Read Fulfulde Alkaali'en 12 Bible Online

Alkaali'en 12 - Fulfulde bible

Alkaali'en 12

¹Yimɓe Efrayim mooɓti, ɓe eeri maayo Urdun, ɓe njehi haa Safon. Ɓe mbi'i Yefta: “Koni a yehi a haɓoyi bee Ammooni'en, ammaa a ewnaaki min haa en njahda? Min njahan min ngula ma bee suudu ma fuu.”

²Yefta jaabi ɓe: “Min e yimɓe am min mbaɗi haɓre saatunde bee Ammooni'en. Min ewni on, ammaa on kisnaay yam juuɗe maɓɓe.”

³Nde ngi'mi on ngiɗaa wallugo yam, mi taaskani maayugo, mi yehi, mi haɓi bee Ammooni'en. Jawmiraawo hokki yam ɓe. Kadi, ngam ɗume ngarɗon honugo yam hannde?

⁴Yefta mooɓti worɓe Gile'at fuu, haɓi bee worɓe Efrayim, jaali ɓe. Yimɓe Efrayim mbi'no: “Onon yimɓe Gile'at, onon on yimɓe Efrayim dogguɓe lesdi Efrayim ngam hisnugo ko'e mooɗon haa lesdi Efrayim e Manassa.”

⁵Yimɓe Gile'at njooɗi haa eerorɗe maayo Urdun yahugo lesdi Efrayim. To goɗɗo Efrayim dogguɗo wari wi'i: Acceeɗam mi eero, worɓe Gile'at ɗon ƴama mo: “A goɗɗo Efrayim na?” To o wi'i: “Aa'a”,

⁶ɓe mbi'a mo: “Wi': Cibbolet!” To o wi'i: “Sibbolet”, ngam o waawaay wolwugo ɗum laaɓɗum, ɓe naŋnga mo, ɓe mbara mo ton haa eerorde Urdun. Saa'i maajum worɓe Efrayim ujine cappanɗe nayo e ɗiɗo (42.000) mbaraama.

⁷Bana nii Yefta laatori alkaaliijo Isra'iila duuɓi joweego. Nden o maayi, ɓe uwi mo nder berniwol gootol caka berniiji Gile'at.

⁸Ɓaawo maayde Yefta, Ibsaan mo Baytilaama laati alkaaliijo Isra'iila.

⁹O woodi ɓiɓɓe worɓe cappanɗe tato e ɓiɓɓe rewɓe cappanɗe tato. O te'ni ɓiɓɓe maako rewɓe haa worɓe ɓe ngonaay danygol maako. O te'ani ɓiɓɓe maako worɓe boo rewɓe ɓe ngonaay danygol maako. O alkaaliijo Isra'iila duuɓi joweeɗiɗi.

¹⁰Nden o maayi, ɓe uwi mo haa Baytilaama.

¹¹Ɓaawo maayde Ibsaan, Elon mo lenyol Zabulon laati alkaaliijo Isra'iila, duuɓi sappo.

¹²Nden o maayi, ɓe uwi mo haa Eloon haa Ayyalon nder lesdi Zabulon.

¹³Ɓaawo maayde Elon, Abdon ɓii Hillel, goɗɗo Piraton laati alkaaliijo Isra'iila.

¹⁴O woodi ɓiɓɓe worɓe cappanɗe nayo e taaniraaɓe worɓe cappanɗe tato, ɓe wa'iiɓe bamɗe cappanɗe joweeɗiɗi. Abdon ɓii Hillel laati alkaaliijo Isra'iila duuɓi joweetati.

¹⁵Nden o maayi, ɓe uwi mo haa Piraton nder lesdi Efrayim, nder lesdi kooseeje Amaleki'en.