Read Fulfulde Alkaali'en 14 Bible Online

Alkaali'en 14 - Fulfulde bible

Alkaali'en 14

¹Nyalaade woɗnde Samson yehi Timna, ton o yi'i paanyo debbo Filistiijo.

²O hooti, o wi'i baaba e daada maako: “Caka Filisti'en haa Timna mi yi'i paanyo debbo, te'aneeɗam mo.”

³Saaro'en maako ƴami mo: “Walaa paanyo debbo nder banndiraaɓe ma malla nder ummaatoore meeɗen na? Koni ɗaɓɓata debbo haa Filisti'en saadooni'en ɓe'e?” Samson jaabi baaba muuɗum: “Kaŋko fottani yam, te'anam mo!”

⁴Saaro'en Samson anndaa nii ɗum Jawmiraawo waɗi yelo ngo nder ɓiɗɗo maɓɓe haa o heɓa dabare haɓugo bee Filisti'en. Ngam saa'i maajum Filisti'en ɗon laamano Isra'iila'en.

⁵Nde Samson e saaro'en muuɗum ɗon njaha Timna, ɓe ɗon tokki laawol kommbi gese inabooje Timna, mbarooga wurti bee ubbaaŋgo, fotti bee Samson.

⁶Ruuhu Jawmiraawo naŋngi Samson, o naŋngi mbarooga man o sampiti nga bee juuɗe cooke, bana goɗɗo sampitirta jawgel. Ammaa o wi'aay saaro'en maako ko o waɗi.

⁷Nden Samson yehi, wolidi bee paanyo debbo go, paanyo boo fottani mo.

⁸Nyalɗe seɗɗa ɓaawoɗon o yehi fahin ngam haa o ɓaŋga mo. O seli laawol haa o laara caaɗŋgu mbarooga go. O yi'i udumre nyaaki e njumri ɗon nder caaɗŋgu man.

⁹O hoo'i njumri bee juŋngo maako, o ɗon nyaama saa'i o ɗon yaha dow laawol. O yehi haa saaro'en maako, o hokki ɓe, kamɓe boo ɓe nyaami. Ammaa o yeccaay ɓe o njumti njumri man haa caaɗŋgu mbarooga.

¹⁰Baaba Samson yehi haa saare paanyo debbo go, Samson boo taaski nyaamduuji ɓaŋgal ton, bana sukaaɓe mboowi waɗugo.

¹¹Nde Filisti'en ngi'i Samson, ɓe neli sukaaɓe cappanɗe tato ngam haa ɓe ngonda bee maako.

¹²Samson wi'i ɓe: “Mi waɗanan on annditanamwol. To on keɓti ngol, on annditini yam ngol nder nyalɗe juulde joweeɗiɗi, nden kam mi hokkan on toggooje cappanɗe tati e ngapaleeji cappanɗe tati.

¹³Ammaa to on mbaawaay waŋginango yam ngol, nden kam koo moy mooɗon hokkammi toggoore e ngapaleewol.” Ɓe njaabi mo: “Waɗ annditanamwol ma haa min nana ngol.”

¹⁴Samson wi'i ɓe: “Nyaamdu wurtake haa nyaamoojum. Dakam wurtake haa cemmbiɗɗum.” Ɗume ɗum yiɗi wi'go? Haa ragare nyalɗe tati sukaaɓe keɓtaay ko saawi nder annditanamwol man tawon.

¹⁵Nyannde joweeɗiɗawre ɓe mbi'i debbo Samson: “Ƴoyru gorko ma, haa o waŋginana min ko saawi nder annditanamwol man, to naa non min ngulete, an e saare baaba ma. Malla on ewni min ngam haa on ngartira min talaka'en?”

¹⁶Debbo Samson yehi bee bojji haa goriiko, o wi'i mo: “A yiɗaa yam, a ɗon wanyammi! A waɗani ummaatoore am annditanamwol, ammaa a anndinaay yam ko saawi nder maagol.” Samson jaabi mo: “Koo saaro'en am ma mi anndinaay ɓe ɗum. Ngam ɗume sey mi anndine ɗum an?”

¹⁷Ammaa debbo maako tokki woyugo nyalɗe juulde man joweeɗiɗi fuu. Nyannde joweeɗiɗawre Samson faamtini mo, ngam debbo daami mo. Nden debbo yehi, anndini ummaatoore mum ko saawi nder annditanamwol.

¹⁸Nyannde joweeɗiɗawre man, hiddeko naaŋge muta, yimɓe berniwol ngari haa Samson, ɓe mbi'i mo: “Ɗume ɓuri njumri welugo? Ɗume ɓuri mbarooga semmbe?” Samson wi'i ɓe: “To on ndemraayno wiige am, on keɓtataano annditanamwol am.”

¹⁹Nden Ruuhu Jawmiraawo nasti nder Samson, o jippi haa Askalon. O mbari ton worɓe cappanɗe tato, o hooci limce maɓɓe, o hokki ɗe heɓtuɓe annditanamwol go. Nden o lorti haa baaba maako, o ɗon heewi tikkere.

²⁰Nden ɓe te'ni debbo maako haa waloojo maako.