Read Fulfulde Wahayu Yuhanna 19 Bible Online

Wahayu Yuhanna 19 - Fulfulde bible

Wahayu Yuhanna 19

¹Ɓaawoɗon mi nani ko nanndi bee sawtu diga mooɓre ɗuuɗnde haa asama, nde ɗon wi'a: “Halleluya![23] Kisndam e tedduŋgal e baawɗe ɗon haa Allah meeɗen!

²Ngam kiitaaji maako ɗi gooŋgaaji e adiliiji, o hiiti daakaareejo ɓurduɗo hallugo mo wonni duniyaaru fuu bee daakaareeku muuɗum. O waati mo ƴiiƴam jaggiiɓe maako ɗam o rufi.”

³Ɓe mbi'i fahin: “Halleluya! Cuurɗe guleeki berniwol ngol ɗon ummo dow haa abada abadin!”

⁴Ndotti'en noogas e nayo e kuuje geete nayi go cujidani Allah jooɗiiɗo dow leeso laamu, ɓe mbi'i: “Aamiina! Halleluya!”

⁵Nden sawtu iwi diga leeso laamu, ɗon wi'a: “Maŋgte Allah meeɗen, onon jagganooɓe mo e hulɓe mo, leesɓe e mawɓe fuu!”

⁶Nden mi nani ko nanndi bee hoolo mooɓre ɗuuɗnde bana hoolo ndiyamji diirtotooɗi haa maayo, bana pelmaali cemmbiɗɗi, ɗon wi'a: “Halleluya! Ngam Jawmiraawo meeɗen Allah Baawɗo dow koo ɗume fuu laamake!

⁷En ceya, en mbelmbelta, en teddina mo! Ngam wakkati ɓaŋgal jawgel yottake, ɓaŋgeteeɗo maagel taaskake.

⁸Ɓe ɓorni mo limce daneeje ɗigguɗe, ɗelkanɗe, laaɓɗe.” Limce daneeje ɗigguɗe man ngoni kuuɗe senaaɓe Allah adiliije.

⁹Nden malaa'ikaajo wi'i yam: “Winndu: Barka laatanto ewnaaɓe haa nyaamduuji ɓaŋgal jawgel.” Fahin o wi'i yam: “Kanje ngoni bolle gooŋgaaje iwɗe haa Allah.”

¹⁰Mi hofi yeeso maako haa mi sujidana mo, ammaa o wi'i yam: “Taa waɗ ɗum! Min mi maccuɗo Allah bana maaɗa e bana deerɗiraaɓe ma heɓɓe seedamku Yeesu. Sujidan Allah!” Ngam seedamku ngu Yeesu seedi, ɗum Ruuhu baɗanɗo annabaaku.

¹¹Nden mi yi'i asama maɓɓitaama. Ndaa puccu ndaneewu, ba'iiɗo ngu wi'ete Koolaaɗo e Gooŋgaajo. O hiitoto e o waɗan konuuji maako nder adilaaku.

¹²Gite maako nanndi bee ɗemɗe yiite, o waɗi boroɗɗe ɗuuɗɗe dow hoore maako. Innde winndaama dow maako, walaa mo anndi nde, sey kaŋko tan.

¹³O ɗon ɓorni ngapaleewol cuuwaaŋgol nder ƴiiƴam. O ewneteeɗo Wolde Allah.

¹⁴Honooɓe asama mba'i pucci daneeji, ɗon tokki mo, ɓe ɗon ɓorni limce ɗigguɗe daneeje, laaɓɗe.

¹⁵Kaafahi belki wurti hunnduko maako. Bee maaki o sopporto ummaatooje fuu. O duran ɗe bee sawru njamndi, o ɓiɗɗan inaboojam nder ɓiɗɗirɗum inaboojam, kanjum woni ɓernuki caatuki ki Allah Baawɗo dow koo ɗume fuu.

¹⁶Innde maako winndaama dow ngapaleewol e dow daŋngo maako: “Laamiiɗo laamiiɓe e Jawmiraawo jawmiraaɓe.”

¹⁷Nden mi yi'i malaa'ikaajo ɗon dari nder naaŋge. O wookani colli piirooji nder hawa fuu bee sawtu: “Ngare, mooɓte ngam nyaamdu Allah ɗuuɗndu!

¹⁸Ngam nyaamugo kusel laamiiɓe e kusel mawɓe sooje'en e kusel sooje'en e kusel pucci bee wa'iiɓe ɗi e kusel yimɓe fuu, rimɓe e maccuɓe, mawɓe e leesɓe!”

¹⁹Nden mi yi'i ndabbaawa go e laamiiɓe duniyaaru bee mooɓe konu muuɗum'en kawti waɗugo konu bee ba'iiɗo puccu go e bee mooɓre konu muuɗum.

²⁰Ɓe naŋngi ndabbaawa, kaŋga e pewoowo bi'anɗo o annabiijo baɗɗo alaamaaji yeeso maaga. Bee maaji o zammbori marɓe maandorde ndabbaawa e sujidanɓe suura maaga. Ndabbaawa e pewoowo bi'anɗo o annabiijo cakkinaama bee yoŋki nder weendu yiite huɓɓanŋge bee baruudu[24].

²¹Luttuɓe mbaraama bee kaafahi ki wurtino hunnduko ba'iiɗo puccu go. Colli fuu nyaami kusel maɓɓe haa ɗi cafti.