Read Fulfulde Alkaali'en 9 Bible Online

Alkaali'en 9 - Fulfulde bible

Alkaali'en 9

¹Abimelek ɓii Yerub-Ba'al yehi haa Sikem ngam o yeewtida bee kaawu'en maako e yimɓe saare maama maako fuu. O wi'i ɓe:

²“Mbolwane ardiiɓe Sikem fuu, ƴame ɓe: Ɗume ɓuranta on? Worɓe cappanɗe njoweeɗiɗo, ɓiɓɓe Yerub-Ba'al fuu laamano on na malla goɗɗo gooto tan? Ciftore min woni goɗɗo danygol mon.”

³Kaawu'en maako mbolwani ardiiɓe Sikem bolle ɗe'e fuu. Ɓerɗe maɓɓe ngayliti haa Abimelek, ngam ɓe numi: “O deerɗiraawo meeɗen.”

⁴Ɓe ndokki mo ceede cardi cappanɗe joweeɗiɗi iwɗe haa suudu Ba'al-Berit. Bee ceede man Abimelek yoɓi worɓe meere'en, elewɓe ɓe tokki mo.

⁵O yehi haa saare baaba maako haa Ofra. Haa ton o mbari deerɗiraaɓe maako, ɓiɓɓe Yerub-Ba'al cappanɗe njoweeɗiɗo fuu, dow hayre woore. Walaa mo lutti, sey Yotam, gaajiijo Yerub-Ba'al, ngam o nyukki.

⁶Ardiiɓe Sikem e Bayti-Millo fuu mooɓi haa lekki makki kommbi hayre darnaande nder Sikem, ɓe mbaɗi Abimelek laamiiɗo maɓɓe.

⁷Yotam nani haala ka'a. O wa'i dow yeereere hooseere Gerisiima, o wooki bee semmbe, o wi'i: “Onon ardiiɓe Sikem, to on ngiɗi Allah nanana on, nane ko mi wi'ata on!

⁸Nyannde feere leɗɗe ndilli ngam ɗe cuɓa laamiiɗo maaje. Ɗe mbi'i jaytunhi: Laata laamiiɗo amin.

⁹Ammaa jaytunhi jaabi: On ngiɗi mi acca waɗugo nebbam ɗam Allah e yimɓe ngerdi ngam haa mi somna hoore am bee laamanaago leɗɗe goɗɗe na?

¹⁰Nden leɗɗe mbi'i ibbi: An war, laamana min.

¹¹Ammaa ibbi jaabi: On ngiɗi mi acca rimugo ɓiɓɓe booɗɗe dakamje ngam haa mi somna hoore am bee laamanaago leɗɗe goɗɗe na?

¹²Nden leɗɗe mbi'i inabohi: An war, laamana min.

¹³Ammaa inabohi jaabi: On ngiɗi mi acca waɗugo inaboojam kesam ceynanɗam Allah e yimɓe ngam haa mi somna hoore am bee laamanaago leɗɗe goɗɗe na?

¹⁴Ɓaawo man leɗɗe fuu mbi'i wumre gi'e: An war, laamana min.

¹⁵Wumre gi'e jaabi ɗe: Fakat to on moytatam haa mi laato laamiiɗo mooɗon, ngare njooɗe les ɗowdi am! Ammaa to on cali, yiite wurtoto diga wumre gi'e, nyaaman leɗɗe hooseere Libanon cemmbiɗɗe.”

¹⁶“Jonta, nume booɗɗum! Nde on ngaɗi Abimelek laamiiɗo mon, on ngaɗi bee gooŋgaaku bilaa aybe na? On tokkake ko Yerub-Ba'al e saare muuɗum bee laaɓɗum e on mbarjake saare maako deydey kuuɗe man na?

¹⁷Baaba am haɓani on, o acci yoŋki maako halka ngam hisnugo on juuɗe yimɓe Madiyan.

¹⁸Ammaa onon on tuurtani saare maako hannde, on mbari ɓiɓɓe maako cappanɗe njoweeɗiɗo dow hayre woore. On mbaɗi Abimelek, ɓii korɗo maako laamiiɗo dow ardiiɓe Sikem, ngam o deerɗiraawo mon.

¹⁹To on kuuwani Yerub-Ba'al e saare mum hannde bee gooŋgaaku e laaɓeeŋga ɓerɗe, nden kam ceyore Abimelek, kaŋko boo o seyoro on.

²⁰Ammaa to naa non, sey yiite wurto haa Abimelek, nge nyaama ardiiɓe Sikem e Bayti-Millo. Sey yiite wurto haa ardiiɓe Sikem e Bayti-Millo boo, nge nyaama Abimelek.”

²¹Nden Yotam doggi haa Biir, jooɗi ton, ngam haa o daayotira bee Abimelek, deerɗiiko.

²²Abimelek ɗowi Isra'iila duuɓi tati.

²³Allah neli ruuhu kalluŋgu, ngu ummini jokkirgol hakkunde Abimelek e ardiiɓe Sikem. Ɓe tuurtani mo.

²⁴Ɗum waɗi non ngam haa Abimelek ɓii Yerub-Ba'al, mbarɗo deerɗiraaɓe muuɗum cappanɗe njoweeɗiɗo e ardiiɓe Sikem, walluɓe mo nder mbar-hoore man, keɓa kiita zunuuba ƴiiƴam muuɗum'en.

²⁵Ardiiɓe Sikem kooci yimɓe, mbaaltani Abimelek dow kooseeje. Ɓe pasi koo moy caalotooɗo kommbi maɓɓe. Ammaa woɗɓe anndini ɗum Abimelek.

²⁶Ga'al ɓii Obet wari haa Sikem, kaŋko bee deerɗiraaɓe maako. Ardiiɓe Sikem kooli mo.

²⁷Ɓe njehi haa gese inabooje maɓɓe, ɓe teɓi inabooje, ɓe ɓiɗɗi ɗe. Nden ɓe mbaɗi juulde seyo. Ɓe nasti suudu ɗowanteeɓe maɓɓe, ɓe nyaami, ɓe njari, ɓe naali Abimelek.

²⁸Ga'al wi'i ɓe: “Abimelek o moyjo? En ɓeye haa Sikem ngam haa en kuuwana mo? Naa o ɓii Yerub-Ba'al e naa o jo'ini Zebul hooreejo dow berniwol? Ammaa onon, kuuwane Hamor baaba Sikem! Walaa daliila haa en kuuwana Abimelek!

²⁹Moy waɗata mi laato ardiiɗo yimɓe ɓe'e haa mi riiwa Abimelek? Nden o wi'i: Abimelek! Ɗuɗɗin jama'aare konu ma, wurta, haɓu bee am!”

³⁰Zebul, hooreejo berniwol nani bolle Ga'al ɓii Obet. O tikki masin.

³¹O neli nelaaɓe haa Abimelek bee sirri haa ɓe mbi'a mo: “Ndaa! Ga'al ɓii Obet e deerɗiraaɓe muuɗum ngari jonta haa Sikem, ɓe ɗon ummina ɓerɗe yimɓe berniwol fuu haa ɓe tuurtane.

³²Umma bee jemma kadi, an e yimɓe ma, on mbaalto haa ladde.

³³Fajiri to naaŋge fuɗi, ukkane berniwol. To Ga'al e yimɓe muuɗum ngurtake ngam haɓugo bee ma, waɗ ko a yiɗi fuu.”

³⁴Jemma maajum, Abimelek e yimɓe muuɗum fuu cennditi geɓe nayi, ɓe njehi ɓe nyukki ɓadiiɗum bee Sikem.

³⁵Nde Ga'al wurti berniwol, dari haa nastirde dammugal berniwol, Abimelek e yimɓe muuɗum ngurti diga nyukkorɗe muuɗum'en.

³⁶Ga'al yi'i ɓe, wi'i Zebul: “Ndaa, jama'aare ɗon diirto geereeje kooseeje.” Zebul jaabi mo: “A ɗon yi'a ɗowdi kooseeje bana yimɓe non.”

³⁷Ga'al wi'i fahin: “Laar, jama'aare ɗon diirto hooseere Gerisiima, mooɓre woore ɗon wara dow laawol lekki makki ki waɗooɓe hatti.”

³⁸Zebul jaabi: “Toy harakaaji ma go kadi? A wi'no: Abimelek o moyjo haa en kuuwana mo? Jonta ndaa jama'aare nde a yawino. Yah haɓu bee maare kadi!”

³⁹Ga'al ardi ardiiɓe Sikem, ɓe ngurti, ɓe kaɓi bee Abimelek.

⁴⁰Abimelek taasni mo e o doggi yeeso maako. Ɗuuɗɓe mbaraama haa yotti dammugal berniwol yimɓe ɗon mbaali.

⁴¹Abimelek dilli jooɗi haa Aruma, Zebul riiwi Ga'al e deerɗiraaɓe muuɗum diga Sikem e o haɗi ɓe lortaago ngam taa o jooɗo ton.

⁴²Jaŋngo man ummaatoore Sikem wurti, yehi haa ladde, Abimelek nani ɗum.

⁴³O sennditi yimɓe maako geɓe tati e ɓe mbaaltani ɓe haa ladde. Nde ɓe ngi'i yimɓe ngurtake berniwol, ɓe ummi, ɓe ukkani ɓe.

⁴⁴Yaake nde geɓe goɗɗe ɗiɗi ukkani yimɓe haa kayweeji e ɓe ɗon mbara ɓe, Abimelek e yeɓre muuɗum boo njaawɗi yahugo ndaro haa dammugal berniwol.

⁴⁵Ɓe nyalli haɓugo bee yimɓe berniwol haa Abimelek nyaami ngol, mbari yimɓe wonɓe nder maagol. Nden o yibbini ngol, o sammini mannda[14] dow maagol.

⁴⁶Nde ardiiɓe suudu towndu haa Sikem nani habaru ndu'u, ɓe fuu ɓe nasti suudu wasaandu les suudu lawru maɓɓe Ba'al-Berit.

⁴⁷Abimelek anndinaama ɓe fuu ɓe mooɓtake ton.

⁴⁸Ngam maajum o wa'i hooseere Calmon, kaŋko e yimɓe wonduɓe bee maako. O hoo'i fe'irde, o fe'i lisal lekki, o wakki ngal. Nden o wi'i yimɓe maako: “On ngi'i ko mbaɗmi. Law, mbaɗe bana nii onon boo!”

⁴⁹Koo moy maɓɓe fe'i lisal lekki boo. Nden ɓe tokki Abimelek, ɓe mballini leɗɗe man dow suudu wasaandu go, ɓe kuɓɓi ɗe. Ardiiɓe suudu towndu haa Sikem fuu maayi, baakin ujineere, worɓe e rewɓe.

⁵⁰Ɓaawo man Abimelek yehi Tebes. O saŋngini yeeso berniwol man, o taari ngol, o nyaami ngol.

⁵¹Woodi suudu towndu semmbiɗndu haa caka berniwol. Worɓe, rewɓe e ardiiɓe Tebes fuu ndoggi haa maaru. Ɓe pali dammugal, ɓe mba'i dow soorowol.

⁵²Abimelek wari gal suudu man, haɓi bee yimɓe ton. O ɓaditi dammugal suudu man ngam o wula ndu bee yiite.

⁵³Ammaa debbo feere sakkini hayre namrude dow hoore Abimelek, gumbal hoore maako fusi.

⁵⁴Law o ewni suka doondoowo balmi maako, o wi'i mo: “Los kaafahi ma, mbaram, ngam taa ɓe mbi'a: Debbo mbari mo.” Suka maako yuwi mo, o maayi.

⁵⁵Nde Isra'iila'en ngi'i Abimelek maayi, ɓe kooti ɓe fuu koo moy haa saare mum.

⁵⁶Bana nii Allah lortiniri halleende Abimelek dow hoore maako. Ɗum halleende nde Abimelek waɗi baaba mum, ngam o mbari deerɗiraaɓe maako cappanɗe njoweeɗiɗo.

⁵⁷Allah lortini boo halleende nde ardiiɓe Sikem mbaɗi dow ko'e muuɗum'en. Bana nii naaloore Yotam ɓii Yerub-Ba'al gooŋɗiri.