Read Fulfulde 1 Samuyila 21 Bible Online

1 Samuyila 21 - Fulfulde bible

1 Samuyila 21

¹Daawuda ummi, dilli, Yonatan boo hooti berniwol mum.

²Daawuda yehi haa Ahimelek, limanjo haa Noba. Ahimelek wari haa Daawuda, o diwni, o ƴami: “Ngam ɗume ngarɗa an feere ma? Toy yimɓe ma?”

³Daawuda jaabi: “Laamiiɗo neli yam bee umroore sirri. O wi'i yam taa goɗɗo annda ngam ɗume o neli yam malla ko o umri yam. Sukaaɓe am boo, mi hawran bee maɓɓe haa nokkuure kaja.

⁴Ɗume a woodi bana nyaamdu? Hokkam tamseeje jowi koo boo ko a mari bana nyaamdu fuu.”

⁵Limanjo jaabi mo: “Mi walaa tamseeje meere, sey cenaaɗe. Mi hokkataa ma ɗe, sonaa to sukaaɓe ma kawtaay bee rewɓe.”

⁶Daawuda wi'i: “Taa sakla! Bana naane min meemaay rewɓe. Wakkati min ummi, worɓe am ɓe senaaɓe, koo ɗum laataaki jahaaŋgal cenaaŋgal. Sakkomaa hannde ɓe senaaɓe.”

⁷Nde limanjo nani ɗum, o hokki Daawuda tamseeje ɗe o ittuno haa taabal nder suudu Jawmiraawo ngam haa o jo'ina kese.

⁸Nyannde man Do'ek Edoomiijo, mawɗo waynaaɓe Sawulu ɗon ton haa yeeso Jawmiraawo.

⁹Daawuda ƴami Ahimelek: “A walaa labbo malla kaafahi ngam am na? Mi heɓaay hoo'ugo balmi am, ngam umroore laamiiɗo yaawɗini yam masin.”

¹⁰Limanjo jaabi: “Mi woodi kaafahi Goliyat Filistiijo mo mbarɗa nder waadiwol bi'eteeŋgol Leɗɗe-mawɗe. Ki saawaama nder limce, ndaa ki ɓaawo limce limanku. To a yiɗi kam, hoo'u ki. Balmol feere walaa ɗo.” Daawuda wi'i: “Ɓuranki ki'i walaa, hokkam ki.”

¹¹Nyannde maajum Daawuda ummi Noba, tokki doggugo Sawulu. O wari haa Akis, laamiiɗo Gaat.

¹²Saraaki'en annditi mo, mbi'i Akis: “Na kaŋko woni Daawuda, laamiiɗo maɓɓe! Ngam maako ɓe ngami, ɓe ngimi: Sawulu mbari ujineere, ammaa Daawuda ujine sappo.”

¹³Daawuda samɗini bolle ɗe'e, o huli laamiiɗo Akis masin.

¹⁴O waɗi hoore maako bana o ginnaaɗo caka maɓɓe, o ɗon ngaasa pareeje dammugal, o ɗon ilna tuuɗe maako dow wakkude maako.

¹⁵Akis wi'i jaggiiɓe mum: “Ndaa, on ɗon ngi'a o ginnaaɗo. Koni ngadduɗon mo haa am?

¹⁶Kadi yinnaaɓe haa ɗo ke'aay na? On ngiɗi o daamammi bee ginnawol maako na? Mi yiɗaa mo haa saare am.”