Read Fulfulde Ruut 2 Bible Online

Ruut 2 - Fulfulde bible

Ruut 2

¹Woodi banndiraawo Elimelek gorko Na'omi, o marɗo baawɗe, diskuɗo, innde maako Bo'es.

²Nyannde feere Ruut Mo'abiijo wi'i Na'omi: “Accu mi yaha ngesa, mi suɓta caamndi ɓaawo wa'ooɓe to ɓe ngerdi ɗum.” Na'omi jaabi mo: “Booɗɗum, yah, ɓiŋngel am.”

³Ruut yehi wapi ngesa Bo'es, banndiraawo Elimelek, suɓti caamndi ton ɓaawo wa'ooɓe.

⁴Nden Bo'es wurti Baytilaama, wari haa ngesa ka'a, hoofni wa'ooɓe mum, wi'i: “Jawmiraawo wonda bee mooɗon.” Ɓe njaabi: “Jawmiraawo barkiɗine.”

⁵Bo'es ƴami ardiiɗo wa'ooɓe: “Moy jeyi paanyo debbo oo?”

⁶Ardiiɗo go jaabi: “O Mo'abiijo garduɗo bee Na'omi diga lesdi Mo'ab.

⁷O tori yam duŋayeere tokkaago wa'ooɓe haa o suɓta caamndi caka baagaaje. O ɗon diga fajiri e haa jonta o ɗon huuwa. O siwti seɗɗa tan nder suudu.”

⁸Nden Bo'es wi'i Ruut: “Nanam, ɓiŋngel am. Taa yah suɓtugo haa ngesa feere. Taa dillu, ammaa wondu bee horɓe am,

⁹laar haa pellel ngel ɓe kuuwata, nden tokka ɓe. Mi umri sukaaɓe am, taa ɓe ɓille. To a ɗomɗi, yar haa bulki ɗi ɓe kebbini ndiyam.”

¹⁰Ruut tuggi koppi, sujidi yeeso maako, wi'i mo: “Ngam ɗume keɓmi mo'ere haa maaɗa? Ngam ɗume a suklanto goɗɗo jananno bana am?”

¹¹Bo'es jaabi mo: “Mi nani booɗɗum ko mbaɗanɗa esiraawo ma ɓaawo maayde gorko ma fuu. A acci baaba ma e daada ma e lesdi danyeeki ma, a wari haa yimɓe ɓe a meeɗaay anndugo.

¹²Jawmiraawo warjo ma mbooɗeeŋga man. Mbarjaari ma heewa haa Jawmiraawo, Allah Isra'iila, haa ngarɗa ɗaɓɓititgo hisrude.”

¹³Ruut jaabi: “Accu mi heɓa mo'ere haa maaɗa, jaagorɗo am ngam a de'itini yam, a seyni yam, koo nde mi wonaay gooto caka horɓe ma boo.”

¹⁴Nde wakkati nyaamugo waɗi, Bo'es wi'i Ruut: “Ɓadita, nyaam tamseere, tallu loŋngere ma nder haako boo.” Ruut jooɗi kommbi wa'ooɓe. Bo'es hokki mo gabbe ca'aaɗe[4], o nyaami, o haari, o sigi luttaandi man.

¹⁵Nden o ummi ngam suɓtugo caamndi fahin. Bo'es umri sukaaɓe mum: “Acce mo o suɓta caka baagaaje boo, taa cemtine mo.

¹⁶Coltinane mo boo cammeeje haa o suɓta ɗe, taa pele mo.”

¹⁷Ruut suɓti haa ngesa man haa kiikiiɗe waɗi. Nden o fiyi ko o suɓti, ɗum waɗi baakin sa'iiruuri muudooje jowi.

¹⁸O roondi ɗum, o lorti nder berniwol, o holli ɗum esiiko. O hokki mo luttaandi maako go.

¹⁹Na'omi ƴami mo: “Toy cuɓtuɗaa hannde? Haa ngesa moy kuuwɗaa? Allah barkiɗin cuklaniiɗo ma.” Ruut anndini esum, wi'i: “Gorko mo kuuwmi haa ngesa mum hannde, innde mum Bo'es.”

²⁰Na'omi wi'i esum: “Allah barkiɗin mo. Jawmiraawo accaay waɗango yeeɗɓe e maayɓe mbooɗeeŋga.” Nden o tokki wi'ugo: “Gorko oo, o banndiraawo men, o gooto nder soottooɓe en.”

²¹Ruut wi'i esum: “O yecci yam boo mi wonda bee yimɓe maako haa to ɓe timmini codol maako fuu.”

²²Na'omi wi'i Ruut: “Nonnon, ɓiŋngel am, ndikka a huuwda bee horɓe haa ngesa Bo'es. Ngam to a yehi haa ngesa feere, teema ɓe toskete.”

²³Bana nii Ruut huuwdi bee maɓɓe, suɓti caamndi haa ɓe timmini wa'go sa'iiruuri e alkamaari fuu. O tokki jooɗodaago bee esiiko.