Read Fulfulde Wahayu Yuhanna 7 Bible Online

Wahayu Yuhanna 7 - Fulfulde bible

Wahayu Yuhanna 7

¹Ɓaawo man mi yi'i malaa'ika'en nayo ɗon ndari haa alkibilaaji duniyaaru nayi fuu. Ɓe ɗon njogi keni duniyaaru nayi fuu ngam taa ɗi mbifa haa lesdi malla dow mbeela malla haa leɗɗe fuu.

²Mi yi'i malaa'ikaajo feere ɗon wara diga fuunaaŋge, o ɗon jogi haatummeere lammba Allah geeto. O wooki bee sawtu, o wolwani malaa'ika'en nayo ɓe Allah hokki baawɗe waɗugo bonnonda haa lesdi e mbeela.

³Malaa'ikaajo oo wi'i: “Taa mbonne lesdi malla mbeela malla leɗɗe, haa to min mbaɗi lammba dow tiiɗe jagganooɓe Allah meeɗen.”

⁴Mi nani limgal waɗanaaɓe haatummeere lammba Allah, ɓe ujine teemerre e cappanɗe nayo e nayo (144.000) iwɓe haa le'i Isra'iila'en fuu:

⁵Lenyol Yahuuda, ujine sappo e ɗiɗo. Lenyol Ruben, ujine sappo e ɗiɗo. Lenyol Gada, ujine sappo e ɗiɗo.

⁶Lenyol Aser, ujine sappo e ɗiɗo. Lenyol Neftali, ujine sappo e ɗiɗo. Lenyol Manassa, ujine sappo e ɗiɗo.

⁷Lenyol Simeyon, ujine sappo e ɗiɗo. Lenyol Lewi, ujine sappo e ɗiɗo. Lenyol Issakar, ujine sappo e ɗiɗo.

⁸Lenyol Zabulon, ujine sappo e ɗiɗo. Lenyol Yusufu, ujine sappo e ɗiɗo. Lenyol Benyamin, ujine sappo e ɗiɗo. Fuu ɓe keɓi lammba Allah.

⁹Ɓaawo man mi yi'i mooɓre ɗuuɗnde nde goɗɗo waawataa limugo. Ɓe iwi haa ummaatooje e asli e jama'aaje e ɗemɗe fuu. Ɓe ɗon ndari yeeso leeso laamu e yeeso jawgel, ɓe ɗon ɓorni ngapaleeji daneeji, ɓe ɗon njogi lice dibinooje.

¹⁰Ɓe fuu ɓe ngooki bee sawtu, ɓe mbi'i: “Kisndam iwi haa Allah amin, jooɗiiɗo dow leeso laamu e haa jawgel!”

¹¹Malaa'ika'en fuu ɗon ndari, ɗon taari leeso laamu e ndotti'en e kuuje geete nayi go, ɓe turi yeeso leeso laamu, ɓe cujidani Allah,

¹²ɓe mbi'i: “Aamiina! Maŋgtoore, tedduŋgal, hikma, yettoore, daraja, baawɗe e semmbe fuu laatano Allah amin haa abada abadin. Aamiina!”

¹³Nden gooto nder ndotti'en ƴami yam: “Ɓorniiɓe ngapaleeji daneeji ɓe'e, ɗum ɓeye e diga toy ɓe iwi?”

¹⁴Mi jaabi mo: “Naywa an woni annduɗo.” O wi'i yam: “Kamɓe ɓe munyani torra makka. Ɓe looti ngapaleeji maɓɓe, ɓe ndanwini ɗi bee ƴiiƴam jawgel.

¹⁵Ngam maajum ɓe ɗon yeeso leeso laamu Allah, ɓe ɗon mbaɗana mo dewal jemma bee naaŋge nder haykaliiru maako. Jooɗiiɗo dow leeso laamu ɗon ayna ɓe les laymaaru muuɗum.

¹⁶Ɓe meetataa maatugo dolo malla ɗomka, naaŋge malla gulɗum meetataa torrugo ɓe,

¹⁷ngam jawgel gonŋgel haa caka leeso laamu laatoto gaynaako maɓɓe, yahran ɓe haa ceeɓooje ndiyam ndokkanɗam ngeendam. Allah boo woostan gonɗi fuu haa gite maɓɓe.”