Read Fulfulde Wahayu Yuhanna 14 Bible Online

Wahayu Yuhanna 14 - Fulfulde bible

Wahayu Yuhanna 14

¹Nden mi yi'i, ndaa jawgel ɗon dari dow hooseere Siyona. Yimɓe ujine teemerre e cappanɗe nayo e nayo (144.000) ɗon ngondi bee maagel. Ɓe fuu, innde maagel e innde Baabiraawo maagel ɗon mbinndi dow tiiɗe maɓɓe.

²Mi nani hoolo iwi diga asama, ngo nanndi bee hoolo ndiyamji diirtotooɗi haa maayo e ngo nanndi boo bee felmaaŋgo saatuŋgo. Ko nanmi, ɗum nanndi bee sawtu fiyooɓe moolooji to ɓe ɗon piya ɗi.

³Yimɓe ɗuuɗɓe go ɗon ndari yeeso leeso laamu e yeeso kuuje geete nayi e yeeso ndotti'en, ɓe ɗon ngima yimre hesre. Walaa keɓɗo ekkitaago yimre nde'e, sonaa yimɓe ujine teemerre e cappanɗe nayo e nayo (144.000), soottaaɓe diga duniyaaru go.

⁴Yimɓe ɓe'e, ɓe ayni ko'e maɓɓe nder senaare, ɓe coɓnaay ɓalli maɓɓe bee rewɓe ngam ɓe meeɗaay baaldal sam. Ɓe ɗon tokko jawgel haa ngel yahata fuu, ɓe soottaaɓe nder luttuɓe yimɓe fuu bana ɓenndalooje aartuɗe lii'aneego Allah e jawgel.

⁵Walaa mo nani fewre haa kunnduɗe maɓɓe, ɓe ngalaa aybe[16] sam.

⁶Nden mi yi'i malaa'ikaajo feere ɗon fiira nder hawa, o woodi Kubaruwol Ceynoowol duumiiŋgol, ngam waazingo jooɗiiɓe haa duniyaaru, haa yimɓe jama'aaje e asli e ɗemɗe e ummaatooje fuu.

⁷O wolwi bee sawtu, o wi'i: “Kule Allah, teddine mo! Ngam wakkati kiita maako yottake. Ngam maajum, cujidane Allah tagɗo asama e lesdi e mbeela e ceeɓooje ndiyam!”

⁸Malaa'ikaajo ɗiɗaɓo tokki arano, wi'i: “Ngol do'ake, Baabila, berniwol maŋngol do'ake! Ngol yarni ummaatooje fuu njaram daakaareeku maagol masin, waato ngol waɗi daakaareeku ɗuuɗŋgu bee maaje.”

⁹Malaa'ikaajo tataɓo tokki arano e ɗiɗaɓo, o wolwi bee sawtu, o wi'i: “Koo moy sujidani ndabbaawa e suura maaga, jaɓi maandorde maaga haa tiinde malla haa juŋngo mum,

¹⁰kaŋko boo o yaran njaram ɓernuki Allah. Allah jillaay ɗam bee ndiyam, o rufi ɗam nder jardugel ɓernuki maako. Goɗɗo oo torroto nder yiite e baruudu[17] yeeso malaa'ika'en seniiɓe e yeeso jawgel.

¹¹Cuurɗe yiite torranŋge ɓe ummoto heedi asama haa abada abadin. Koo moy sujidani ndabbaawa e suura maaga malla jaɓi maandorde innde maaga siwtataako jemma e naaŋge fuu.”

¹²Ngam man, sey senaaɓe Allah ɗowtaniiɓe umrooje mum, nuɗɗinɓe Yeesu bee gooŋga, tiiɗa nder munyal.

¹³Nden mi nani sawtu diga asama ɗon wi'a: Winndu: “Diga jonta barka laatani tokkinooɓe Jawmiraawo haa yotti maayde maɓɓe.” Ruuhu jaabi: “Nonnon, ɓe ciwtoto diga kuuɗe maɓɓe caatuɗe, ngam nafuuda kuuɗe maɓɓe wondan bee maɓɓe.”

¹⁴Nden mi yi'i ruuldere raneere. Dow ruuldere nde'e, goɗɗo nannduɗo bee ɓii-neɗɗo ɗon jooɗi. Woronnde kaŋŋeeri ɗon dow hoore maako. O ɗon jogi wafdu welndu.

¹⁵Malaa'ikaajo feere wurti haykaliiru, wooki bee sawtu, wi'i jooɗiiɗo dow ruuldere: “Wiika wafdu maaɗa, sodu, ngam wakkati codol waɗi, ngam ƴaamle lesdi ɓenndi.”

¹⁶Nden jooɗiiɗo dow ruuldere go wiiki wafdu muuɗum dow lesdi, ƴaamnde lesdi sodaama.

¹⁷Mi yi'i malaa'ikaajo feere wurti haykaliiru wonndu nder asama. Kaŋko boo o ɗon jogi wafdu welndu.

¹⁸Malaa'ikaajo feere wurti diga hirsirde, kaŋko mari baawɗe dow yiite. O wolwi bee sawtu, o wi'i malaa'ikaajo jogiiɗo wafdu welndu go: “Wiiku wafdu maaɗa welndu, sodu wukkuuji inabooje haa ngesa duniyaaru, ngam ɓiɓɓe man ɓenndi!”

¹⁹Malaa'ikaajo wiiki wafdu muuɗum haa lesdi, ndu ta'i wukkuuji inabooje, sakkini ɗi nder ɓiɗɗirɗum mawɗum ɗum ɓernuki Allah.

²⁰Ɓiɓɓe inabooje ɓiɗɗaama nder ɓiɗɗirɗum haa yaasi berniwol. Maayo ƴiiƴam wurti ɓiɗɗirɗum man, luggeeŋga maago yotti labaŋgal puccu. Njuutirka maago yotti baakin kilomeetir teemeɗɗe tati (300).