Read Fulfulde 1 Samuyila 13 Bible Online

1 Samuyila 13 - Fulfulde bible

1 Samuyila 13

¹Sawulu woodi duuɓi …[9] saa'i o laamo. O laamani Isra'iila'en duuɓi ɗiɗi.

²Sawulu suɓi worɓe ujine tato (3.000) nder Isra'iila'en, wi'i luttuɓe ɓe koota. Ujine ɗiɗo ɗon ngondi bee maako haa Mikmas e dow kooseeje kommbi Baytila. Ujineere boo ɗon ngondi bee Yonatan, ɓiyiiko, haa Gibiya-Benyamin.

³Yonatan mbari aynooɓe Filisti'en haa Geba, Filisti'en nani habaru maajum. Sawulu umri fuufugo luwal konu nder lesdi fuu, wi'i: “Sey Ibraniŋke'en fuu nana ɗum!”

⁴Isra'iila'en fuu nani haala man, mbi'i: “Sawulu mbari aynooɓe Filisti'en, ummini nganyŋgu maɓɓe.” Ngam maajum worɓe Isra'iila fuu mooɓti haa Sawulu haa Gilgal.

⁵Filisti'en boo mooɓti ngam haɓre bee Isra'iila'en. Ɓe ngoodi mootaaji pucci ujine cappanɗe tati (30.000), wa'iiɓe pucci ujine njoweego (6.000) e honooɓe woɗɓe ɗuuɗɓe bana njaareendi maayo. Ɓe ngari, ɓe caŋngini haa Mikmas, haa fuunaaŋge Baytawiina.

⁶Nde Isra'iila'en ngi'i ɓe ɗon yeeso joote ngam konne'en ɓaditi ɓe masin, ɓe nyukki nder lowi, nder kooraaje, caka tapaaje, nder cuuɗi gasaaɗi e nder ɓulli.

⁷Woɗɓe maɓɓe ndoggi haa gaɗa maayo Urdun, haa lesdi Gada e Gile'at. Ammaa Sawulu ɗonno haa Gilgal, yimɓe wonduɓe bee maako ndiwni ngam kulol.

⁸Samuyila wi'no mo o reena nyalɗe joweeɗiɗi. Ammaa nde Samuyila waraay tawon, yimɓe puɗɗi saŋkitaago.

⁹Ngam maajum Sawulu umri waddugo dabbaaji ngam nguleteeŋga e kirseteeɗi ngam kawtal yimɓe, nden o lii'i nguleteeŋga.

¹⁰Nde o timmini lii'aago nguleteeŋga, Samuyila wari. Sawulu yehi haa fotta bee maako, hoofna mo.

¹¹Samuyila ƴami mo: “Ko mbaɗɗa ɗo?” Sawulu jaabi: “Yimɓe puɗɗi saŋkitaago ngam a waraay nder saa'iire ta'aande. Filisti'en boo ɗon mooɓi haa Mikmas.

¹²Ngam maajum mi numi: Jonta Filisti'en ukkanto yam haa Gilgal, min boo mi toraaki yerduye Jawmiraawo tawon. Kanjum mi tiɗɗini ɓernde am, mi lii'ani mo nguleteeŋga.”

¹³Samuyila wi'i mo: “Kay, a waɗi faataare! Koni a ɗowtanaaki umroore Allah Jawmiraawo maaɗa? O tabitinanno laamu ma dow Isra'iila haa foroy,

¹⁴ammaa jonta ngu tabitittaa. Jawmiraawo suɓani hoore mum goɗɗo ɓurɗo fottango mo dow maaɗa, haa o waɗa mo ardiiɗo yimɓe maako ngam a ɗowtanaaki ko Jawmiraawo umri.”

¹⁵Nden Samuyila ummi haa Gilgal, yehi haa Gibiya nder lesdi Benyamin. Sawulu limi yimɓe mum, ɓe ɗon baakin worɓe teemeɗɗe njoweego.

¹⁶Sawulu e Yonatan ɓiyum e wonduɓe bee muuɗum'en caŋngini haa Geba nder lesdi Benyamin. Ammaa Filisti'en ɗon caŋngini haa Mikmas.

¹⁷Filisti'en neli mooɓe honooɓe tati ngam wilugo e jaɓtugo: Mooɓre arannde yehi haa Ofra nder lesdi Su'al,

¹⁸mooɓre ɗiɗawre haa Baytihurun e mooɓre tataɓre boo haa kooseeje dow Waadiwol-Pobbi haa sera ladde.

¹⁹Wakkati maajum walaa kilaajo nder lesdi Isra'iila fuu, ngam Filisti'en ngiɗaano Isra'iila'en mbaɗa kaafaaje malla labbe.

²⁰Ɗum dooli Isra'iila'en yahugo haa Filisti'en ngam welnugo baaneeje e gasirɗe e pe'irɗe e bafɗi.

²¹Ngam welnugo fe'irde malla ngam wo'itingo seɓatto sawru gaynaako, sey ɓe njoɓa suleyre. Ngam welnugo baaneewo malla wafdu boo suleyje ɗiɗi.

²²Ngam maajum nyalaade haɓre walaa kaafahi malla labbo haa juuɗe Isra'iila'en, sey Sawulu e Yonatan ɓiyum ngoodi balmi, kamɓe tan.

²³Filisti'en neli mooɓre honooɓe ngam haa ɓe ayna laawol Mikmas.