Read Fulfulde 1 Samuyila 15 Bible Online

1 Samuyila 15 - Fulfulde bible

1 Samuyila 15

¹Samuyila wari haa Sawulu, wi'i mo: “Naane Jawmiraawo nelino yam ngam haa mi moyte haa a laato laamiiɗo yimɓe maako Isra'iila'en. Ngam maajum nan umroore maako jonta.

²Ndaa nii Jawmiraawo honooɓe asama wi'i: Mi yiɗi waataago ko yimɓe Amalek mbaɗi Isra'iila'en, no ɓe kaɗiri ɓe laawol yaake ɓe ngurti Misra.

³Yah, haɓu bee Amaleki'en jonta, nattin ɓe kamɓe e ko ɓe mari fuu, taa enɗa ɓe sam. Mbare worɓe e rewɓe, derke'en e musinankoy, na'i e dammooji e geelooɗi e bamɗe fuu.”

⁴Sawulu ewni yimɓe mum ɓe ngara haa Telayim. O limi ɓe ton: Honooɓe ujine teemeɗɗe ɗiɗo (200.000), non boo worɓe Yahuuda ujine sappo (10.000).

⁵Ɓe njahdi bee maako haa berniwol Amaleki'en, ɓe mbaɗi baaltol nder waadiwol kommbi berniwol man.

⁶Sawulu neldi habaru haa Keni'en, wi'i ɓe: “Ndille, ngurte caka Amaleki'en, ngam taa mi halka on bana maɓɓe. Ngam saa'i Isra'iila'en ɗonno ngara diga Misra, onon on kolli ɓe mbooɗeeŋga.” Keni'en cenndiri bee Amaleki'en.

⁷Nden Sawulu ukkani Amaleki'en, jaali ɓe diga Hawila haa yotti Sura haa fuunaaŋge Misra.

⁸Sawulu e yimɓe mum nattini ɓe fuu bee kaafahi, ammaa ɓe naŋngi Agag, laamiiɗo Amaleki'en.

⁹Ɓe acci mo o geeto, kaŋko e ɓurɗum wooɗugo haa dammooji e na'i e borti e ko mari saman fuu. Ɓe nattini dabbaaji tampuɗi e ɗi mbooɗaay tan.

¹⁰Jawmiraawo wi'i Samuyila:

¹¹“Ɓernde am ɗon naawa ngam mi laamini Sawulu, o wayliti, o acci yam, o ɗowtanaaki umrooje am.” Kanjum ɗum naawi Samuyila, o woyani Jawmiraawo jemmaare man fuu.

¹²Jaŋngo maajum o dawi cub, o yehi ngam fottugo bee Sawulu. O nani Sawulu warno haa Karmel, darnani hoore mum hayre maandorde, dilli haa Gilgal.

¹³Nde Samuyila yotti ton, Sawulu hoofni mo, wi'i: “Jawmiraawo barkiɗine. Mi waɗi ko Jawmiraawo umri yam.”

¹⁴Ammaa Samuyila ƴami mo: “Ko mi nanata ɗo, naa ɗum bojji dammooji e boodaali na'i na?”

¹⁵Sawulu jaabi: “Yimɓe koo'i na'i e dammooji ɓurɗi wooɗugo haa Amaleki'en ngam lii'anaago ɗi Jawmiraawo Allah maaɗa kirseteeɗi. Ammaa luttuɗi fuu min nattini ɗi.”

¹⁶Samuyila wi'i Sawulu: “He'i kam! Haa mi yecce ko Jawmiraawo wi'i yam jemmaare saaliinde.” Sawulu wi'i: “Mi ɗon heɗito.”

¹⁷Samuyila wi'i mo: “Wakkati a maraayno saman, a laati ardiiɗo le'i Isra'iila, Jawmiraawo suɓi ma a laato laamiiɗo maaji.

¹⁸O neli ma, o umri ma a haɓa bee Amaleki'en hakke'en ɓe'e haa a nattina ɓe.

¹⁹Koni a ɗowtanaaki mo? Koni a yaawɗi ɓoftugo keɓal konu? A waɗi ko haanaay yeeso Jawmiraawo.”

²⁰Sawulu jaabi: “Na mi ɗowtani umroore Jawmiraawo? Mi yehi bana o wi'i yam, mi halki Amaleki'en fuu. Mi naŋngi Agag, laamiiɗo maɓɓe, mi waddi mo haa ɗo.

²¹Ammaa yimɓe am nattinaay ɓurɗum wooɗugo haa keɓal konu, waato na'i e dammooji booɗɗi, ngam haa ɓe lii'ano ɗi Allah Jawmiraawo maaɗa haa Gilgal ɗo.”

²²Ammaa Samuyila wi'i: “Ɗume ɓuri fottango Jawmiraawo, guleteeɗi e kirseteeɗi na malla to goɗɗo ɗowtanake umroore maako? Fakat, ɗowtaare ma ɓuran seynugo mo dow kirseteeɗi jawɗi payɗi fuu.

²³Luutugo umroore maako halli bana kaaramaaku, tuurtango mo boo halli bana rewugo labbi. An a wudini umroore Jawmiraawo, ngam maajum o wudini ma, o ɓorti ma laamu.”

²⁴Sawulu jaabi: “Gooŋga, mi waɗi hakke. Mi luuti umroore Jawmiraawo e anndinol maaɗa, ngam mi huli yimɓe am, mi waɗi ko ɓe ngiɗi.

²⁵Ammaa jonta yaafanam hakke am, yahdu bee am haa Gilgal, haa mi sujidana Jawmiraawo.”

²⁶Samuyila wi'i mo: “Aa'a, mi yahdataa bee ma. A wudini umroore Jawmiraawo, kaŋko boo o wudini ma, a laamantaako Isra'iila fahin.”

²⁷Samuyila wayliti haa dilla. Ammaa Sawulu naŋngi gawargal limce Samuyila haa ngal seeki.

²⁸Samuyila wi'i: “Bana nii Jawmiraawo seekiri laamu Isra'iila dow maaɗa hannde, hokki ngu goɗɗo feere ɓurɗo ma fottugo.

²⁹Jawmiraawo Allah Isra'iila, o tedduɗo, o fewataa, o mimsitittaa boo, ngam naa o neɗɗo.”

³⁰Sawulu wi'i: “Mi waɗi hakke. Ammaa teddinam jonta yeeso ndotti'en yimɓe am e yeeso Isra'iila'en, yahdu bee am haa mi sujidana Allah Jawmiraawo maaɗa.”

³¹Samuyila jaɓi, yahdi bee maako haa Gilgal. Nde Sawulu timmini sujidango Jawmiraawo,

³²Samuyila umri: “Ngaddaneeɗam Agag, laamiiɗo Amaleki'en.” Agag wari haa maako o de'itɗo ngam o numi: “Jonta kam joote maayde ittake.”

³³Ammaa Samuyila wi'i mo: “Kaafahi ma sooyni rewɓe ɗuuɗɓe ɓikkoy muuɗum'en. Bana nii daada ma boo sooyan ɓiyum jonta.” Nden o ta'i Agag geɓe geɓe yeeso Jawmiraawo haa Gilgal.

³⁴Ɓaawo maajum Samuyila yehi haa Rama. Sawulu boo hooti saare mum haa Gibiya.

³⁵Samuyila jooɗi nder suno ngam ɓernde Jawmiraawo metti daliila Sawulu mo o laaminino dow Isra'iila. O meetaay yi'ugo Sawulu haa nyalaade maayde maako.