Read Fulfulde Alkaali'en 13 Bible Online

Alkaali'en 13 - Fulfulde bible

Alkaali'en 13

¹Fahin Isra'iila'en mbaɗi ko fottanaay Jawmiraawo. Ngam maajum o hokki ɓe haa juuɗe Filisti'en duuɓi cappanɗe nayi.

²Saa'i man woodi goɗɗo lenyol Dan, iwɗo Cor'a mo innde mum Manooha. Debbo maako dimaro, o meeɗaay danyugo.

³Malaa'ikaajo Jawmiraawo waŋgani debbo oo, wi'i mo: “Mi anndi a meeɗaay danyugo ɓiŋngel ngam a dimaro. Ammaa jonta a reedan, a danyan ɓiɗɗo gorko.

⁴Reenta diga jonta, taa yar inaboojam malla nguykinoojam ngoɗɗam, taa nyaam karamɗum boo,

⁵ngam reedu ndu e ɓesnuki ɓiɗɗo ma oo. Taa laɓu gaasa hoore maako sam, ngam o cenaaɗo Allah diga o danyaaka. Kaŋko fuɗɗata hisnugo Isra'iila'en e juuɗe Filisti'en.”

⁶Debbo nasti saare, wi'i gorum: “Goɗɗo Allah wari haa am. Bana mi yi'iri mo nii, goɗɗo wi'an o malaa'ikaajo Allah, o kulniiɗo masin. Mi ƴamaay mo haa o iwoy, o anndinaay yam innde maako boo.

⁷O wi'i yam a reedan, a danyan ɓiɗɗo gorko. O umri yam taa mi yara inaboojam malla nguykinoojam ngoɗɗam, taa mi nyaama karamɗum, ngam ɓiɗɗo oo laatoto cenaaɗo ngam Allah diga o siwaa danyeego haa yotto maayde maako.”

⁸Manooha tori Jawmiraawo: “Yaa Jawmiraawo, goɗɗo Allah mo nelɗa, accu o wara haa amin fahin, o yecca min ko min mbaɗanta ɓiŋngel danyeteeŋgel.”

⁹Allah jaɓi tornde Manooha nde'e, malaa'ikaajo maako wari fahin haa debbo Manooha, saa'i debbo ɗon jooɗi haa ngesa. Goriiko wondaay bee maako,

¹⁰ngam maajum o yaawɗi, o wi'i mo: “Ndaa, goɗɗo garɗo haa am nyannde go, waŋgani yam fahin.”

¹¹Manooha ummi, tokki debbo muuɗum haa goɗɗo man, o ƴami mo: “An wolwani debbo am na?” O jaabi: “Ooho, ɗum min.”

¹²Manooha wi'i: Booɗɗum. To bolle ma ngooŋɗi, umrooje ɗeye min tokkoto ko laarani ɓiŋngel ngel? Ɗume min ngaɗanta ngel?

¹³Malaa'ikaajo Jawmiraawo jaabi Manooha: “Sey debbo ma daayo ko mi limtani mo fuu:

¹⁴Taa o metta ko iwi haa inabohi fuu, taa o yara inaboojam malla njaram nguykinoojam, taa o nyaama karamɗum. Sey o hakkilana umrooje am fuu booɗɗum.”

¹⁵Nden Manooha wi'i malaa'ikaajo Jawmiraawo: “Reenu seɗɗa min nyaancane[16] jawgel mbeewa.”

¹⁶Malaa'ikaajo jaabi: “Koo to mi reeni, mi nyaamataa nyaamdu ndu a taaskantam. Ammaa to a yiɗi hokkugo jawgel man, lii'ana ngel Jawmiraawo guleteeŋgel.” Manooha faamaayno ɗum malaa'ikaajo Jawmiraawo.

¹⁷Manooha wi'i mo: “Anndin min innde ma ngam haa min teddina ma to bolle ma ngooŋɗi.”

¹⁸Malaa'ikaajo Jawmiraawo jaabi: “Ngam ɗume ƴamata innde am? Nde kaayeefiire.”

¹⁹Manooha hoo'i jawgel mbeewa e dokkal nyaamdu, lii'ani ɗum Jawmiraawo dow tapaare. Jawmiraawo waɗi kaayeefi yaake Manooha e debbo muuɗum ɗon ndaara.

²⁰Yaake ɗemŋgal yiite ummi haa hirsirde man dilli dow, Manooha e debbo mum ngi'i malaa'ikaajo Jawmiraawo ɗon lorto haa asama nder ɗemŋgal yiite. Nden ɓe cujidi.

²¹Ɓe meetaay yi'ugo malaa'ikaajo man. Manooha faami ɗum malaa'ikaajo Jawmiraawo.

²²Manooha wi'i debbo mum: “Fakat en maayan, ngam en ngi'i Allah.”

²³Ammaa debbo maako wi'i mo: “To Jawmiraawo ɗaɓɓino mbarugo en, o jaɓataano nguleteeŋga e dokkal nyaamdu haa juuɗe men, o yi'nataano en kuuje ɗe'e fuu, o anndintaano en haala ka boo jonta.”

²⁴Debbo Manooha danyi ɓiɗɗo gorko, inndi mo Samson. Ɓiŋngel man mawni, Jawmiraawo barkiɗini ngel.

²⁵Yaake o ɗonno haa saŋngeere Dan hakkunde Cor'a bee Estawol, Ruuhu Jawmiraawo fuɗɗi huuwugo nder maako.