Read Fulfulde Wahayu Yuhanna 8 Bible Online

Wahayu Yuhanna 8 - Fulfulde bible

Wahayu Yuhanna 8

¹Nde jawgel takkiti takkannde joweeɗiɗawre, asama fuu de'i siriw baakin reeta saa'a.

²Nden mi yi'i ɓe ndokki malaa'ika'en njoweeɗiɗo dariiɓe yeeso Allah luwe joweeɗiɗi.

³Malaa'ikaajo feere wari, dari kommbi hirsirde, o ɗon jogi taasawo kaŋŋeeri ngam wulugo uurle. Ɓe ndokki mo uurle ɗuuɗɗe haa o wula ɗe hawtaade bee do'aaje senaaɓe fuu dow hirsirde kaŋŋeeri dariinde yeeso leeso laamu.

⁴Cuurɗe uurle man ummi bee do'aaje senaaɓe diga juŋngo malaa'ikaajo dariiɗo yeeso Allah go.

⁵Nden malaa'ikaajo hoo'i taasawo wulugo uurle go, hebbini ngo bee yiite dow hirsirde, sakkini nge haa duniyaaru. Diggaali ndiggi, hoolooji mbaɗi, ma'e ma'i, lesdi dimmbi.

⁶Nden malaa'ika'en njoweeɗiɗo marɓe luwe joweeɗiɗi go taaski fuufugo ɗe.

⁷Malaa'ikaajo arano fuufi luwal muuɗum. Mallimallooje e yiite jillindiraaŋge bee ƴiiƴam toɓi dow lesdi. Yeɓre[7] duniyaaru woore nder tati e yeɓre leɗɗe woore nder tati e huɗo hecco fuu yiite nyaami ɗum.

⁸Nden malaa'ikaajo ɗiɗaɓo fuufi luwal muuɗum. Ko nanndi bee hooseere mawnde jamnaande sakkinaama nder mbeela. Yeɓre mbeela woore nder tati laati ƴiiƴam,

⁹yeɓre tagefo mbeela woore nder tati waati, yeɓre koommbooje[8] woore nder tati boo natti.

¹⁰Nden malaa'ikaajo tataɓo fuufi luwal muuɗum. Horre mawnde jamnaande bana jamre do'i diga asama, yani dow yeɓre maaje ndiyam woore nder tati e dow ceeɓooje ndiyamji.

¹¹Innde horre man, Kaaɗeeŋga. Yeɓre ndiyamji woore nder tati haaɗi rok haa yimɓe ɗuuɗɓe maayi ngam daliila ndiyamji kaaɗɗi ɗi'i.

¹²Nden malaa'ikaajo nayaɓo fuufi luwal muuɗum. Nder geɓe naaŋge tati, woore fiyaama, non boo yeɓre lewru woore e yeɓre koode woore, haa yeɓre jayŋgol man woore nder tati nyifi. Yeɓre jayŋgol nyalawma woore nder tati nyifaama, non boo jemma.

¹³Nden mi yi'i e mi nani dutal piiranŋgal nder hawa ɗon wi'a bee sawtu: “Kayto, Kayto! Kayto! Bone laatanto jooɗiiɓe haa duniyaaru ngam daliila hoolo luwe malaa'ika'en luttuɓe tato tammi fuufugo!”