Read Fulfulde 1 Samuyila 29 Bible Online

1 Samuyila 29 - Fulfulde bible

1 Samuyila 29

¹Filisti'en mooɓti jama'aaje muuɗum'en fuu haa Afek. Isra'iila'en boo caŋngini kommbi seeɓoore haa Yisre'el.

²Nde laamiiɓe Filisti'en ɗon caalo bee mooɓe muuɗum'en fodde ujineeje e teemeɗɗe, honooɓe laamiiɗo Gaat ngari haa ragare, Daawuda e worɓe mum ɗon ngondi bee maɓɓe.

³Mawɓe konu Filisti'en ƴami: “E ɗume Ibraniŋke'en mbaɗata ɗo?” Akis jaabi ɓe: “Ɗum Daawuda. Ɓooyma o suka Sawulu, laamiiɗo Isra'iila. Ammaa ɓuri nduuɓu o ɗon wondi bee am. Mi yi'iraay mo aybe koo seɗɗa diga nyannde o wari haa hannde.”

⁴Ammaa mawɓe konu Filisti'en tikkani Akis, mbi'i mo: “Lortin mo haa nokkuure nde njo'inɗa mo. Taata o yahda bee meeɗen ngam haɓre, ngam taa o waylito dow meeɗen nder haɓre. Noy o heɓrata yerduye jaagorɗo maako, sonaa to o wallinani mo ko'e worɓe men?

⁵Malla a yejjiti ko ɓe ngimani mo: Sawulu mbari ujineere, ammaa Daawuda ujine sappo.”

⁶Akis ewni Daawuda, wi'i mo: “Fakat bana Jawmiraawo o geeto, a gooŋgaajo. Min kam mi yiɗi masin a nasta bee am nder haɓre. Mi yi'iraay ma zammba diga ngarɗa haa am haa wargo hannde. Ammaa a fottanaay laamiiɓe woɗɓe.

⁷Kadi lorta, yah bee jam. Taa waɗ koo ɗume ko ɓerninta ɓe.”

⁸Daawuda wi'i Akis: “Aybewol ngole mbaɗmi, barkaama? Woodi ko a yi'iri yam diga mi nasti kuugal ma? Ngam ɗume mi heɓataa yahdugo bee maaɗa, mi haɓa bee konne'en jaagorɗo am laamiiɗo?”

⁹Akis jaabi mo: “Mi anndi. Yeeso am a koolaaɗo bana malaa'ikaajo Allah, ammaa mawɓe konu Filisti'en mbi'i: Taata o yahda bee meeɗen nder haɓre.

¹⁰Ngam maajum ndawe cub, an e accuɓe Sawulu, warduɓe bee maaɗa fuu, ndille to weeti.”

¹¹Jaŋngo maajum Daawuda e worɓe mum ndawi cub, ɓe lorti haa lesdi Filisti'en. Ammaa Filisti'en njehi gal Yisre'el.