Read Fulfulde Wahayu Yuhanna 3 Bible Online

Wahayu Yuhanna 3 - Fulfulde bible

Wahayu Yuhanna 3

¹“Winndan malaa'ikaajo jama'aare nuɗɗinɓe haa Sardis ni'i: Ndaa koŋngol iwŋgol haa marɗo ruuhuuji Allah joweeɗiɗi e koode joweeɗiɗi: Mi anndi kuuɗe ɗe kuuwata. Yimɓe ɗon mbi'a a geeto, alhaali boo a maayɗo!

²Hakkil, semmbiɗin ko lutti, ko ɓadake halkugo. Ngam mi tawi kuuɗe ma yeeso Allah am laataaki timmuɗe.

³Ngam man, siftor no a jaɓri e no a naniri koŋngol Allah, ɗowtan ngol, tuubu. To a hakkilaay, mi waran bana gujjo, a anndataa saa'i nde mi warata haa ma.

⁴Ammaa a woodi yimɓe seɗɗa haa Sardis ɓe tunwinaay limce muuɗum'en. Ɓe njahdan bee am ɓe ɓorniiɓe limce daneeje, ngam ɓe ke'i ɗum.

⁵Bana nii, jaaliiɗo fuu ɓornoto limce daneeje, mi wilataa innde maako diga deftere ngeendam. Yeeso Baabiraawo am e malaa'ika'en muuɗum boo mi wi'an fakat o goɗɗo am.

⁶Mo woodi noppi, sey nana ko Ruuhu wi'ata jama'aaje nuɗɗinɓe!”

⁷“Winndan malaa'ikaajo jama'aare nuɗɗinɓe haa Filadelfiya ni'i: Ndaa koŋngol iwŋgol haa Ceniiɗo, gooŋgaajo, jogiiɗo maɓɓitirɗum Daawuda, to o maɓɓiti, walaa mo maɓɓata, to o maɓɓi boo, walaa mo maɓɓititta.

⁸Mi anndi kuuɗe ma. Ndaa mi maɓɓiti dammugal yeeso ma, walaa baawɗo maɓɓugo ngal. Ngam koo nde semmbe ma ɗuuɗaay, ammaa a ɗowtani wolde am, a yeddaay innde am.

⁹Ndaa! Mi hokkete rewooɓe Sayɗaanu. Ɓe ɗon mbi'a ɓe Yahuudu'en, ammaa ɓe ɗon pewa, ɓe laataaki Yahuudu'en. Mi nelan ɓe haa ɓe tugga koppi, ɓe turo les kosɗe ma, haa ɓe paama mi yiɗi ma.

¹⁰Mi aynete jam nder wakkatiire torra ngaranka dow duniyaaru fuu ngam jarribaago jooɗiiɓe nder maaru, ngam a ɗowtani wolde nde mi umri ma bee tiiɗal.

¹¹Mi ɓadake wargo. Joga ko marɗa, ngam taa koo moy jaɓta woronnde jaalorgal ma.

¹²Mi laatinan jaaliiɗo fuu daŋraŋgal nder haykaliiru Allah am, o meetataa sottineego ton. Mi winndan innde Allah am dow maako e innde berniwol Allah am, waato Urusaliima kesol ngol jippoto asama diga Allah am. Mi winndan innde am hesre dow maako boo.

¹³Mo woodi noppi, sey nana ko Ruuhu wi'ata jama'aaje nuɗɗinɓe!”

¹⁴“Winndan malaa'ikaajo jama'aare nuɗɗinɓe haa Lawdikiya ni'i: Ndaa koŋngol iwŋgol haa bi'eteeɗo Aamiina, ceedoowo koolaaɗo, gooŋgaajo, iwde tagefooji ɗi Allah tagi fuu.

¹⁵Mi anndi kuuɗe ma, a laataaki peewɗo malla gulɗo. To a laatakeno gulɗo malla peewɗo ɓuran.

¹⁶Ngam a ɗon caka cak, a laataaki gulɗo malla peewɗo, mi tuutete diga hunnduko am.

¹⁷Ngam a ɗon wi'a: Mi riski, mi woodi jawdi, walaa ko mi sooyi sam. Ammaa a anndaa a ɗon laalaato, a jurumɗo, a laafuɗo, a bumɗo e a temmbo.

¹⁸Ngam maajum mi ɗon waso ma: Soodu haa am kaŋŋeeri laɓɓinaandi bee yiite ngam haa a riska. Soodu limce daneeje boo ngam haa a ɓorno, a sudda cemtuɗum temmbu maaɗa. Kadiboo soodu lekki ngam gite ma, ngam haa a heɓa yi'ugo.

¹⁹Yimɓe ɓe ngiɗmi, mi ɗon fela ɓe, mi ɗon elta ɓe. Nden kam, waɗ tiinaare, tuubu.

²⁰Ndaa, mi ɗon dari haa dammugal, mi ɗon silmino. To goɗɗo nani sawtu am, maɓɓiti dammugal, mi nastan suudu maako, min bee maako, min nyaamdan.

²¹Mi hokkan jaaliiɗo laawol jooɗodaago bee am dow leeso laamu am, bana no min boo mi jaali, mi ɗon jooɗodi bee Baabiraawo am dow leeso laamu mum.

²²Mo woodi noppi, sey nana ko Ruuhu wi'ata jama'aare nuɗɗinɓe!”