Read Fulfulde Wahayu Yuhanna 1 Bible Online

Wahayu Yuhanna 1 - Fulfulde bible

Wahayu Yuhanna 1

¹Ndaa wahayu mo Allah hokki Yeesu Almasiihu ngam anndingo jaggiiɓe mum ko ɓadi wargo bee doole. Ngam maajum Almasiihu neli malaa'ikaajo muuɗum ngam anndingo ɗum jaggiiɗo muuɗum Yuhanna.

²Yuhanna seedi ko o yi'i fuu, ɗum wolde Allah e seedamku Yeesu Almasiihu.

³Barka laatanto jaŋnganɗo deftere nde'e e nananɓe bolle annabaaku ngu'u, tokkiiɓe ko winnda nder maare! Ngam wakkatiire nde kuuje ɗe'e laatoto ɓadake wargo.

⁴Min Yuhanna, mi ɗon winndana jama'aaje nuɗɗinɓe joweeɗiɗi haa lesdi Asiya: Mo'ere e salaaman laatano on diga Allah, mo ɗon, mo ɗonno ɓooyma, mo ɗon wara boo e diga ruuhuuji joweeɗiɗi gonɗi yeeso leeso laamu maako

⁵e diga Yeesu Almasiihu, ceedoowo gooŋgaajo, ummitinaaɗo arano nder maayɓe, mawɗo laamlaamɓe duniyaaru boo. Kaŋko o yiɗi en. O rimɗini en diga hakkeeji meeɗen bee ƴiiƴam maako,

⁶o laatini en ummaatoore laamu maako e liman'en Allah, Baabiraawo maako. Tedduŋgal e baawɗe laatano mo haa abada abadin. Aamiina!

⁷Ndaa, o ɗon warda bee duule! Koo moy fuu yi'an mo, koo yuwɓe mo boo. Yimɓe asli nder duniyaaru fuu mboyan ngam daliila maako. Nii ɗum laatorto. Aamiina!

⁸Jawmiraawo Allah wi'i: “Min woni Alfa e Omega[1], mo ɗon e mo ɗonno ɓooyma, mo ɗon wara boo, min woni Baawɗo dow koo ɗume fuu.”

⁹Min Yuhanna, deerɗiraawo mooɗon, kawtuɗo bee mooɗon nder torra e laamu Allah e tiiɗal nder Yeesu, mi ɗonno haa duunde wi'eteende Patmos ngam daliila wolde Allah e seedamku Yeesu.

¹⁰Nyalaade Jawmiraawo[2], Ruuhu naŋngi yam, mi nani sawtu ɓaawo am, bana luwal,

¹¹ɗon wi'a: “Ko ngi'ata, winndu ɗum nder deftere, neldu ɗum haa jama'aaje nuɗɗinɓe joweeɗiɗi gonɗe haa Efesus e Simirna e Pergame e Tiyatira e Sardis e Filadelfiya e Lawdikiya.”

¹²Mi wayliti haa mi laara mo ɗon wolwanammi. Nden mi yi'i jo'inirɗe pittirlaaji joweeɗiɗi ɗe kaŋŋeeri.

¹³Caka jo'inirɗe ɗe'e, ngi'mi goɗɗo nannduɗo bee neɗɗo ɗon ɓorni limce juutɗe haa njotti teppe, o ɗon haɓɓi wiɓɓere maako bee taadorgol kaŋŋeeri.

¹⁴Hoore e gaasa hoore maako ɗon ndanwi tal bana hottollo raneeho e bana mallimallooje. Gite maako njayni bana ɗemŋgal yiite,

¹⁵kosɗe maako ɗelki bana njamndi mboɗeeri ɓolinaandi nder yiite. Sawtu maako nanndi bee hoolo ndiyamji diirtotooɗi haa maayo bee semmbe.

¹⁶O ɗon jogi koode joweeɗiɗi haa juŋngo maako nyaamo, kaafahi ceeɓki, marki mbeldiiji ɗiɗi wurti hunnduko maako. Yeeso maako ɗon yayna bana naaŋge yaynirta caka nyalawma.

¹⁷Nde mi yi'i mo, mi do'i yeeso maako bana maayɗo. O wallini juŋngo maako nyaamo dow hoore am, o wi'i: “Taa hul! Min woni arano e ragareejo.

¹⁸Mi geeto! Mi maayino, ammaa ndaa, mi geeto haa abada abadin. Mi woodi baawɗe dow maayde e dow joonde maayɓe boo.

¹⁹Ngam maajum winndu ko ngi'ɗa: Kuuje jontaaje e tammiiɗe wargo ɓaawoɗon.

²⁰Ndaa sirri koode joweeɗiɗi ɗe ngi'ɗa haa juŋngo am nyaamo e sirri jo'inirɗe pittirlaaji joweeɗiɗi ɗe kaŋŋeeri: Koode joweeɗiɗi ngoni malaa'ika'en jama'aaje nuɗɗinɓe joweeɗiɗi. Jo'inirɗe pittirlaaji joweeɗiɗi boo ngoni jama'aaje nuɗɗinɓe joweeɗiɗi.”