Read Fulfulde Ruut 3 Bible Online

Ruut 3 - Fulfulde bible

Ruut 3

¹Nyannde feere Na'omi wi'i Ruut: “Ɓiŋngel am, sey mi heɓane gorko, haa keɓa saare, njooɗoɗa jam.

²Siftor Bo'es mo ngondunooɗa bee horɓe mum, o banndiraawo men. Jemmaare nde'e o fiyan sa'iiruuri maako haa laarre[5].

³Yiiwa, wuja nebbam uurɗam, ɓornu limce ma, yah haa laarre man. Ammaa taa waŋginan mo hoore ma haa to o timmini nyaamugo e yarugo.

⁴Heɓtu nokkuure haa o waaloto. To o ɗaanake, yah, ɓaŋtu suddaare maako, waala haa kosɗe maako. Kaŋko o yeccete ko mbaɗata.”

⁵Ruut jaabi: “Iyyo! Mi waɗan ko mbi'ɗa fuu.”

⁶Ruut yehi haa laarre, o waɗi ko esiiko umri mo fuu.

⁷Nde Bo'es timmini nyaamugo e yarugo, ɓernde maako boo seyi, o yehi haa sera waagaare, o waali ton. Nden Ruut wari bee sirri, ɓaŋgti suddaare maako, waali haa kosɗe maako.

⁸Caka jemma Bo'es diwtori, o wayliti, o yi'i, ndaa debbo ɗon waali haa kosɗe maako!

⁹Bo'es ƴami mo: “Ɗum moy?” O jaabi: “Min, Ruut, korɗo ma. Te'am, ngam an woni coottoowo yam.”

¹⁰Bo'es jaabi: “Jawmiraawo barkiɗine, ɓiŋngel am! A waɗi booɗɗum, amaana ka ɓuri ka naane, ngam a ɗaɓɓitaay suka'en riskuɓe koo laafuɓe boo.

¹¹Taa sakla jonta, ɓiŋngel am, ko ƴamɗa yam fuu, mi waɗante ɗum. Koo moy nder berniwol anndi a debbo marɗo saman.

¹²A wi'i gooŋga, mi coottoowo ma. Ammaa woodi coottoowo feere ɓurɗo yam ɓadaago on.

¹³Waala ɗo, fajiri en ngi'an ko o waɗata. To o jaɓi soottugo ma, ɗum booɗɗum. To o jaɓaay, nden kam min mi soottete, fakat bana Jawmiraawo o geeto. Kadi ɗaana jonta haa to weeti.”

¹⁴Ruut waali haa kosɗe Bo'es haa subaha. Hiddeko koo moy anndita goɗɗo, o ummi ngam Bo'es wi'no: “Taa yimɓe anndita debbo oo wari haa laarre.”

¹⁵Nde Ruut yiɗi dillugo, Bo'es wi'i mo: “Fiistu mojaare ma, joga nde booɗɗum.” Ruut jogi nde, Bo'es etani mo muudooje sa'iiruuri joweego, o walli mo roondaago ndi. Nden Ruut lorti haa berniwol,

¹⁶warti haa esum. Na'omi ƴami mo: “Ɗum an boo, ɓiŋngel am?” Ruut yecci mo ko Bo'es waɗani mo fuu.

¹⁷O wi'i: “O hokki yam sa'iiruuri muudooje joweego ɗe'e, ngam o wi'i: A hootataa haa esiraawo ma juŋngo meere.”

¹⁸Na'omi wi'i mo: “Munyu, ɓiŋngel am, haa to a annditi no haala ka timmirta. Gorko oo siwtataako hannde, sonaa to o laɓɓini ka fuu.”