Read Fulfulde 1 Yuhanna 1 Bible Online

1 Yuhanna 1 - Fulfulde bible

1 Yuhanna 1

¹Min ɗon mbinndana on dow Wolde hokkannde ngeendam, wonnoonde diga fuɗɗam, ko min nani, ko min ngi'i bee gite amin, ko min ndaari e ko min meemi bee juuɗe amin.

²Ngam ngeendam man waŋgi, min ngi'i ɗam, min ɗon ceedo ɗam, min ɗon anndina on ngeendam nduumiiɗam ngonnooɗam kommbi Baabiraawo e ɗam waŋgani min.

³Ko min ngi'i e ko min nani, kanjum min anndinta on, onon boo, ngam haa on kawta bee amin nder kawtal amin bee Baabiraawo e bee Ɓiɗɗo mum Yeesu Almasiihu.

⁴Kanjum min ɗon mbinndana on ɗum ngam haa seyo meeɗen heewa.

⁵Ndaa kubaruwol ngol min nani haa Yeesu Almasiihu, kaŋgol min anndinta on: Allah o annoora, walaa nyiɓre nder maako koo seɗɗa.

⁶To en mbi'i en ɗon nder kawtal bee maako, ammaa en ɗon ngeeɗa nder nyiɓre, nden kam en pewi, en kuuwaay bana no gooŋga yiɗi.

⁷Ammaa to en ɗon ngeeɗa nder annoora bana Allah bee hoore mum ɗon nder annoora, nden kam en ngoodi kawtal caka meeɗen e ƴiiƴam Yeesu, Ɓiɗɗo maako boo laɓɓinan en diga hakkeeji fuu.

⁸To en mbi'i en ngalaa hakke, en pewani ko'e meeɗen, gooŋga walaa nder meeɗen.

⁹Ammaa to en mbaŋgini hakkeeji meeɗen yeeso Allah, kaŋko o koolaaɗo, adiliijo, o yaafanto en hakkeeji meeɗen, o laɓɓinan en diga sooynde adilaaku meeɗen fuu.

¹⁰To en mbi'i en mbaɗaay hakke, en pewni Allah, wolde maako walaa nder meeɗen.