Read Fulfulde Wahayu Yuhanna 15 Bible Online

Wahayu Yuhanna 15 - Fulfulde bible

Wahayu Yuhanna 15

¹Nden mi yi'i alaama ngoɗka makka, kayɗiniika haa asama: Malaa'ika'en njoweeɗiɗo ɗon njogi masiibooji joweeɗiɗi. Kanji ngoni masiibooji ragareeji, bee maaji ɓernuki Allah timmirta.

²Nden mi yi'i ko nanndi bee mbeela laaɓŋga, jalbitanŋga, njillindiraaŋga bee yiite. Mi yi'i boo jaaliiɓe ndabbaawa e suura maaga e lammba innde muuɗum go ɗon ndari dow mbeela man, ɓe ɗon njogi moolooji ɗi Allah hokkuno ɓe.

³Ɓe ɗon ngima yimre Muusa, jaggiiɗo Allah e nde jawgel bana ni'i: “Yaa Jawmiraawo Allah Baawɗo dow koo ɗume fuu! Kuuɗe maaɗa ɗe mawɗe, ɗe kayɗiniiɗe! Laabi maaɗa ɗi adiliiji, ɗi gooŋɗuɗi, a laamiiɗo ummaatooje.

⁴Moy hulataa ma, yaa Jawmiraawo? Moy teddintaa innde maaɗa? Ngam an feere ma woni ceniiɗo. Ummaatooje fuu ngaran sujididgo yeeso ma, ngam kuuɗe ma adiliije mbaŋgi.”

⁵Ɓaawo man mi yi'i haykaliiru nder asama, laymaaru seedamku maɓɓiti.

⁶Malaa'ika'en njoweeɗiɗo jogiiɓe masiibooji joweeɗiɗi go ngurti haykaliiru, ɓe ɗon ɓorni limce ɗelkanɗe e daneeje tal, ɓe ɗon kaɓɓi biɓɓe maɓɓe bee taadorgol kaŋŋeeri.

⁷Woore nder kuuje geete nayi go hokki malaa'ika'en njoweeɗiɗo taasaaje kaŋŋeeri joweeɗiɗi keewɗe ɓernuki Allah geeto haa abada abadin.

⁸Haykaliiru heewi cuurɗe daliila tedduŋgal Allah e baawɗe muuɗum. Walaa mo waawi nastugo haykaliiru haa malaa'ika'en njoweeɗiɗo ɓe'e timmini masiibooji joweeɗiɗi go.