Read Fulfulde Alkaali'en 3 Bible Online

Alkaali'en 3 - Fulfulde bible

Alkaali'en 3

¹Ndaa ummaatooje ɗe Jawmiraawo acci ɗon njooɗi nder lesdi ngam foondugo Isra'iila'en ɓen anndaa konu ngam nyaamugo lesdi Kanaana.

²O yiɗi gide kese ɗe'e, ɓen meeɗaay yahugo konu tawon, ɓe paama e ɓe ekkito waɗugo konu tan.

³Laamiiɓe Filisti'en njowo e Kanaani'en fuu e Sidoni'en e Hewi'en njooɗi haa kooseeje Libanon, diga hooseere Ba'al-Hermoon haa yotti nastirde Hamat.

⁴Jawmiraawo yiɗi huuwtinirgo ɓe ngam foondugo Isra'iila'en, ngam anndugo to Isra'iila'en ɗowtanto umrooje ɗe o umri baabiraaɓe maɓɓe bee hunnduko Muusa.

⁵Bana nii Isra'iila'en njooɗi caka Kanaani'en e Heti'en e Amoori'en e Perezzi'en e Hewi'en e Yebusi'en.

⁶Ɓe te'i ɓiɓɓe maɓɓe rewɓe, kamɓe boo ɓe te'ni ɓe ɓiɓɓe maɓɓe rewɓe, ɓe ndewi ɗowanteeɓe maɓɓe boo.

⁷Isra'iila'en mbaɗi ko fottanaay Jawmiraawo Allah muuɗum'en, ɓe ngejjiti mo, ɓe ndewi Ba'alji e Asteraaji.

⁸Ngam maajum Jawmiraawo tikkani ɓe, hokki ɓe haa juŋngo Kusan-Risatayim, laamiiɗo Mesopotamiya. Ɓe njaggani mo duuɓi joweetati.

⁹Nden Isra'iila'en tori Jawmiraawo ballal. Jawmiraawo suɓani ɓe goɗɗo kisnoowo ɓe: Otniyel ɓii Kenas, minyiraawo Kaaleb hisni ɓe.

¹⁰Ruuhu Jawmiraawo ɗon dow Otniyel, o laati alkaaliijo Isra'iila. O wurti ngam haɓugo, Jawmiraawo hokki mo jaalorgal dow Kusan-Risatayim, laamiiɗo lesdi Siriya.

¹¹Ɓaawoɗon konu waɗaay nder lesdi duuɓi cappanɗe nayi. Nden Otniyel ɓii Kenas maayi.

¹²Fahin Isra'iila'en mbaɗi ko fottanaay Jawmiraawo. Ngam maajum o semmbiɗini Egilon, laamiiɗo Mo'ab, dow maɓɓe.

¹³Egilon mooɓti Ammooni'en e Amaleki'en, ɓe njehi, ɓe njaali Isra'iila'en, ɓe nyaami Yeriko Berniwol-Dibinooje.

¹⁴Isra'iila'en njaggani Egilon laamiiɗo Mo'ab duuɓi sappo e joweetati.

¹⁵Nden ɓe tori Jawmiraawo ballal. Jawmiraawo suɓani ɓe goɗɗo kisnoowo ɓe: Ehuudi, goɗɗo agulaajo, ɓii Gera, nder lenyol Benyamin. Isra'iila'en neldani laamiiɗo Mo'ab dokkal bee juŋngo maako.

¹⁶Ehuudi waɗani hoore mum kaafahi ki mbeldiiji ɗiɗi, njuutirka maaki baakin reeta meetir. O haɓɓi ki nder limce maako haa daŋngo maako nyaamo.

¹⁷Nden o yahrani Egilon dokkal man. Egilon o payɗo masin.

¹⁸Nde o timmini hokkugo Egilon dokkal go, o ɗofti yimɓe ɓe ndoondino dokkal man.

¹⁹Ɓe njotti haa labbi kaa'e cehaaɗe kommbi Gilgal, Ehuudi kam lori ɓaawo, o wari o wi'i laamiiɗo: “Barkaama, mi waddani ma kubaruwol sirriiwol.” Laamiiɗo wi'i huuwanooɓe mo: “Ngurte!” Darinooɓe kommbi maako fuu ngurti, ɓe accidi ɓe.

²⁰Yaake man o ɗonno jooɗi nder suudu dowru, feewndu ndu ɓe taaskani mo feere maako. Ehuudi ɓaditi mo, wi'i: “Mi woodi wolde iwnde diga Allah. Haa mi wi'e.” Laamiiɗo Egilon ummi dow koromwal laamu mum.

²¹Ehuudi forti juŋngo mum nano, losi kaafahi haa wuttudu mum nyaamru, yuwi reedu laamiiɗo.

²²Ki muti bee jogorde maaki fuu, ɓellere suddi ki ngam Ehuudi ɗoofaay ki diga reedu maako, nden o wurtori ɓaawo ɓaawo.

²³Ehuudi wurti gal zawleeru, nden o maɓɓi dammuɗe suudu dowru e o huɓli bee kuɓlirɗum man.

²⁴Nden o dilli, jaggiiɓe laamiiɗo ngarti, ɓe tawi ndaa, dammuɗe kuɓlaama. Ɓe numi laamiiɗo dilli waɗoygo haaje haa suudu cakaaru, feewndu.

²⁵Ɓe ndeeni haa ɓe comi, ammaa o maɓɓitaay dammugal suudu. Nden ɓe koo'i maɓɓitirgel, ɓe maɓɓiti. Ndaa, jaagorɗo maɓɓe ɗon waali haa lesdi o maayɗo.

²⁶Wakkati ɓe ɗon ndeeni, Ehuudi daɗi, saali labbi kaa'e cehaaɗe, yotti Se'iira.

²⁷Nde o nasti ton, o fuufi luwal konu nder kooseeje Efrayim ngam haa o ewno Isra'iila'en. Ɓe ndiirti kooseeje, kaŋko o ardi ɓe.

²⁸O wi'i ɓe: “Njokkeeɗam, ngam Jawmiraawo hokki on konne'en mooɗon Mo'abi'en.” Ɓe ndiirti, ɓe tokki mo, ɓe kooci eerorɗe maayo Urdun gal lesdi Mo'ab, ɓe accaay koo gooto eero.

²⁹Nyannde maajum ɓe mbari Mo'abi'en baakin ujine sappo, ɓe fuu ɓe worɓe semmbiɗɓe, waawɓe konu. Walaa koo gooto daɗi.

³⁰Bana nii Mo'abi'en leesniri ko'e muuɗum'en les Isra'iila'en. Ɓaawoɗon konu waɗaay nder lesdi, baakin duuɓi cappanɗe joweetati.

³¹Ɓaawo Ehuudi, Samgar ɓii Anat laati alkaaliijo. O mbari Filisti'en teemeɗɗe njoweego (600) bee sawru gaynaako na'i. Kaŋko boo o hisni Isra'iila.