Read Fulfulde Wahayu Yuhanna 21 Bible Online

Wahayu Yuhanna 21 - Fulfulde bible

Wahayu Yuhanna 21

¹Nden mi yi'i asamaawu kesu e lesdi kesri. Asamaawu aartuŋgu e lesdi aartundi majji, mbeela boo walaa fahin.

²Mi yi'i berniwol ceniiŋgol, Urusaliima kesol iwŋgol haa Allah, ɗon jippo diga asama. Ngol taaskitinaama bana ɓaŋgeteeɗo pawniiɗo ngam ɓaŋganɗo ɗum.

³Mi nani sawtu iwi diga leeso laamu ɗon wi'a bee semmbe: “Ndaa jooɗorde Allah caka yimɓe! O jooɗoto bee maɓɓe, ɓe laatoto ummaatooje[25] maako. Allah bee hoore mum wondan bee maɓɓe, laatoto Allah maɓɓe.

⁴O woostan gonɗi diga gite maɓɓe fuu. Walaa maayde, walaa suno, walaa bojji, walaa bone fahin. Ngam kuuje ɓooymaaje caalake.”

⁵Nden jooɗiiɗo dow leeso laamu go wi'i: “Ndaa mi ɗon hesɗitina koo ɗume fuu!” O wi'i yam: “Winndu ɗum, ngam bolle ɗe'e, ɗe gooŋgaaje, ɗe koolniiɗe.”

⁶O tokki wi'go yam: “Ɗum waɗi, timmi. Min woni Alfa e Omega, fuɗɗoode e timmoode. Koo moy ɗomɗi, mi yarnan ɗum seeɓoore ndiyam ndokkanɗam ngeendam caahu.

⁷Koo moy jaali, mi hokkan ɗum kuuje man. Mi laatoto Allah makko, kaŋko boo o laatoto ɓiyam.

⁸Ammaa hulɓe, sooya-nuɗɗinki'en, waɗooɓe ko nyiddi, mbarooɓe ko'e, daakaare'en, waɗooɓe hiila, rewooɓe labbi e fewooɓe fuu, geɗal maɓɓe laatoto nder weendu wulanndu bee yiite e baruudu[26]. Kanjum woni maayde ɗiɗawre.”

⁹Nden gooto nder malaa'ika'en njoweeɗiɗo joginooɓe taasaaje joweeɗiɗi keewɗe masiibooji ragareeji joweeɗiɗi go wari, wi'i yam: “War, mi hollete ɓaŋaaɗo, waato debbo jawgel.”

¹⁰Ruuhu naŋngi yam, malaa'ikaajo go yahri yam haa dow hooseere townde masin. O holli yam Urusaliima, berniwol ceniiŋgol, iwŋgol haa Allah, ngol ɗon jippo diga asama,

¹¹ngol ɗon yayna bee tedduŋgal Allah. Ngol ɗon jalbita bana hayre marnde saman, bana hayre yaspa laaɓnde bana daarorgal.

¹²Mahol maagol maŋngol, towŋgol ɗon taari ngol, ngol woodi dammuɗe sappo e ɗiɗi. Malaa'ika'en sappo e ɗiɗo ɗon ayna dammuɗe man. Inɗe le'i Isra'iila sappo e ɗiɗi mbinndaama haa dammuɗe man.

¹³Ngol woodi dammuɗe tati haa fuunaaŋge, tati haa woyla[27], tati haa fombina[28] e tati boo haa hiirnaaŋge.

¹⁴Mahol berniwol ngol ɗon dari dow kaa'e caɓɓaaje sappo e ɗiɗi, dow maaje inɗe nelaaɓe jawgel sappo e ɗiɗo mbinndaama.

¹⁵Malaa'ikaajo bolwanɗo yam ɗon jogi sawru kaŋŋeeri ngam haa o foondira berniwol bee dammuɗe maagol e mahol maagol.

¹⁶Bakeeje berniwol poti kal-kal. Njuutirka bee njaajirka poti kal-kal. Malaa'ikaajo go foondi ngol bee sawru muuɗum go. Njuutirka maagol waɗi poondirɗi ujine sappo e ɗiɗi[29]. Njaajirka maagol foti kal-kal bee towirka maagol e njuutirka maagol.

¹⁷O foondi mahol. Towirka maagol waɗi piyanɗe teemerre e cappanɗe nayi e nayi (144)[30] fodde poondol yimɓe ngol malaa'ikaajo huuwtiniri.

¹⁸Mahol ngol mahaama bee kaa'e yaspa, ammaa berniwol mahaama bee kaŋŋeeri laaɓndi, ndi nanndi bee kiristal.

¹⁹Ɓale caɓɓaaje mahol berniwol ngol pawnaama bee kaa'e marɗe saman feere feere. Caɓɓawal aranal fawnaama bee yaspa, ɗiɗaɓal bee safira, tataɓal bee agate, nayaɓal bee imiradi,

²⁰jowaɓal onikis, joweego'oowal sardis, joweeɗiɗaɓal kirisoliti, joweetataɓal hayre haako-haakoore, joweenayaɓal topas, sappowal kirisoparasu[31], sappo e go'owal hayre lipinlaare, sappo e ɗiɗaɓal ametistu[32].

²¹Dammuɗe sappo e ɗiɗi ngoni luuluuje sappo e ɗiɗi. Dammugal koo ngale waɗaama bee luuluuri ngoori. Laawol berniwol ɗum kaŋŋeeri laaɓndi bana kiristal.

²²Mi yi'aay haykaliiru nder berniwol man, ngam Jawmiraawo Allah Baawɗo dow koo ɗume fuu woni haykaliiru maagol, kaŋko e jawgel.

²³Berniwol ngol walaa haaje naaŋge malla lewru yaynana ngol, ngam jayŋgol Allah ɗon yayna nder maagol, jawgel boo woni pittirla maagol.

²⁴Ummaatooje duniyaaru njahan nder annoora maagol, laamiiɓe duniyaaru njahran tedduŋgal muuɗum'en nder maagol.

²⁵Nyalawma, dammuɗe maagol maɓɓataako sam, ngam jemma wonataa ton.

²⁶Yimɓe ngaddan tedduŋgal e daraja ummaatooje fuu nder maagol.

²⁷Walaa coɓɗum fuu malla kuuwanɗo nyidduɗum e pewoowo keɓata nastugo ngol. Sey mo innde muuɗum winndaama nder deftere ngeendam nde jawgel mari tan heɓata nastugo.