Read Fulfulde 1 Samuyila 20 Bible Online

1 Samuyila 20 - Fulfulde bible

1 Samuyila 20

¹Daawuda ummi Nayot haa Rama, o doggi, o wari haa Yonatan, o ƴami mo: “Aybewol ngole mi waɗani baaba ma? Ngam ɗume o ɗon ɗaɓɓa mbarugo yam?”

²Yonatan wi'i: “Aa'a, o mbarataa ma, waɗataako! Baaba am waɗataa koo ɗume, koo mawɗum koo peetum, sonaa o aarta, o yeccammi ɗum. Kadi o suuɗatam huunde nde mbi'ɗa na? Irin maajum laatataako!”

³Ammaa Daawuda huni, wi'i: “Baaba ma anndi booɗɗum a yerdi yam. Ngam maajum o anndinaay ma ko o tammi waɗugo, ngam taa ɓernde ma naawa. Fakat bana Jawmiraawo o geeto, an boo a geeto, hakkunde am bee waade kam, falannde woore tan.”

⁴Yonatan wi'i: “Mi waɗante ko ngiɗɗa fuu.”

⁵Daawuda wi'i: “Booɗɗum, jaŋngo ɗum fuɗɗoode lewru hesru, mi nyaamdan bee laamiiɗo. To a yerdake, mi yahataa, ammaa mi nyukkoto haa ladde haa faɓɓijaŋngo kiikiiɗe.

⁶To baaba ma heɓti mi waraay, wi' mo: Daawuda tori yam duŋayeere yaawɗaago haa Baytilaama, berniwol maako, ngam lenyol maako fuu ɗon waɗa kirseteeŋga hitaande nde'e.

⁷To baaba ma wi'i: Booɗɗum, nden kam walaa ko saklatammi. Ammaa to tikkere maako saati jamum, a anndan o waɗi anniya mbarugo yam.

⁸Useni, tabitin amaana meeɗen. Siftor alkawal soobaaku ngal kaɓɓuɗa bee am yeeso Jawmiraawo. Ammaa to mi waɗi aybe, sey mbaraami an! Ammaa taa hokkam haa juŋngo baaba ma.”

⁹Yonatan jaabi mo: “Aa'a, kayya! Ɗum waɗataako! To mi anndi fakat baaba am ɗon nufo haala sarru dow maaɗa, nden mi anndinte ɗum.”

¹⁰Daawuda ƴami mo: “Noy mi anndirta to baaba ma jaabake ma bee tikkere?”

¹¹Yonatan wi'i Daawuda: “War, ndillen haa yaasi.” Nde ɓe ɗon ngurto,

¹²Yonatan wi'i: “Mi hunorake bee Jawmiraawo, Allah Isra'iila: Faɓɓijaŋngo bana wakkati jonta mi ƴaman baaba am. To o numi hayru ma, mi neldete habaru.

¹³Non boo to o numi sarru ma, mi anndinte. To mi waɗaay, Jawmiraawo hiito yam bee caatal! Fakat mi wallete haa a hisna yoŋki ma. To doole a dogga, nden kam Jawmiraawo wondu bee maaɗa bana o wonduno bee baaba am.

¹⁴To mi lutti bee yoŋki wakkati maajum, waɗanam mbooɗeeŋga bana Jawmiraawo waɗani ma, taa mbaram.

¹⁵Taa ittan danygol am amaana haa foroy, koo to Jawmiraawo itti konne'en ma fuu dow lesdi.”

¹⁶Yonatan haɓɓi alkawal bee saare Daawuda, o wi'i: “Jawmiraawo hiito konne'en Daawuda.”

¹⁷Nden Yonatan ɓesdi wi'ugo: “Hunoranam bee yiide nde marɗa ngam am. Ngam min mi yiɗi ma bana ngiɗmi hoore am.”

¹⁸Ɓaawo maajum Yonatan wi'i Daawuda: “Jaŋngo ɗum fuɗɗoode lewru hesru. Ɓe ɗaɓɓititte ngam joonde ma haa faada nyaamdu ferwan.

¹⁹Faɓɓijaŋngo yah haa nokkuure nde nyukkuɗa nyannde go, nyukka baŋnge hayre wi'eteende Ejel.

²⁰Min kam mi fiɗan kuri tati gal wakeere hayre man bana to huunde fiɗeego ɗon ton.

²¹Nden mi nela derkeejo haa o suɓta kuri man. To mi wi'i mo: Kuri njani gaa'e maaɗa, suɓtu! — nden kam wurta, haala ma jam, fakat bana Jawmiraawo o geeto, walaa sarru.

²²Ammaa to mi wi'i mo: Kuri njani gaɗa maaɗa — nden kam dillu, ngam Jawmiraawo neli ma daayiiɗum.

²³Ammaa siftor wolde alkawal hakkunde am bee maaɗa. Jawmiraawo tabitinan ngal haa foroy.”

²⁴Daawuda nyukki bana o wi'no. Nde fuɗɗoode lewru hesru yotti, laamiiɗo Sawulu wari haa pellel nyaamdu.

²⁵O jooɗi dow joonde maako haa mahol bana o woowi. Yonatan jooɗi, tiitotiri bee maako, Abineer mawɗo ardiiɓe sooje'en boo haa wakeere Sawulu. Ammaa joonde Daawuda ferwi.

²⁶Nyannde maajum Sawulu wi'aay koo ɗume, ngam o numi: “Teema woodi ko heɓi mo haa o senaaki ngam nyaamdu.”

²⁷Ammaa koo nyalaade juulde ɗiɗawre boo, joonde Daawuda ferwi. Ngam maajum Sawulu ƴami Yonatan: “Koni ɓii Yessa waraay nyaamugo keenya e hannde?”

²⁸Yonatan jaabi: “Daawuda tori yam duŋaye yahugo haa Baytilaama.

²⁹O wi'i yam: Useni accam mi yaha, ngam banndiraaɓe am mbaɗan kirseteeŋga nder berniwol. Mawnam umri yam mi wara. To a yerdake yam, accu mi yaha, mi laara deerɗiraaɓe am. Ngam maajum o waraay haa nyaamdu maaɗa.”

³⁰Sawulu tikkani Yonatan masin, o telɓani mo: “An njaaluujo! Mi anndi booɗɗum a soobiri bee ɓii Yessa oo, ɗum mbustu dow maaɗa e dow daada ma fuu.

³¹Yaake Daawuda o geeto, yoŋki maaɗa hisaay, laamu ma boo tabitaay. Jonta nel naŋngugo mo, o he'i mbareego.”

³²Yonatan ƴami baaba mum: “Ngam ɗume a yiɗi mbarugo mo? Ɗume o waɗi?”

³³Ammaa Sawulu sakkini labbo mum haa yuwa Yonatan. Bana nii Yonatan anndiri anniya mbarugo Daawuda tabiti haa ɓernde Sawulu.

³⁴Yonatan tikki masin, o ummi haa taabal, o waawaay nyaamugo koo ɗume nyannde maajum. Ɓernde maako naawi ngam baaba maako huɗi Daawuda.

³⁵Jaŋngo maajum fajiri Yonatan wurti, yehi haa nokkuure nde o narrino bee Daawuda go, derkeejo ɗon wondi bee maako.

³⁶O wi'i derkeejo: “Yaawɗa, suɓtu kuri ɗi piɗanmi.” Nde o doggi, Yonatan fiɗi kurol haa gaɗa maako.

³⁷Derkeejo yotti pellel kurol man, ammaa Yonatan hooli: “Kurol ɗon gaɗa maaɗa.

³⁸Yaawɗa, taa dara!” Derkeejo hooci kurol ngol, waddi ngol haa Yonatan.

³⁹O anndaa ko saawi nder haala maajum, sey Yonatan e Daawuda anndi ɗum.

⁴⁰Yonatan hokki derkeejo lagaawal e kuri haa o hoora ɗum nder berniwol.

⁴¹Nde o dilli, Daawuda wurti nyukkorde mum haa wakeere hayre fombinaare. O tuggi koppi, nden o sujidi nde tati. Ɓe koofnindiri, kaŋko e Yonatan, ɓe mboyi ɓe ɗiɗo fuu, ammaa bojji Daawuda ɓuri semmbe.

⁴²Nden Yonatan wi'i mo: “Yah jam! Taa yejjitit ko en kunotiri bee innde Jawmiraawo. Alkawal man tabiti hakkunde meeɗen, hakkunde ɓiɓɓe men boo. Jawmiraawo tabitin ɗum!”