Read Fulfulde Alkaali'en 4 Bible Online

Alkaali'en 4 - Fulfulde bible

Alkaali'en 4

¹Ɓaawo maayde Ehuudi, Isra'iila'en tokki waɗugo ko fottanaay Jawmiraawo.

²Ngam maajum Jawmiraawo hokki ɓe haa juŋngo Yabin, laamiiɗo Kanaani'en haa Hacoor. Mawɗo honooɓe Yabin, ɗum Sisera, jooɗiiɗo haa Haroseet-Goyim.

³Yabin woodi mootaaji pucci teemeɗɗe joweenayi (900). O ɓilli Isra'iila'en bee caatal haa waɗi duuɓi noogas. Nden kamɓe boo ɓe tori Jawmiraawo ballal.

⁴Saa'i man, Deboora, debbo Lappidot wonno annabiijo, alkaaliijo nder Isra'iila.

⁵O ɗonno jooɗo les dibinoohi, ɓe inndi ki dibinoohi Deboora, hakkunde Rama e Baytila, nder lesdi kooseeje Efrayim. Haa ton Isra'iila'en ɗonno njaha ngam o ta'ana ɓe kiita.

⁶Nyannde feere Deboora neli, ewni Barak, ɓii Abino'am mo Keedes nder lesdi Neftali. O wi'i mo: “Ndaa ko Allah Jawmiraawo Isra'iila umri ma: Yah dow hooseere Taboora, ewna worɓe ujine sappo (10.000) nder le'i Neftali e Zabulon.

⁷Min mi waddan Sisera, mawɗo honooɓe Yabin, kaŋko e mootaaji pucci maako e mooɓe maako fuu, ngam haɓre bee maaɗa haa maayo Kison. Mi hokkan mo haa juŋngo ma.”

⁸Barak wi'i Deboora: “To a yahdan bee am, mi yahan. Ammaa to a yahdataa bee am, min boo mi yahataa.”

⁹Deboora jaabi mo: “Fakat, mi yahdan bee ma. Ammaa haa laawol ngol njahrata, a heɓataa tedduŋgal, ngam haa juŋngo debbo, Jawmiraawo hokkata Sisera.” Nden Deboora ummi, yahdi bee Barak haa Keedes.

¹⁰Barak ewni yimɓe Zabulon e yimɓe Neftali haa Keedes. Worɓe ujine sappo (10.000) ngari, tokki mo, Deboora boo yahdi bee maako.

¹¹Heber, Keniijo ɗonno haa kommbi Keedes. O senndirino bee Keni'en danygol Hobab esiraawo Muusa, o darnino suudu laymaaru maako kommbi lekki makki haa Sa'ananim.

¹²Sisera nani Barak, ɓii Abino'am wa'ake dow hooseere Taboora.

¹³O mooɓti mootaaji njamndi pucci ɗi o mari fuu teemeɗɗe joweenayi (900), non boo yimɓe maako wonɓe diga Haroseet-Goyim haa yotti maayo Kison fuu.

¹⁴Deboora wi'i Barak: “Umma, Jawmiraawo ɗon arde. Hannde o hokkete Sisera.” Barak diirti hooseere Taboora, kaŋko e worɓe honooɓe maako ujine sappo ɓaawo maako.

¹⁵Jawmiraawo jiiɓi hakkiilooji Sisera e jama'aare konu mum fuu e mootaaji pucci mum fuu, kulol maŋngol naŋngi ɓe, o mbardi ɓe fuu bee kaafaaje haa yeeso Ba'al. Sisera jippi moota pucci mum, doggi bee kosɗe.

¹⁶Barak taasni mootaaji pucci e jama'aare konu haa yotti Haroseet-Goyim. Ɓe mbari jama'aare Sisera fuu bee kaafaaje, walaa koo gooto lutti.

¹⁷Sisera doggi haa suudu laymaaru Ya'el, debbo Heber Keniijo, ngam salaaman ɗonno hakkunde Yabin, laamiiɗo Hacoor e saare Heber.

¹⁸Ya'el wurti, jaɓɓi Sisera, wi'i mo: “Barkaama, nastu, nastu suudu am, taa hul.” Sisera nasti suudu laymaaru maako, Ya'el suddi mo.

¹⁹Sisera wi'i mo: “Hokkam ndiyam seɗɗa, mi ɗomɗi.” Debbo maɓɓiti kanyakanyaawu[6] kosam, yarni mo, suddi mo fahin.

²⁰Sisera wi'i mo: “Dara haa dammugal suudu. To goɗɗo wari ƴami ma: Goɗɗo ɗon haa ɗo na? Jaaba mo: Walaa.”

²¹Sisera somi masin, o ɗaani ɗoyŋgol tedduŋgol. Ya'el hoo'i tappirɗum e tiggirgal laymaaru, o ɓaditi Sisera bee sirri, o sumpiti mo hoore bee tiggirgal man haa ngal nasti lesdi. Ɗon nii Sisera maayi.

²²Ndaa Barak ɗonno taasna Sisera. Nde o yotti ton, Ya'el wurti ngam jaɓɓaago mo, wi'i mo: “War, mi holle goɗɗo mo a tefata.” Barak nasti suudu, ndaa, Sisera ɗon waali haa lesdi o maayɗo, tiggirgal boo ɗon nder hoore maako.

²³Bana nii Jawmiraawo leesniri Yabin, laamiiɗo Kanaani'en yeeso Isra'iila'en.

²⁴Ɓaawoɗon ɓe ɗon ɓesda teddango mo haa ɓe nattini mo.