Read Fulfulde Wahayu Yuhanna 18 Bible Online

Wahayu Yuhanna 18 - Fulfulde bible

Wahayu Yuhanna 18

¹Ɓaawoɗon mi yi'i malaa'ikaajo feere ɗon jippo diga asama. O woodi baawɗe mawɗe, jayŋgol maako yaynani duniyaaru fuu.

²O towni sawtu, o wi'i: “Ngol do'ake! Ngol do'ake! Baabila, berniwol maŋngol do'ake! Ngol laati joonde ginnaaji e nokkuure ruuhuuji coɓɗi koo ɗiye e colli e dabbaaji coɓɗi kaccuɗi.

³Ngam ngol yarni ummaatooje fuu njaram daakaareeku maagol ɗuuɗŋgu. Laamiiɓe duniyaaru mbaɗi daakaareeku bee maagol, filooɓe duniyaaru ndiski bee jeynitaare maagol fantunde.”

⁴Nden mi nani sawtu feere diga asama ɗon wi'a: “Onon yimɓe ummaatoore am, ngurte haa maagol, ngam taa on kawta bee maagol nder hakkeeji maagol e ngam taa masiibooji taaskaaɗi ngam maagol keɓa on!

⁵Ngam hakkeeji maagol ɗuuɗi, ɗon mbaagi haa njotti asama, Allah boo yejjitaay kuuɗe maagol kalluɗe.

⁶Mbaɗe ngol bana no ngol waarino, mbaɗe ngol cowi ɗiɗi fodde ko ngol waɗno, njille njaram jardugel maagol bee njaram nyaaɗɗam, nyaaɗugo maajam ɓura ɗam jardugel maagol go cowi ɗiɗi.

⁷Torre ngol e mboyne ngol deydey tedduŋgal ngal ngol waɗani hoore maagol e jeynitaare maagol, ngam ngol ɗon wi'ana hoore maagol: Ndaa mi ɗon jooɗi, mi mayramjo, naa mi debbo jurumɗo, mi meeɗataa anndugo bojji.

⁸Ngam daliila man, masiibooji taaskaaɗi ngam maagol ukkanto ngol nder nyalaade woore: Maayde e suno e weelo. Yiite nyaaman ngol fuu, ngam Jawmiraawo Allah kiitiiɗo ngol, o baawɗo.”

⁹Laamiiɓe duniyaaru hawtuɓe bee maagol nder daakaareeku e jeynitaare, ɓe mboyan, ɓe ngookan to ɓe ngi'i cuurɗe guleeki maagol.

¹⁰Ɓe ndaroto daayiiɗum, ngam ɓe ɗon kula daliila torra maagol, ɓe mbi'an: “Kayto! Kayto! Baabila berniwol maŋngol, cemmbiɗŋgol! Nder saa'a ngoota tan a hiitaama!”

¹¹Filooɓe duniyaaru boo mboyan, ɓe cunoto daliila maagol, ngam walaa mo soodata kuuje maɓɓe fahin,

¹²waato kaŋŋeeri e cardi, kaa'e marɗe saman, luuluuje, turmiiji daneeji e boɗeeji ɗigguɗi, siliki, limce boɗeeje coy, leɗɗe caɗɗe feere feere, kuuje kuuwraaɗe bee nyii'e nyiibi e bee leɗɗe marɗe saman e bee njamndi mboɗeeri e njamndi ɓaleeri e kaa'e daneeje,

¹³sinnamom, cittaaje belɗe, uurdi kurooriiri, uurdi baɗaadi, uurle daneeje guleteeɗe, inaboojam, nebbam, kuroori ɗiggundi, alkamaari, na'i, baali, pucci, mootaaji pucci, maccuɓe, koo yoŋkiiji yimɓe.

¹⁴Kuuje maaɗa booɗɗe ɗe ngiɗɗa ndaayake ma, risku e pawne maaɗa fuu kalki. Fakat a meetataa heɓtugo ɗe fahin!

¹⁵Filooɓe riskuɓe bee maagol ndaroto daayiiɗum ngam ɓe ɗon kula daliila torra maagol. Ɓe mboyan ngol, ɓe cunoto,

¹⁶ɓe mbi'an: “Kayto! Kayto! Berniwol maŋngol! Ngol ɓornino limce daneeje e boɗeeje ɗigguɗe e boɗeeje coy. Ngol fawnaamano bee kuuje kaŋŋeeri, bee kaa'e marɗe saman e bee luuluuje!

¹⁷Nder saa'a ngoota risku fantuŋgu ngu'u fuu majjiri ngol!” Jawmu koommbooje[21], waɗooɓe jahaaŋgal bee maaje e laanyooɓe ɗe e koo moy heɓata ngeenaari muuɗum bee kuugal nder mbeela fuu, ndari daayiiɗum,

¹⁸ɓe ngooki nde ɓe ngi'i cuurɗe guleeki maagol, ɓe mbi'i: “Walaa berniwol feere fotino bee berniwol maŋngol ngo'ol!”

¹⁹Ɓe ndufi mbulwuldi dow ko'e maɓɓe, ɓe ngooki, ɓe mboyi, ɓe cuni, ɓe mbi'i: “Kayto! Kayto! Berniwol maŋngol! Kaŋgol woni berniwol ngol marɓe koommbooje[22] dow mbeela fuu ndiskiri risku maagol. Nder saa'a ngoota tan kuuje fuu majjiri ngol!”

²⁰“An asama, seya ngam halkere maagol! Ceye, onon senaaɓe Allah, nelaaɓe e annabi'en! Ngam Allah waatani on, hiiti ngol.”

²¹Nden malaa'ikaajo cemmbiɗɗo efti hayre mawnde bana namarde mawnde, sakkini nde nder mbeela, nden o wi'i: “Baabila, berniwol maŋngol sakkinte bee semmbe bana nii, walaa mo meetata yi'ugo ngol fahin.

²²Hoolo fiyooɓe moolooji e yimooɓe e fuufooɓe ciide e fuufooɓe algaytaaji meetataa naneego nder maaɗa! Walaa kuuwɗo sanaa'a koo kaye meetata taweego nder maaɗa, hoolo namooɓe meetataa naneego nder maaɗa.

²³Jayŋgol pittirla meetataa yi'eego nder maaɗa, sawtuuji te'ɓe e te'aaɓe meetataa naneego nder maaɗa. Ngam filooɓe maaɗa laatino mawɓe nder duniyaaru fuu. Ngam bee hiilaaji ma a zammbi ummaatooje duniyaaru fuu!”

²⁴Ɓe tawi ƴiiƴam annabi'en e ƴiiƴam senaaɓe Allah ndufaaɗam, waato ƴiiƴam mbaraaɓe nder duniyaaru haa maaɗa.