Read Fulfulde 1 Samuyila 25 Bible Online

1 Samuyila 25 - Fulfulde bible

1 Samuyila 25

¹Saa'i maajum Samuyila maayi. Isra'iila'en mooɓi, mboyi mo. Nden ɓe uwi mo nder saare haa Rama. Wakkati maajum Daawuda ummi, yehi fombina, jooɗi nder ladde hamaadaare Paran.

²Haa wuro Ma'on woodi goɗɗo diskuɗo masin. Innde maako Nabal mo lenyol Kaaleb. O mari baali ujine tati (3.000) e be'i ujineere (1.000), ɗi ɗon ndura kommbi wuro Karmel. Abigayel, debbo maako o ŋarniiɗo, kakkilɗo, ammaa Nabal o caatuɗo, kalluɗo. Nder ladde Daawuda nani Nabal ɗon meksa gaasa baali mum haa Karmel,

⁵o suɓi suka'en sappo nder worɓe maako, o wi'i ɓe: “Njehe haa Karmel, haa Nabal, koofne mo bee innde am.

⁶Mbi'e mo: Ndaa nii Daawuda wi'i: Allah hokke sabbuŋgo, Allah hokke jam, an bee saare ma e ko marɗa fuu.

⁷Mi nani a mari meksooɓe gaasa baali ma. Anndu waynaaɓe ma ɗonno ngondi bee amin, min mbaɗaay ɓe kalluɗum. Walaa koo ɗume majjiri ɓe yaake ɓe ɗonno haa Karmel fuu.

⁸Ƴam sukaaɓe ma, ɓe ngooŋɗinan bolle am. Kadi mo'an sukaaɓe am, ngam hannde woni nyalaade juulde haa maaɗa. Useni, woonan ɓe, hokku ɓe ko juŋngo ma heɓi ngam ɓiɗɗo ma Daawuda.”

⁹Kamɓe ɓe njehi, ɓe anndini Nabal bolle Daawuda ɗe'e fuu. Nden ɓe ɗon ndeena.

¹⁰Ammaa Nabal telɓani ɓe: “Daawuda, ɗum moy? Ɓii Yessa, ɗum moy? Maccuɓe dogguɓe jawmiraaɓe muuɗum'en ɗuuɗi hannde.

¹¹Nyaamdu am e ndiyam am e kusel ngel kirsumi, meksooɓe gaasa baali am keɓata ɗum. Kadi mi hoo'a ɗum, mi hokka ɗum yimɓe ɓe mi anndaa iwde muuɗum'en na?”

¹²Ɓe lori haa Daawuda, ɓe ngecci mo haala man fuu.

¹³Daawuda umri worɓe mum: “Mbakke kaafaaje mon!” Koo moy wakki kaafahi mum. Kaŋko boo o wakki ki maako nden o yahdi bee worɓe teemeɗɗe nayo (400). Ammaa teemeɗɗe ɗiɗo (200), o acci ɓe ngam aynugo kuuje maɓɓe.

¹⁴Ammaa gooto nder suka'en Nabal yehi haa Abigayel, o wi'i mo: “Nelaaɓe Daawuda ngari diga ladde ngam hoofnugo jaagorɗo amin. Ammaa kaŋko o saatani ɓe.

¹⁵Fakat, worɓe Daawuda ɗon mboonana min masin, ɓe meeɗaay waɗugo min kalluɗum. Walaa ko majji yaake min ɗonno ngondi bee maɓɓe nder ladde.

¹⁶Wakkati min ngondi bee maɓɓe e min ndurdi fuu, ɓe ayni min jemma e nyalawma bana mahol taariiŋgol min.

¹⁷Useni, numtu ɗum, anndu no a hisnirta en. To a waawaay, nden kam sarru ukkanto jaagorɗo amin e saare maako fuu. A anndi o meereejo, o nanantaa koo moy.”

¹⁸Law Abigayel hoo'i tamseeje teemeɗɗe ɗiɗi, kanyakanyaaji[19] inaboojam ɗiɗi, baali kirsaaɗi jowi e gabbe ca'aaɗe[20] deydey ko heewata buhu e tame inabooje joorɗe teemerre e tame ibbe joorɗe teemeɗɗe ɗiɗi. O rimdi ɗum fuu dow bamɗe.

¹⁹Nden o umri sukaaɓe: “Njehe onon, ardeeɗam, min kam mi tokkoto on.” Ammaa o yeccaay goriiko koo ɗume.

²⁰O wa'i wamnde maako, o tokki ɓe. Nde o ɗon diirto hooseere, ndaa, Daawuda e worɓe mum potti bee maako.

²¹Hiddeko ɓe potta, Daawuda numno: “Fakat, ko gorko oo mari nder ladde fuu, mi ayni ɗum meere. Walaa koo gootel majji. Ammaa kaŋko o warji mbooɗeeŋga am bee halleende.

²²Jawmiraawo hiito konne'en am to mi luttani mo gorko gooto nder yimɓe maako haa jaŋngo fajiri.”

²³Nde Abigayel yi'i Daawuda, o jippi wamnde maako bee jaawal, o tuggi koppi, turi yeeso Daawuda.

²⁴O do'i les kosɗe Daawuda, o wi'i: “Ɗum fuu ɗum aybe am, barkaama! Mi korɗo ma, duŋanam wolwango ma, yerda nanugo bolle am.

²⁵Useni, taa suklana gorko am Nabal, o laati ko innde maako wi'i, o paataaɗo meereejo. Min kam mi walaa ton nde nelaaɓe ma ngari, barkaama.

²⁶Ɗum Jawmiraawo haɗi ma waataago aybe man e rufugo ƴiiƴam hannde. Fakat bana Jawmiraawo o geeto, an boo a geeto, konne'en ma e ɗaɓɓanɓe halkugo ma fuu ɓe hiiteteeɓe bana Nabal.

²⁷Jaɓ dokkal ngal ngaddanmaami, a hokka ngal sukaaɓe tokkiiɓe ma.

²⁸Yaafanam, aybewol am, barkaama. Mi anndi Jawmiraawo waɗete laamiiɗo fakat, o tabitinan laamu ma haa saare ma boo. Ngam a ɗon haɓana Jawmiraawo nder konuuji mum, balɗe ma fuu walaa mo heɓata aybingo ma dow koo ɗume.

²⁹To goɗɗo taasni ma, yiɗi mbarugo ma, Allah Jawmiraawo maaɗa aynan yoŋki ma kommbi maako. Ammaa yoŋkiiji konne'en ma, o sakkinan ɗi bana goɗɗo sakkinirta hayre bee piwlol.

³⁰To Jawmiraawo laatini barkaaji ɗi o wi'no ma fuu, to o hokki ma laamu dow Isra'iila,

³¹nden kam walaa ko teddanta numo ɓernde ma, ngam a rufaay ƴiiƴam bilaa daliila, a acci waataago boo. To Jawmiraawo woonani ma, barkaama, siftor korɗo ma.”

³²Daawuda wi'i Abigayel: “Yettoore laatano Jawmiraawo, Allah Isra'iila mo neli ma hannde ngam fottugo bee am.

³³An boo, barka laatano ma ngam hakkiilo ma, ngam a haɗi yam waataago e rufugo ƴiiƴam hannde.

³⁴Ammaa fakat bana Jawmiraawo o geeto, Allah Isra'iila mo haɗi yam waɗugo ma kalluɗum: To a yaawɗaayno fottugo bee am, walaa koo gooto nder worɓe Nabal luttanno hiddeko jaŋngo fajiri.”

³⁵Daawuda jaɓi dokke Abigayel, o wi'i mo: “Hootu saare ma jam. Mi waɗan ko toriiɗa mi.”

³⁶Nde Abigayel warti saare, Nabal ɗon jooɗodi bee yimɓe mum, ɗon nyaama nyaamduuji ɗuuɗɗi bana ɗi laamiiɗo. Ɓernde maako ɗon seyi, o ɗon wuyki masin. Ngam maajum debbo maako yeccaay mo koo ɗume.

³⁷Jaŋngo maajum fajiri, nde wuykere acci mo, Abigayel anndini mo ko waɗi. Nde o nani ɗum, ɓernde maako yoori nder maako, laati bana hayre.

³⁸Ɓaawo nyalɗe sappo Jawmiraawo maayni mo.

³⁹Nde Daawuda nani haala maajum, o wi'i: “Yettoore laatano Jawmiraawo ngam o waɗani yam kiita, o gooŋɗini yam. O haɗi yam waɗugo aybe, ammaa o hiiti mo ngam o huɗi yam, o lorni halleende Nabal dow hoore muuɗum.” Nden Daawuda neldi muuyugo Abigayel, ngam haa o te'a mo.

⁴⁰Nelaaɓe maako ngari haa Abigayel haa Karmel, ɓe mbi'i mo: “Daawuda neli min haa maaɗa, ngam o yiɗi te'ugo ma.”

⁴¹Abigayel ummi, tuggi koppi, turi, nden o wi'i: “Mi korɗo maako, mi taaskani lootugo kosɗe huuwanooɓe mo.”

⁴²O yaawɗi, o wa'i wamnde maako, o tokki nelaaɓe Daawuda, kaŋko e horɓe maako njowo. O laati debbo Daawuda.

⁴³Daawuda aartuno te'ugo Ahino'am, iwɗo Yisre'el. Ahino'am e Abigayel, ɓe ɗiɗo fuu ɓe laati rewɓe maako.

⁴⁴Ammaa Mikal, debbo maako arano, Sawulu hoocuno mo, hokki mo Palti ɓii Layis mo Gallima.