Read Fulfulde Alkaali'en 10 Bible Online

Alkaali'en 10 - Fulfulde bible

Alkaali'en 10

¹Ɓaawo maayde Abimelek, Toola ɓii Pu'a taaniraawo Doodo ummi ngam hisna Isra'iila. O goɗɗo lenyol Issakar, jooɗiiɗo haa Samiira nder kooseeje Efrayim.

²Toola laati alkaaliijo Isra'iila duuɓi noogas e tati. Nden o maayi, ɓe uwi mo haa Samiira.

³Ɓaawo maayde Toola, Ya'ir, goɗɗo Gile'at, laati alkaaliijo Isra'iila duuɓi noogas e ɗiɗi.

⁴O woodi ɓiɓɓe worɓe cappanɗe tato wa'otooɓe bamɗe cappanɗe tati e ɓe ngoodi berniiji cappanɗe tati nder lesdi Gile'at. Haa hannde berniiji ɗi mbi'ete gure Ya'ir.

⁵Nde Ya'ir maayi, ɓe uwi mo haa Kamon.

⁶Fahin Isra'iila'en mbaɗi ko fottanaay Jawmiraawo. Ɓe ndewi Ba'alji e Asteraaji, non boo ɗowanteeɓe Siriya'en e Sidoni'en e Mo'abi'en e Ammooni'en e Filisti'en. Ɓe ngudini Jawmiraawo, ɓe cujidanaay mo.

⁷Ngam maajum Jawmiraawo tikkani Isra'iila'en, o hokki ɓe haa juuɗe Filisti'en e Ammooni'en.

⁸Duuɓi sappo e joweetati ɓe ɓilli Isra'iila'en fuu wonɓe haa fuunaaŋge maayo Urdun nder lesdi Amoori'en, nder Gile'at.

⁹Ammooni'en ɗonno eera maayo Urdun boo ngam haɓugo bee le'i Yahuuda e Benyamin e Efrayim. Isra'iila'en nastino ɓillaare naawnde.

¹⁰Ɓe tori Jawmiraawo ballal, ɓe mbi'i: “Min mbaɗi hakke, yaa Allah amin, ngam min ngudini ma, min ndewi Ba'alji.”

¹¹Jawmiraawo jaabi ɓe: “Yaake Misra'en e Amoori'en e Ammooni'en e Filisti'en e Sidoni'en e Amaleki'en e Ma'oni'en ɓilli on, on tori yam ballal. Kadi mi hisnaay on juuɗe maɓɓe na?

¹³Ammaa on ngudini yam, on ndewi ɗowanteeɓe woɗɓe. Ngam maajum mi hisnataa on fahin.

¹⁴Ndille! Tore ballal haa ɗowanteeɓe ɓe cuɓɗon, kamɓe ɓe kisna on ɓillaare mon.”

¹⁵Nden Isra'iila'en mbi'i Jawmiraawo: “Min mbaɗi hakke. Waɗ ko fottani ma, ammaa hisnu min nyalaade nde'e.”

¹⁶Ɓe itti ɗowanteeɓe jananɓe caka maɓɓe, ɓe njaggani Jawmiraawo. Ngam maajum o yurmini Isra'iila'en nder ɓillaare maɓɓe.

¹⁷Jama'aare Ammooni'en taaskani konu. Ɓe caŋngini nder lesdi Gile'at. Isra'iila'en boo mooɓi, ɓe caŋngini haa Mispa.

¹⁸Jama'aare, waato mawɓe Gile'at mbi'mbi'tiri: “Moy aartata haɓugo bee Ammooni'en? Kaŋko o laato hooreejo dow jooɗiiɓe nder Gile'at fuu.”