Read Fulfulde 1 Samuyila 1 Bible Online

1 Samuyila 1 - Fulfulde bible

1 Samuyila 1

¹Ɓooyma woodi goɗɗo haa Ramatayim-Cofim nder kooseeje Efrayim. Innde maako Elkaana ɓii Yeroham ɓii Elihu ɓii Toku ɓii Cuuf, nder lenyol Efrayim.

²Elkaana woodi rewɓe ɗiɗo. Innde oo Hanna, innde oya boo Peninna. Peninna woodi ɓikkoy, ammaa Hanna woodaa ɓikkoy.

³Hitaande fuu Elkaana ɗon yaha bee saare mum haa Silo ngam sujidango Jawmiraawo honooɓe asama e lii'ango mo kirseteeŋga. Zamanu man Hofni e Pinehas, ɓiɓɓe Eeli ngonno liman'en Jawmiraawo ton.

⁴Nde ɓe kawti ngam nyaamugo kusel ndabbaawa kirsaaŋga fuu, Elkaana ɗon hokka Peninna, debbo mum e ɓiɓɓe mum worɓe e rewɓe fuu geɗal gootal.

⁵Ammaa Hanna, o ɗon hokka mo geɗe ɗiɗi, ngam o yiɗi mo masin, koo nde Jawmiraawo laatini mo dimaro.

⁶Nawliiko ɓilli mo tum ngam mettingo mo ngam o dimaro.

⁷Bana nii ɗum laatori hitaande fuu to Hanna yehi haa suudu Jawmiraawo. Peninna mettini mo haa o woyi, o sali nyaamugo.

⁸Goriiko ƴami mo: “Ko waɗi a ɗon woya, a nyaamataa? Ko sakli ma? Mi ɓurantaa ma ɓiɓɓe worɓe sappo na?”

⁹Ɓaawo ɓe nyaami e ɓe njari haa Silo, Hanna ummi. Eeli, limanjo ɗon jooɗi dow koromwal mum baŋnge nastirde suudu Jawmiraawo.

¹⁰Ɓernde Hanna metti masin, o tori Jawmiraawo bee bojji ɗuuɗɗi.

¹¹O togi togayeere, o wi'i: “Yaa Jawmiraawo honooɓe asama, laar bone korɗo ma, siftoram, ittanam mbustu ngu'u! To a hokki yam ɓiɗɗo gorko, fakat mi hokkititte mo balɗe ngeendam maako fuu. Gaasa hoore maako meeɗataa laɓeego.”

¹²Hanna neeɓi toraago Jawmiraawo, Eeli boo ɗon laara mo.

¹³O yi'i hunnduko Hanna ɗon dimmbo, ammaa o nanaay sawtu ngam Hanna ɗon wolwa nder ɓernde mum. Ngam maajum Eeli tammi o ɗon wuyki.

¹⁴O feli mo, o wi'i: “Haa jonta a ɗon nder wuykere ma? Ittu wuykere ma.”

¹⁵Hanna jaabi mo: “Aa'a, barkaama, mi yaraay inaboojam malla nguykinoojam sam, ammaa mi debbo cuniiɗo. Mi rufi ko woni haa ɓernde am fuu yeeso Jawmiraawo.

¹⁶Taa nanndinam bee rewɓe meere'en. Ɓernde am naawi masin, suno e mettamɓeram ɗuuɗani yam. Ngam maajum ɗuɗɗinmi bolle.”

¹⁷Eeli wi'i mo: “Yah jam. Allah Isra'iila jaɓa tornde nde toriiɗa mo.”

¹⁸Hanna jaabi: “Useni mo'an korɗo ma foroy.” Nden o dilli, o nyaami, ɓanndu maako ferti.

¹⁹Jaŋngo maajum Elkaana e yimɓe saare mum ndawi cub haa ɓe cujidana Jawmiraawo. Nde ɓe ngarti, ɓe njehi haa Rama. Elkaana hawti bee debbo mum, Jawmiraawo jaɓi tornde Hanna.

²⁰Hanna reedi, danyi ɓiɗɗo gorko. O wi'i: “Mi tori mo haa Jawmiraawo.” Ngam maajum o inndi mo Samuyila.

²¹Mawri maajum Elkaana yehi fahin haa Silo, kaŋko e yimɓe saare maako fuu, ngam haa o lii'ano Jawmiraawo kirseteeŋga hitaande man e kirseteeŋga feere nga o togi ɗum.

²²Hanna yahdaay bee maɓɓe, o wi'i goriiko: “To mi enti ɓiŋngel, saa'i man mi yahran ngel haa suudu Jawmiraawo, ngel jooɗo ton haa foroy.”

²³Elkaana jaabi mo: “Waɗ ko fottani ma, jooɗa haa saare haa to a enti ngel. Jawmiraawo boo tabitin wolde mum nde o wi'no dow maagel.” Bana nii Hanna jooɗi haa saare, hakkilani ɓiyum Samuyila.

²⁴Ɓaawo Hanna enti mo, o yahri mo haa suudu Jawmiraawo haa Silo. O yahri boo ngaari ndi duuɓi tati e kuroori buhuure e kanyakanyaawu[1] inaboojam. Wakkati man Samuyila o ɓiŋngel pamarel tawon.

²⁵Nde saaro'en maako kirsi ngaari, ɓe ngaddi ɓiŋngel haa Eeli.

²⁶Hanna wi'i: “Barkaama, a ɗon siftora na? Min woni debbo darinooɗo haa ɗo ngam toraago Jawmiraawo.

²⁷Ndaa ɓiŋngel ngel toriimi haa maako, Jawmiraawo hokki yam ko mi ƴamno mo.

²⁸Min boo mi hebbinan togayeere am: Mi hokkitan Jawmiraawo ɓiɗɗo am, o laato mo maako balɗe ngeendam maako fuu.” Nden ɓe cujidani Jawmiraawo.