Read Fulfulde Wahayu Yuhanna 16 Bible Online

Wahayu Yuhanna 16 - Fulfulde bible

Wahayu Yuhanna 16

¹Nden mi nani sawtu iwi diga haykaliiru ɗon wi'a malaa'ika'en njoweeɗiɗo go bee semmbe: “Njehe, ndufe taasaaje[18] ɓernuki Allah joweeɗiɗi go haa duniyaaru!”

²Malaa'ikaajo arano dilli, rufi ko woni nder taasawo muuɗum haa lesdi. Kuuduuje kalluɗe naawɗe mbaɗi haa marɓe maandorde ndabbaawa, haa sujidanooɓe suura maaga go.

³Nden malaa'ikaajo ɗiɗaɓo rufi ko woni nder taasawo muuɗum haa mbeela. Ndiyam maaga laati bana ƴiiƴam maayɗo, marɗum yoŋki nder mbeela fuu waati.

⁴Nden malaa'ikaajo tataɓo rufi ko woni nder taasawo muuɗum haa maaje ilooje e ceeɓooje ndiyam, ɗe laati ƴiiƴam.

⁵Mi nani malaa'ikaajo kalfinaaɗo ndiyam wi'i: “A adiliijo, mo ɗon, mo ɗonno ɓooyma boo, a ceniiɗo, ngam a hiiti ɓe bee masiibooji ɗi'i,

⁶ngam ɓe ndufi ƴiiƴam senaaɓe e ƴiiƴam annabi'en, ngam maajum a yarni ɓe ƴiiƴam. Ɓe keɓi ko haanani ɓe!”

⁷Nden mi nani sawtu iwi diga hirsirde ɗon wi'a: “Nonnon, yaa Jawmiraawo Allah Baawɗo dow koo ɗume fuu, kiitaaji ma ɗi gooŋgaaji e adiliiji.”

⁸Nden malaa'ikaajo nayaɓo rufi ko woni nder taasawo muuɗum haa naaŋge. Nge hokkaama laawol wulugo yimɓe bee yiite wulŋge jaw.

⁹Yiite wulŋge nge'e wuli yimɓe haa ɓe kuɗi innde Allah, marɗo baawɗe dow masiibooji ɗi'i. Ammaa ɓe cali tuubugo, ɓe cali teddingo Allah boo.

¹⁰Nden malaa'ikaajo njowaɓo rufi ko woni nder taasawo muuɗum dow leeso laamu ndabbaawa go. Nyiɓre waɗi nder laamu maaga. Yimɓe ŋati ɗemɗe muuɗum'en ngam daliila naaweeŋga,

¹¹ɓe kuɗi Allah mo asama ngam naaweeŋga e kuuduuje maɓɓe. Ammaa ɓe cali tuubugo dow kuuɗe maɓɓe kalluɗe.

¹²Nden malaa'ikaajo njoweegoojo rufi ko woni nder taasawo muuɗum nder Efratis, maayo maŋngo. Ngo ɓeeɓi, ngo yoori, haa laamiiɓe fuunaaŋge keɓa laawol saalaago ton.

¹³Nden mi yi'i ruuhuuji coɓɗi tati, nannduɗi bee paaɓi, ɗi ɗon ngurto hunnduko Kuuŋga e hunnduko ndabbaawa e hunnduko pewoowo bi'anɗo o annabiijo go.

¹⁴Kanji ngoni ginnaaji, kuuwanɗi kuuɗe kaayeefiije. Ɗi ɗon njaha haa laamiiɓe duniyaaru fuu, haa ɗi mooɓta ɓe ngam konu haa nyalaade mawnde nde Allah Baawɗo dow koo ɗume fuu.

¹⁵“Nane! Mi waran bana gujjo! Barka laatanto aynuɗo, kakkilananɗo limce muuɗum ngam taa o yaha o temmbo, taa o semta yeeso yimɓe!”

¹⁶Ruuhuuji tati go mooɓti laamiiɓe haa nokkuure wi'eteende Harmagedon[19] bee Ibraniŋkeere.

¹⁷Nden malaa'ikaajo njoweeɗiɗaɓo rufi ko woni nder taasawo muuɗum haa hawa. Sawtu cemmbiɗɗo iwi haa leeso laamu nder haykaliiru, wi'i: “Ɗum timmi!”

¹⁸Ma'e ma'i, hoolooji mbaɗi, pelmaali mbaɗi, lesdi dimmbi masin. Lesdi meeɗaay dimmbaago bana non sam diga tageeki neɗɗo haa duniyaaru.

¹⁹Berniwol maŋngol senndaama geɓe tati, berniiji ummaatooje boo kalki. Allah siftori Baabila, berniwol maŋngol, ngam haa o yarna ngol ko woni nder jardugel, waato njaram ɓernuki maako caatuki.

²⁰Duuɗe fuu kalki, kooseeje fuu majji.

²¹Mallimallooje loorɗe toɓi diga asama dow yimɓe, teddeeŋga woore maaje baakin kilo cappanɗe nayi (40). Yimɓe kuɗi Allah ngam masiibo mallimallooje, ngam masiiboowol ngol halli masin.