Read Fulfulde Wahayu Yuhanna 2 Bible Online

Wahayu Yuhanna 2 - Fulfulde bible

Wahayu Yuhanna 2

¹“Winndan malaa'ikaajo jama'aare nuɗɗinɓe haa Efesus ni'i: Ndaa koŋngol iwŋgol haa jogiiɗo koode joweeɗiɗi haa juŋngo muuɗum nyaamo, mo ɗon yaha caka jo'inirɗe pittirlaaji joweeɗiɗi ɗe kaŋŋeeri:

²Mi anndi kuuɗe maaɗa e torra maaɗa e tiiɗal maaɗa. A munyantaa halluɓe. A foondi yimɓe wi'anɓe ɓe nelaaɓe, ammaa ɓe laataaki nelaaɓe, a tawi ɓe fewooɓe.

³A ɗon tiiɗi, a torrake ngam daliila am, ammaa a tampaay.

⁴Ammaa woodi ko mi felirte: A wudini yiide nde a marno haa fuɗɗam.

⁵Siftor diga toy a do'i. Nden tuubu, huuw fahin kuuɗe ɗe a huuwino haa fuɗɗam. To naa non, mi waran, mi sottinan jo'inirɗum pittirla maaɗa to a tuubaay.

⁶Ammaa ndaa ko mi yerdi haa maaɗa: A wanyi kuuɗe Nikolay'en[3], ngam min boo mi wanyi ɗe.

⁷Mo woodi noppi, sey nana ko Ruuhu wi'ata jama'aaje nuɗɗinɓe! Mi hokkan jaaliiɓe fuu baawɗe nyaamugo ɓiɓɓe lekki ngeendam gonki nder jarne Allah.”

⁸“Winndan malaa'ikaajo jama'aare nuɗɗinɓe haa Simirna ni'i: Ndaa koŋngol iwŋgol haa bi'eteeɗo arano e ragareejo, mo maayino, ammaa mo yeeɗiti:

⁹Mi anndi torraaji e talakaaku maaɗa, ammaa haa am a diskuɗo. Mi anndi kalluka ka wi'anɓe ɓe Yahuudu'en mbolwata dow maaɗa, ammaa ɓe laataaki Yahuudu'en! Ɓe rewooɓe Sayɗaanu.

¹⁰Taa hul torraaji ɗi a tammi torreego! Ndaa, Sayɗaanu jarriboto on bee nastingo woɗɓe mooɗon nder fursina[4]. On torroto balɗe sappo. Jogita nuɗɗinki ma haa yotto maayde, nden kam mi warjoto ma woronnde ngeendam.

¹¹Mo woodi noppi, sey o nana ko Ruuhu wi'ata jama'aaje nuɗɗinɓe! Maayde ɗiɗawre meemataa jaaliiɗo.”

¹²“Winndan malaa'ikaajo jama'aare nuɗɗinɓe haa Pergame ni'i: Ndaa koŋngol iwŋgol haa marɗo kaafahi ceeɓki marki mbeldiiji ɗiɗi:

¹³Mi anndi haa njooɗiiɗa, haa leeso laamu Sayɗaanu woni. Ammaa a ɗon ɗakkotiri booɗɗum bee am, a accaay nuɗɗingo yam, koo nder zamanu Antipas, ceedoowo am gooŋgaajo mo ɓe mbari caka mooɗon, haa joonde Sayɗaanu woni.

¹⁴Ammaa woodi ko mi felirte seɗɗa: Woodi tokkiiɓe ekkitinol Balaama caka mooɗon. Kaŋko o ekkitini Balak no o nastinirta Isra'iila'en nder tuuforgol haa ɓe nyaama kusel kirsaaŋgel ngam labbi, ɓe mbaɗa daakaareeku boo.

¹⁵Bana non, an boo a woodi tokkiiɓe ekkitinol Nikolay'en.

¹⁶Tuube kadi! To naa non, mi waran law, mi honan yimɓe ɓe'e bee kaafahi gurtotooki hunnduko am.

¹⁷Mo woodi noppi, sey nana ko Ruuhu wi'ata jama'aaje nuɗɗinɓe! Mi hokkan jaaliiɗo fuu mannu suuɗiindu e hayre raneere boo. Dow hayre nde'e, innde hesre winndaama. Walaa annduɗo innde nde'e, sonaa jaɓɗo hayre man.”

¹⁸“Winndan malaa'ikaajo jama'aare nuɗɗinɓe haa Tiyatira ni'i: Ndaa koŋngol iwŋgol haa Ɓiɗɗo Allah, mo gite muuɗum ɗon njayna bana ɗemŋgal yiite, mo kosɗe muuɗum ɗon ɗelka bana njamndi mboɗeeri:

¹⁹Mi anndi kuuɗe ma e yiide ma e nuɗɗinki ma e njaggu ma e tiiɗal ma. Ko a huuwata jonta ɓuri ko a huuwino haa fuɗɗam.

²⁰Ammaa woodi ko mi felirte: A ɗon acca debbo bi'eteeɗo Izabel, mo wi'i o annabiijo. O ɗon zammbo jaggiiɓe am bee ekkitinol maako haa ɓe mbaɗa daakaareeku, ɓe nyaama kusel kirsanaaŋgel labbi.

²¹Mi hokki mo wakkati haa o tuuba, ammaa o yiɗaa tuubugo dow daakaareeku maako.

²²Ngam maajum mi sakkinan mo haa be'itte torra. Ton o torroto masin, kaŋko e waɗooɓe njeenu bee maako fuu, sonaa to ɓe tuubi, ɓe acci huuwugo kuuɗe maako kalluɗe.

²³Ɓikkoy maako boo, mi mbaran koy. Jama'aaje nuɗɗinɓe fuu anndan min woni linyoowo numooji e ɓerɗe yimɓe. Mi warjoto koo moy mooɗon deydey kuuɗe muuɗum.

²⁴Ammaa onon nuɗɗinɓe luttuɓe haa Tiyatira, on tokkaaki ekkitinol kalluŋgol ngo'ol, on ekkitaaki ko woɗɓe mbi'ata sirriiji Sayɗaanu lugguɗi, mi roondataa on doŋngal goɗŋgal.

²⁵Ammaa sey on njogito ko marɗon bee semmbe haa to mi wari.

²⁶Jaaliiɗo, baɗɗo muuyo am haa timmoode, mi hokkan mo baawɗe dow ummaatooje,

²⁷o duran ɗe bee sawru njamndi, o fusan ɗe bana ɓe pusirta payanɗe loope,

²⁸bana min boo mi heɓi baawɗe haa Baabiraawo am. Mi hokkan jaaliiɗo oo horre baɓɓol.

²⁹Mo woodi noppi, sey nana ko Ruuhu wi'ata jama'aare nuɗɗinɓe.”