Read Fulfulde Alkaali'en 2 Bible Online

Alkaali'en 2 - Fulfulde bible

Alkaali'en 2

¹Malaa'ikaajo Jawmiraawo wari diga Gilgal, yehi haa Bokim. O wi'i Isra'iila'en: “Mi wurtini on lesdi Misra e mi yahri on haa lesdi ndi mi iinani baabiraaɓe mon. Mi wi'i: Mi fiistataa alkawal am bee mooɗon haa foroy.

²Mi umrunooɗo on, taa kaɓɓe alkawal bee yimɓe lesdi ndi, ngibbine kirsirɗe maɓɓe. Ammaa on ɗowtanaaki yam. Ɗume mbaɗɗon ɗo?

³Ngam maajum mbi'mi: Mi riiwataa ɓe yeeso mooɗon. Ɓe ngonan kommbi mooɗon, labbi maɓɓe boo laatanto on tuuforgol.”

⁴Nde malaa'ikaajo Jawmiraawo wolwi bolle ɗe'e, Isra'iila'en mboyi bee sawtu.

⁵Ɓe inndi nokkuure man Bokim[2]. Ton ɓe lii'ani Jawmiraawo kirsaaɗi.

⁶Ɓaawo man Yosuwa jaɓɓiti ummaatoore, Isra'iila'en ndilli marugo lesdi ndi, koo moy jooɗi haa geɗal maral muuɗum.

⁷Yaake Yosuwa geetono, ɓe kuuwani Jawmiraawo. Koo ɓaawo maayde maako boo ɓe tokki huuwango mo yaake ndotti'en Isra'iila ɗon ngeeɗi. Kamɓe ɓe ngi'no kuuɗe Jawmiraawo mawɗe ɗe o huuwani Isra'iila.

⁸Yosuwa ɓii Nuuna, jaggiiɗo Jawmiraawo maayi, duuɓi maako teemerre e sappo (110).

⁹Ɓe uwi mo haa maral maako haa Timnat-Heres nder kooseeje Efrayim, haa woyla[3] hooseere Ga'as.

¹⁰Nden yimɓe yidere maako boo maayidi. Yidere tokkunde anndaa Jawmiraawo e kuuɗe ɗe o huuwanino Isra'iila'en.

¹¹Isra'iila'en mbaɗi ko fottanaay Jawmiraawo, ngam ɓe ndewi Ba'alji[4].

¹²Ɓe ngudini Jawmiraawo, Allah mo baabiraaɓe maɓɓe, gurtinɗo ɓe lesdi Misra. Ɓe tokki ɗowanteeɓe jananɓe ɓe ummaatooje taariiɗe ɓe, ɓe ndewi ɓe. Bana nii ɓe tikkiniri Jawmiraawo.

¹³Ɓe ngudini Jawmiraawo, ɓe ndewi Ba'alji e Asteraaji[5].

¹⁴Ngam maajum Jawmiraawo tikkani Isra'iila'en. O hokki ɓe haa jaɓtooɓe, ɓe njaɓti ɓe kuuje, o hokki ɓe haa konne'en taariiɓe ɓe, haa ɓe mbaawaay dartanaago ɓe.

¹⁵Nde ɓe njehi konu fuu, Jawmiraawo honi ɓe, nastini ɓe sarru bana o wi'no ɓe e o hunani ɓe. Ɓe nasti ɓillaare mawnde.

¹⁶Nden Jawmiraawo suɓani ɓe alkaali'en, ardini ɓe, ɓe kisni ɓe juuɗe jaɓtooɓe ɓe.

¹⁷Ammaa Isra'iila'en ɗowtanaaki alkaali'en muuɗum'en, ɓe ɗakkotiri bee ɗowanteeɓe woɗɓe, ɓe cujidani ɓe. Bana nii law ɓe ngayliti, ɓe acci laawol ngol baabiraaɓe maɓɓe ɗowtaniiɓe umrooje Jawmiraawo tokki, ɓe tokkaaki kuuɗe maɓɓe.

¹⁸Nde Jawmiraawo suɓani ɓe alkaali fuu, o ɗon wondi bee alkaali man, o ɗon hisna Isra'iila'en diga baawɗe konne'en muuɗum'en yaake alkaaliijo oo o geeto. Ngam Jawmiraawo yurmini ɓe ngam uumaali maɓɓe daliila ɓillanɓe e torranɓe ɓe.

¹⁹Ammaa yaake alkaaliijo man maayi, ɓe puɗɗita waɗugo kalluɗum ko ɓuri baabiraaɓe maɓɓe. Ɓe tokki ɗowanteeɓe jananɓe, ɓe cujidani ɓe, ɓe ndewi ɓe. Ɓe accaay kuuɗe maɓɓe kalluɗe e tuurtol maɓɓe.

²⁰Nden Jawmiraawo tikkani Isra'iila'en, wi'i: “Yimɓe ummaatoore nde'e piisti alkawal ngal kaɓɓumi bee baabiraaɓe maɓɓe haa ɓe ɗowtano ngal, ɓe ɗowtanaaki yam.

²¹Ngam maajum min boo mi tokkataako riiwugo ummaatooje luttuɗe nder lesdi saa'i Yosuwa maayi.

²²Mi huuwtiniran ummaatooje man ngam haa mi foonda Isra'iila'en, mi yi'a, to ɓe tokkoto laawol am bana baabiraaɓe maɓɓe malla ɓe tokkataako.”

²³Jawmiraawo acci ummaatooje ɗe njooɗi nder lesdi. O hokkaay ɗe Yosuwa, o riiwaay ɗe law ɓaawo maayde Yosuwa boo.