Read Fulfulde Alkaali'en 17 Bible Online

Alkaali'en 17 - Fulfulde bible

Alkaali'en 17

¹Woodino goɗɗo innde maako Mika o ɗonno jooɗi haa kooseeje.

²Nyannde feere o wi'i daada maako: “A ɗon siftora nde ɓe ngujji ma ceede cardi ujineere e teemerre (1.100), nden a naali gujjo man gite am. Booɗɗum, ndaa cardi man, min wujji ndi.” Nden daada maako wi'i: “Jawmiraawo barkiɗine ɓiŋngel am.”

³Mika hokkiti daada maako ceede cardi ujineere e teemerre (1.100) go, daada maako wi'i: “Mi seni cardi ndi ngam Jawmiraawo ngam waɗugo suura cehaaka cuddiraaka cardi, ngam hayru ma. Mi lornante cardi ndi jonta.”

⁴Nde o hokkiti daada maako cardi ndi'i, daada maako itti ceede cardi teemeɗɗe ɗiɗi, yahri ɗe haa tappoowo cardi. Kaŋko o waɗi lawru sehaandu e lawru cardi ɓolinaandi. Nden ɓe ndarni ɗi nder suudu Mika.

⁵Gorko bi'eteeɗo Mika oo, o woodi suudu ɗowanteeɗo. O waɗi ɗanciki limanjo non boo labbi goɗɗi, nden o hoo'i gooto nder ɓiɓɓe maako, o waɗi mo limanjo.

⁶Zamanu maajum walaa laamiiɗo haa Isra'iila, koo moy ɗon waɗa ko fottani ɓernde mum.

⁷Nden woodino derkeejo Lewiijo koɗo haa Baytilaama, nder lesdi lenyol Yahuuda.

⁸O wurti Baytilaama, ngam ɗaɓɓitugo jooɗorde haa pellel feere. Nde o ɗon yaha, o wari haa saare Mika nder kooseeje Efrayim.

⁹Mika ƴami mo: “Toy iwɗaa?” O jaabi: “Mi Lewiijo jooɗiiɗo haa Baytilaama nder Yahuuda, mi ɗon ɗaɓɓita pellel jooɗaago.”

¹⁰Mika wi'i mo: “Jooɗa haa am, laata limanjo saare am e laata carwotooɗo yam. Hitaande fuu mi hokkete ceede cardi sappo, a heɓan boo limce e nyaamdu he'anndu ma.”

¹¹Lewiijo oo jaɓi jooɗaago haa saare Mika. O jogi mo bana ɓiyiiko.

¹²Mika waɗi mo limanjo mum, o jo'ini mo nder saare maako.

¹³Mika wi'i: “Jonta mi woodi limanjo Lewiijo haa am, ngam maajum mi anndi fakat Jawmiraawo woonantam.”