Read Fulfulde 1 Samuyila 3 Bible Online

1 Samuyila 3 - Fulfulde bible

1 Samuyila 3

¹Samuyila, derkeejo ɗon huuwana Jawmiraawo dow ardaaŋgal Eeli. Wakkati maajum wahayuuji Jawmiraawo malla bolle muuɗum ɗuuɗaay.

²Eeli ɗon waali haa nokkuure muuɗum. Gite maako puɗɗi tampugo, o waawataa yi'ugo laaɓɗum.

³Samuyila boo ɗon waali nder suudu seniindu, ɓadiindu bee sundukru[3] alkawal Allah. Wakkati maajum pittirla nder suudu man ɗon huɓɓi tawon.

⁴Allah ewni Samuyila. Kaŋko o jaabi: “Na'am.”

⁵O doggi haa Eeli, o wi'i: “A ewni yam. Ndaa yam ɗo.” Ammaa Eeli wi'i: “Aa'a, mi ewnaaki ma. Yah, waala fahin.” O yehi, o waali.

⁶Fahin Jawmiraawo ewni Samuyila. Samuyila ummi, yehi haa Eeli, wi'i: “A ewnake yam. Ndaa yam ɗo.” Ammaa Eeli jaabi: “Ɓiŋngel am, mi ewnaaki ma. Yah, waala fahin.”

⁷Samuyila anndaano Jawmiraawo tawon, ngam Jawmiraawo meeɗaayno waŋginango mo wolde mum.

⁸Jawmiraawo ewni Samuyila tataɓre. O ummi, o yehi haa Eeli, o wi'i: “A ewni yam. Ndaa yam ɗo.” Jonta Eeli annditi ɗum Jawmiraawo ewni derkeejo oo.

⁹Ngam maajum o wi'i Samuyila: “Yah, waala fahin. To o ewni ma, wi': Wolwu yaa Jawmiraawo, maccuɗo ma ɗon nana.” Samuyila yehi, waali haa nokkuure mum.

¹⁰Nden Jawmiraawo ɓaditi Samuyila, dari, ewni mo bana naane: “Samuyila, Samuyila!” O jaabi: “Wolwu, maccuɗo ma ɗon nana.”

¹¹Jawmiraawo wi'i mo: “Nan, mi tammi waɗugo huunde naawnde nder Isra'iila. Koo moy nani ɗum, hultoran.

¹²Nyalaade maajum mi ukkan dow Eeli e saare mum ko mbi'moomi fuu.

¹³Mi anndinan mo no mi hiitorto saare maako haa foroy, ngam ɓikkoy maako kuɗi yam, kaŋko boo o haɗaay ɓe.

¹⁴Ngam maajum kuniimi dow saare maako: Walaa kirseteeɗi malla dokke nyaamdu ittata aybe saare Eeli haa foroy.”

¹⁵Samuyila waali fahin. Fajiri o maɓɓiti dammugal suudu Jawmiraawo. O huli anndingo Eeli wahayu mo o heɓi.

¹⁶Ammaa Eeli ewni mo, wi'i: “Samuyila, ɓiŋngel am.” O jaabi: “Na'am.”

¹⁷Eeli wi'i: “Ɗume Jawmiraawo wi'i ma? Taa suuɗam koo ɗume! Jawmiraawo hiito ma bee caatal fuu to a suuɗi yam wolde woore haa ko o wi'i fuu.”

¹⁸Samuyila yecci mo haala man fuu, suuɗaay koo ɗume. Eeli wi'i: “Kaŋko woni Jawmiraawo, o waɗa ko fottani mo.”

¹⁹Samuyila tokki mawnugo. Jawmiraawo ɗon wondi bee maako, gooŋɗini bolle maako fuu.

²⁰Koo moy nder lesdi Isra'iila, diga Dan haa yotti Biirsaba faami Jawmiraawo waɗi Samuyila annabiijo mum.

²¹Jawmiraawo tokki waŋgango Samuyila haa Silo, o anndini mo hoore maako bee wolde maako.