmiraawo e Kisnoowo, nde nelaaɓe mooɗon ngaddani on.

³Aran, annde ɗu'um: Nder balɗe ragareeje jaancooɓe tokkiiɓe suunooji muuɗum'en ngaran,

⁴ɓe mbi'an: “O wi'no o waran, naa non na? Toy mo? Kaakiraaɓe meeɗen maayi jonta, ammaa walaa ko sannji, koo ɗume fuu ɗon bana haa fuɗɗam tageeki!”

⁵Ɓe ngooyti bee anniya no diga ɓooyma asama ɗon, lesdi boo iwi haa ndiyam. Allah tagri ndi diga ndiyam bee wolde maako,

⁶kadiboo o halkiri duniyaaru naane bee ndiyam, ɗam moɗi ndu.

⁷Bee wolde man nden asama e lesdi jonta ndesaama ngam yiite, nyannde nde Allah tammi waɗugo kiita e o nattina halluɓe.

⁸Yiɗaaɓe am, taa ngejjite ɗu'um: Ngam Jawmiraawo kam, nyalaade woore ɗon bana duuɓi ujineere e duuɓi ujineere boo ɗon bana nyalaade woore.

⁹Woɗɓe ɗon numa Jawmiraawo ɗon neeɓa waɗugo ko o iinino. Ammaa o ɗon munyana on ngam o yiɗaa koo moy halka, o yiɗi yimɓe fuu tuuba.

¹⁰Koo non fuu, nyalaade Jawmiraawo waran bana gujjo. Nyannde man, asamanji majjan bee hoolo kulniiŋgo, koode asama boo kalkiran bee yiite, lesdi bee ko woni ton fuu boo majjan[1].

¹¹Nde nii kuuje ɗe'e fuu kalkan bana non, on anndi haani on njooɗo nder senaare e nder kulol Allah,

¹²haa nyalaade Allah nde ndeenoton wara law. Nyannde man asamanji ngulete, kalkete, koode boo ɓolwan bee yiite.

¹³Ammaa Allah iini o hokkan en asamanji kesi e lesdi kesri haa adilaaku wonata. Kanjum en ndeenata.

¹⁴Ngam man yiɗaaɓe am, nde nii on ɗon ndeena ɗum, kaɓde jooɗaago on laaɓɓe, bilaa aybe yeeso Allah haa on njooɗo nder salaaman bee maako.

¹⁵Paame no munyal Jawmiraawo meeɗen heɓani on laawol hisugo. Pol, deerɗiraawo meeɗen giɗaaɗo, winndani on haala ka'a fodde hikma ka Allah hokki mo.

¹⁶O winndi ɗum nder bataakeeji maako fuu haa o wolwi dow haala ka'a. Woodi haalaaji caɗɗi nder maaji. Sooya-faamu'en e tampuɓe ɗon ngaylita maana maaji, bana no ɓe mbaɗata aayaaje defte Allah goɗɗe. Bana nii ɓe ɗon ngaddana ko'e maɓɓe halkere.

¹⁷Ammaa onon yiɗaaɓe, on ndeentinaama. Ngam man kakkile, taa pewe yedduɓe ɓe'e esta on haa on cotta diga nuɗɗinki tabitki ki on mari.

¹⁸Ammaa mawne nder mo'ere e anndal Jawmiraawo e Kisnoowo meeɗen Yeesu Almasiihu. Tedduŋgal laatano mo diga jonta haa foroy. Aamiina!